Mò Kpuih H’ Joi, 40 sơnam kis tàm ƀòn Sung Kép, xã Ia Kla, kơnhoàl Đức Cơ, càr Gia Lai là hìu geh dờp bơta kwơ bơh broă ai càn priă sa priă cồng ờ uă. Lài do, hìu mò H’ Joi gơwèt hìu rơƀah, rài kis gơtìp uă ngan kal ke. Kơnờm geh càn 80 tơlăk đong priă sa priă cồng ờ uă bơh mpồl bơtiàn dê, hìu mò H’ Joi neh lơh niam wơl hìu ơm mờ geh priă bơcri tàm broă tam 03 lồ tờm điều tàm bă ù suơn hìu nhă dê.

Geh hìu lơh kơl jăp, geh suơn tam phan nàng sền gàr sơnka neh dong kờl mò H’ Joi pin dờn rơlao nàng bơtàu tơnguh lơh sa hìu nhă. Mò Kpuih H’ Joi pà git: “Lài do tŭ trồ mìu den tàm hìu pal ai sơƀàk mờ rơsô nàng đơ dà. Tŭ do kơnờm mờ dà lơgar ai càn priă hơ̆ sồng geh priă nàng lơh hìu pa do, den kung ưn ngài. Geh hìu ơm kung iang nùs nàng drơng tàm broă lơh sa, ai geh rài kis niam rơlao”.

Xã Ia Kla, kơnhoàl Đức Cơ là xã tiah II, mờ khà hìu rơƀah bal mờ ndrờm rơƀah uă, mìng là làng bol jơi bơtiàn ờ gal cau. Tŭ do tàm xã geh 1 rơbô 56 hìu geh càn priă mờ priă jơnkah dồs rơlao 63 tơmàn đong tàm Ngân hàng Cíñ sác xã hội kơnhoàl. Ồng Hoàng Đức Anh, Củ tịc Anih duh broă làng bol xã Ia Kla pà git: “Bơh ală priă càn geh tơnguh rài kis làng bol, làng bol rơhời geh gơguh mờ kơl jăp. Xã rơ̆p pơn jăt tai pơgồp bal mờ ngân hàng Cíñ sác Xã hội kơnhoàl nàng lơh jăt ală khà priă jăt broă lơh nàng lơh geh uă tơn tus làng bol, tus ală cau geh dờp nàng lơh bè lơi jơnau kờñ dŭt ndơl là pal tơnguh uă rài kis làng bol in”.

Hìu nhă bàr nă ùr bơklao lŏ Siu Nhã, 31 sơnam mờ bi Đoàn Công Toàn, 35 sơnam kis tàm Mpồl 6, ƀòn drà dềt Chư Prông, kơnhoàl Chư Prông kung sơrlèt mờ kal ke tài kơnờm mờ priă càn do. Nam 2022, hìu nhă lŏ Siu Nhã neh ngui 80 tơlăk đong bơh priă càn sa priă cồng ờ uă nàng bơcri tàm broă bơtàu tơnguh lơh sa. Lŏ Nhã yal, kơ̆p kờñ dờng màng ngan bơh bàr nă ùr bơklao dê là lik klàs rơƀah gam rơhời geh mùl màl. Lŏ Siu Nhã pà git: “Lài do den rài kis hìu nhă gơtìp kal ke ờ di bè tŭ do. Bơh tŭ bàr nă ùr bơklao càn priă bơh broă sa priă cồng ờ uă den mờ khà priă hơ̆ bol añ bơcri tàm broă tam 01 lồ suơn kơphe mờ 400 ñjrong tiêu, lơh sa hìu nhă rơhời geh kơ̆ kơl jăp. Añ lơh ngan tàm 2, 3 nam tus den lik klàs rơƀah mờ geh rài kis hờm ram rơlao”.

Ồng Từ Ngọc Thông, Phó Củ tịc Anih duh broă làng bol kơnhoàl Chư̆ Prông pà git, priă ai càn sa priă cồng ờ uă tàm kơnhoàl neh dong kờl khà hìu rơƀah pah nam gơmù 03%. Ồng Từ Ngọc Phông pà git: “Broă ai càn priă sa priă cồng ờ uă là dùl tàm ală broă lơh nàng lơh jăt broă tơmù rơƀah kơl jăp. Mờ Jơnau sồr sồ 40 nam 2014 do là broă lơh gơguh pràn bè broă ngui kes priă dà lơgar nàng dong kờl, ai geh tai priă nàng lơh jăt ală broă dong kờl, ai càn priă sa priă cồng ờ uă. Tus tŭ do bol añ neh tơnguh rơhời tơngai ai càn priă nàng lơh jăt ală broă lơh bè tơmù rơƀah kơl jăp tàm kơnhoàl”.

Tus tŭ do, broă dong kờl ai càn priă sa priă cồng ờ uă neh lơh tus jơh tàm ală xã tiah ngài tàm gùt càr Gia Lai. Kờp jơh priă ai càn sa priă cồng ờ uă mờr 16 tơmàn 500 tơlăk đong, mờ rơlao 500 rơbô dơ̆ hìu rơƀah, hìu ndrờm rơƀah mờ ală cau geh sră dong kờl bơh mpồl bơtiàn geh càn priă, tàm hơ̆ làng bol jơi bơtiàn ờ gal cau geh mờr nggùl. Bơh tŭ hơ̆, khà hìu rơƀah tàm càr Gia Lai neh gơmù bơh rơlao 23% tàm nam 2014 gơmù gam rơlao 8% bè tŭ do. Ồng Rah Lan Chung, Phó Ƀí thư Tỉñ ủy càr Gia Lai pà git: “Tàm tơngai tus, tàm bơta pa, tàm broă lơh sa pa, geh ờ uă tơngu me mờ bơta mùl màl geh ai gam geh ală bơta di gơlan ờ hềt di pal. Den tàng Tỉñ ủy geh jơnau dan tus mờ Dà lơgar nàng lơh jăt Jơnau lơh nền bơh Ƀộ Cíñ trị dê bè tơnguh broă đơng lam bồ bơh Đảng gơwèt mờ broă ai càn priă sa priă cồng ờ uă tàm gùt lơgar dê đơs bal mờ càr Gia Lai đơs is nàng lơh bè lơi ngui geh cồng nha priă do, pơgồp bal tàm broă lơh mùl màl tàm broă bơ̆t bơtàu mờ bơtàu tơnguh dà lơgar kung bè càr Gia Lai dê”.

Kơnờm mờ priă càn bơh ală broă ai càn priă sa priă cồng ờ uă, càr Gia Lai neh geh ală broă lơh jòng tàm broă lơh jăt ală jơnau kờñ dà lơgar dê bè tơmù rơƀah kơl jăp, bơ̆t bơtàu ƀòn lơgar pa, bơtàu tơnguh lơh sa – mpồl bơtiàn tiah jơi bơtiàn ờ gal cau mờ tiah kơh bơnơm in.