VOV4.K’ho- Pơn jat tai broă lơh lơh broă pơrjum dơ̆ 14, drim ngai 11/08, bơh bơta đơng lam bơh Củ tịc Quôk hội ồng Vương Đình Huệ, 100% kwang bàng Ủy ƀan Thường vụ Quôk hội geh mat neh dùl nùs ring bal 2 Nghị quyết bè: Crơng gơs thị trấn Bình Phú, kơnhoàl Cai Lậy, càr Tiền Giang; crơng gơs thị xã Chơn Thành mờ crơng gơs ală sơnah ƀòn gơwèt thị xã Chơn Thành, càr Bình Phước. Dùl nùs ring bal 2 Nghị quyết, mơya Ủy ƀan Thường vụ Quôk hội sồr, gơwèt mờ thị xã Chơn Thành pal đơs loh mpồl kwang bàng bơh ală anih lơh broă cíñ trị tàm ù tiah dê di pal mờ jơnau sồr lơh broă jat Nghị quyết.

Tàm tơngai lơh jat Nghị quyết sồ 6 bơh Ƀộ Cíñ trị dê bè rơndap ù tiah bơt bơtàu mờ bơtàu tơnguh kơ̆ kơljap tiah drà Việt Nam tus nam 2030, bơta wèt sền tus nam 2045, Ủy ƀan Thường vụ Quôk hội sồr Cíñ phủ kờp sền jơh ală kơnhoàl gùt lơgar, kơnhoàl lơi ờ hềt geh thị trấn, huyện lỵ den pal cih mat, geh broă rơndap lơh sền gròi bơcri priă lơh mờ dong kờl tiah hơ̆ nàng lơh sir ală sră nggal yal mờ Ủy ƀan Thường vụ Quôk hội in, gàr niam gờñ lơh geh jơnau sồr 100% ală kơnhoàl tàm gùt lơgar geh thị trấn, huyện lỵ.

Cau mblàng K’Hạnh