VOV4.K’ho- Nhai 06/2021, Thủ tướng Cíñ phủ neh geh Kơrnoăt sồ 984 ai lơh jăt Broă rơndăp lơh lam lơh jăt Jơnau đơs pơndŭt sồ 82 nam 2020 bơh Ƀộ Cíñ trị khoă XII dê. Cíñ phủ sồr ală ƀộ, ngàñ, ală tiah pal kơlôi sơnơng wơl tơl, jrô ơnàng nùs nhơm jơnau sồr lơh, jơnau pơlam gùng bơh Ƀộ Cíñ trị dê. Bơh hơ̆, bơsong ală bơta gam gơkòl, ờ hềt pràn jak, ờ hềt niam, lơh jăt jơh nùs kràñ cê bàr pe broă lơh, kơnòl broă tờm nàng tă bơsong kal ke gơkòl tàm broă lơh rơndăp tăp sèng, tam gơl pa kông ty lơh broă sa sươn sre brê bơnơm mờ bơta geh ngan gam kờñ ngan.

Tàm khà 16 kông ty lơh broă sa sươn sre brê bơnơm tàm càr Dăk Nông geh 3 kông ty lơh jăt lơh sa bal, 6 kông ty tơn jơh lơh broă. Ồng Nguyễn Xuân Tuấn là Kwang ătbồ Cơldŭ lơh broă Lơh sră cih măt dan kă bro gơwèt Sở Kế hoạc mờ Đầu tư càr Dăk Nông pà gĭt: ală kông ty ndrờm geh bă ù ơnàng rlau 500 lồ, jăt jơnau sồr tàm Jơnau đơs pơndŭt sồ 82 bơh Ƀộ Cíñ trị dê den pal gàr niam gơnoar đơng pơlam bơh Dà lơgar dê gơwèt mờ ală kông ty do. Tàm tŭ hơ̆, broă rơndăp tăp sèng, lơh sa bal tŭ do tàm càr gam gơkòl bè uă bơta, kờñ gờñ lơh loh làng ală jơnau pơlam gùng, jơnau sồr lơh tàm Jơnau đơs pơndŭt sồ 82 nàng pơn jăt tai lam lơh mờ tă bơsong. Ồng Nguyễn Xuân Tuấn, đơs: Lơh jăt jơnau đơs pơndŭt sồ 82 bơh Ƀộ Cíñ trị dê den gơwèt mờ ală kông ty geh bă ù uă, rlau 500 lồ tus rlau hơđang den Dà lơgar geh gàr priă tă pơgồp đơng pơlam. Dilah gơtùi nàng gàr niam broă rơndăp tăp sèng dipal, broă pơlam gùng den gơtùi gàr wơl broă lơh kông ty dùl nă să is. Khà dồs lời ing wơl mờ geh gùng dà bơsong.

Ồng Lê Danh Thắng là Phó Kwang ătbồ Sở Tài cíñ càr Dăk Lăk pà gĭt, tơnơ̆ tŭ geh Jơnau đơs pơndŭt sồ 82 bơh Ƀộ Cíñ trị dê, càr neh ai tơn ơm broă rơndăp tăp sèng, lơh sa bal tàm 6 tàm khà 15 kông ty lơh broă sa sươn sre brê bơnơm (9 kông ty ndai neh jơh lơh sa bal mờ tam gơl gơ gơs broă lơh bàr nă cau lơh sa bal). Jăt ồng Thắng đơs, broă kờp sền, tam gơl gùng dà broă lơh, kơrnoăt boh lam gơtùi dong càr bơsong geh bàr pe bơta kal ke, gơkòl, ngan là gơkòl bè priă jền gơwèt mờ ală mpồl lơh sa kă bro tơn lời lơh broă. Ồng Lê Danh Thắng, đơs: Dăk Lăk geh 3 mpồl lơh sa kă bro gam tơn lời lơh broă, tŭ lơh gùng dà broă lơh là ờ geh bơta ring bal, hơ̆ là gơmù, priă lơh geh ờ tơl nàng tă tơm. Ngan bơta do tàm Jơnau đơs pơndŭt sồ 82 bơh Ƀộ Cíñ trị dê geh dùl jơnau đơs là kes priă geh dong kờl bơnah ờ ring bal nàng geh priă tơm, tơl bơta tơn lời lơh broă mpồl lơh sa kă bro.

Jơnau đơs pơndŭt 82 bơh Ƀộ Cíñ trị dê gơn kơnờm tă bơsong ală bơta gơkòl tàm gùng dà broă lơh mờ kơrnoăt boh lam tŭ do

Ồng Trịnh Đình Trường là Kwang ătbồ Mpồl duh broă ătbồ kă bro, Kwang ătbồ dờng Tổng kông ty Kổ phần Kơphê Gia Lai mờ Kông ty Cê Biển Hồ đơs là, Jơnau đơs pơndŭt sồ 82 bơh Ƀộ Cíñ trị dê neh ai mpồl lơh sa kă bro in gŏ bơta gơn kơnờm tă bơsong ală bơta gơkòl tàm gùng dà broă lơh, kơrnoăt boh lam tŭ do. Tàm hơ̆, đơs sùm broă tam gơl, bơtơl ală jơnau cih geh bơta krơi is bè priă jền, dia mờ geh gùng dà broă lơh priă jền, priă càn dong kờl ờ sa priă cồng uă. Ồng Trịnh Đình Trường, đơs: Jơnau do là jơnau tìs ndai bè adat, ală jơnau cih, Kơrnoăt lài do ờ hềt tam gơl tus he, tài bơh he là cau pe. Kơrnoăt bơh Ƀộ Cíñ trị dê ngui tàm bơta geh ngan, gơ lòt geh tus rài kis, tus ală mpồl lơh sa kă bro gơ là jơh broă lơh jŏ jòng.     

Jăt sền broă lơh rơndăp tăp sèng, tam gơl pa, lơh sa bal lơh broă sa sươn sre brê bơnơm tàm ală càr Tây Nguyên, ồng Nguyễn Lâm Thành là Phó Kwang ătbồ Mpồl duh broă Jơi bơtiàn kòn cau Quôk hội dê đơs: cồng nha ătbồ, ngui ù tiah tŭ do gam uă bơta ờ hềt pràn jak. Jăt ồng Thành đơs, pơn jăt tai lơh jăt Kơrnoăt 30 bơh Ƀộ Cíñ trị dê den bal mờ tam gơl, bơtơl ală gùng dà broă lơh kơrnoăt boh lam jăt gùng dà dong kờl ai mpồl lơh sa kă bro in bơtàu tơnguh kung kờñ pal sang tĕ ală gùng dà broă lơh kơrnoăt boh lam dong kờl uă ir, ờ hềt di pal. Ồng Nguyễn Lâm Thành đơs: Mờ jơnau cih bơh kơrnoăt boh lam dê tŭ do, bol he jàu ù uă, jàu uă rlau hơ̆ sồng ai apah mờ giă lơyah ngan. Ngan tài bơh ờ lơh kràñ tàm gùng dà broă lơh kơrnoăt boh lam priă jền, ù tiah gơlam tus broă lơh jăt ătbồ ờ gŏ geh cồng nha. Mờ kwơmàng, gơ gơlam tus jơnau sơgràm, pìt ai jơh. Bè broă tơnguh tai ătbồ geh cồng nha ngui ù tiah lơh broă sa sươn sre brê bơnơm, ngan là gùng dà broă lơh kơrnoăt boh lam priă jền bè ù tiah den añ dan mờ Cíñ phủ tơrgùm kơlôi sơnơng, bơsong broă do.

Gơkòl bè ù tiah là broă kal ke ngan rlau jơh bơh rơndăp tăp sèng, tam gơl mờ lơh sa bal dê     

Tàm ală broă bơh rơndăp tăp sèng, tam gơl pa, lơh sa bal kông ty lơh broă sa sươn sre brê bơnơm dê, Củ tịc Quôk hội ồng Vương Đình Huệ đơs là, gam gơkòl bè ù tiah là broă kal ke ngan rlau jơh mờ kờñ pal bơsong dùl bă wil tơl. Củ tịc Quôk hội tơngkah ngan tus broă jàu ù tiah bơh ală kông ty lơh broă sa sươn sre brê bơnơm dê ai càr in tŭ do kung gam uă bơta ờ hềt niam, ờ pràn jak mờ sồr Hội đồng Ñân zân ală càr geh broă rơndăp lơh jăt sền. Tơngai tus, Quôk hội kung geh sền swì jăt sền wơl broă do. Ồng Vương Đình Huệ, Củ tịc Quôk hội đơs: Tơngume tam gơl pa gùng dà ătbồ jơh bal bè priă jền, bè lơh sa đơs bal gam uă broă pal lơh. Jơnau kờñ nàng tơnguh uă cồng nha dŭt ndơl bơh ală kông ty lơh broă sa sươn sre brê bơnơm dê, tă pơgồp tai tàm gơguh lơh sa mờ kes priă dà lơgar dê den gam ơm ngài. Khà ù tiah ală kông ty lơh broă sa sươn sre brê bơnơm jàu rê ai càr in den khà dùl êt ngan. Dơ̆ bàr là ù jàu rê ai càr in khà geh kơrnoăt toh ai wơl ù mờ geh gùng dà ngui ù den mìng dùl êt ngan. Tàm tŭ làng bol bol he dê, ngan là làng bol jơi bơtiàn kòn cau tiah kơh bơnơm, cau kòn cau dùl êt nă cau gam ờ tơl ù ơm, ù lơh sa. Do là broă bol he pal sền gròi ngan, pal geh ală gùng dà broă lơh dipal. Gơtùi gŏ, ală broă bơh rơndăp tăp sèng, tam gơl pa, lơh sa bal ală kông ty lơh broă sa sươn sre brê bơnơm gùt lơgar dê đơs bal, Tây Nguyên đơs is, neh geh kwang đơng lam bồ Đảng, Dà lơgar sền swì mờ sền gròi đơng lam, sồr lơh nàng gờñ bơsong ală bơta gam gơkòl, ờ hềt niam, ờ hềt pràn jak.

            Cau cih VOV Tây Nguyên- Cau mblàng Lơ Mu K’Yến

            Dilah làng bol mờ gơ̆p bơyô kờñ pờ sền jơnau cih dơ̆ sơnrờp dan pờ jăt gùng pơlam do: https://vov4.vov.gov.vn/Kho/chuyen-muc/nghi-quyet-so-30-pal-geh-boh-mul-mal-kong-ty-nong-lam-nghiep-tam-tay-nguyen-jon-c162-409891.aspx