VOV4.K’ho- Dùl tàm ală broă lơh kuơmàng nàng bơtàu tơnguh wơl lơh sa  là chồl pràn gơguh ai càn priă, ai priă bơcri tàm ală gah broă lơh geh lam lơh lài, ală broă lơh tờm. Pin dờn tàm bơta kơp kơnờm bơtàu tơnguh wơl lơh sa, uă ngân hàng gam tơlik jơnau kờñ gơguh êt ngan rlau jơh bơh 20 tus 30% tàm nam do, uă ngan là tàm gah tac phan rah rài, ai càn priă cau dùl nă să is, ai càn priă tac bro ù tiah hìu đam.

Jat khà kờp bơh ngân hàng dà lơgar, ai càn priă kờp tus lồi nhai 2 gơguh 1,82% pơndrờm mờ lồi nam 2021. Kung jat Ngân hàng dà lơgar sơl yal, lồi nam 2021, jơngkah dồs priă càn geh 10, 44 tơlak tơmàn đông. Bè hơ̆, tàm 2 nhai bồ nam, ală ngân hàng tă tơlik ai rài lơh sa in rlau 190 rbô tơmàn đông priă càn. Lài hơ̆, ngân hàng dà lơgar pà git, jơngkah dồs ai càn neh gơguh mờr 2,74% tàm nhai 1 nam 2022, ndrờm gơguh mờr 286 rbô tơmàn đông. Do là khà jơnhua ngan rlau jơh tàm pơgap 10 nam do, ai gŏ bơta gơguh mhar ngan gơ wèt tus mờ jơnau kờñ càn priă tàm rài lơh sa tàm nhai bồ nam. Ală cau jak chài kung tơlik jơnau đơs lài niam ngan bè jơnau digơlan gơguh càn priă tàm nam do. Jat jơnau yal mblàng lơh loh bơh Kông ty cứng khoán BSC dê, jơnau kờñ càn priă nam 2022 digơlan pơn jat tai tàm khà jơnhua mờ digơlan gơguh 14%, geh dong kờl tài bơh broă pơn jat tai bơtàu tơnguh rài lơh sa tơnơ̆ kòp bơtờp. Bơdìh hơ̆ tai, bơnah dong kờl kờp dŭ 350 rbô tơmàn đông tàm pơgap bơh 2 tus 3 nam tus kung pơgồp bơnah dong gơguh càn priă. Phó Thống đôk Ngân hàng dà lơgar ồng Đào Minh Tú pà git: “Nam 2022, bol hi geh pơn jat tai đơng pơlam broă lơh priă jền jat gùng dà ngac ngar, lơh gơlik bơta niam ngan rlau jơh ai mpồl lơh sa kă bro in, dong kờl priă càn ai rài lơh sa in. Tàm broă đơng pơlam broă lơh priă jền, bol hi kung geh lơh jat broă lơh bơtàu tơnguh wơl lơh sa bơh Cíñ phủ dê, gàr niam jơnau kờñ gròi sền bơta roh bơngă khà priă, gàr kơ̆ kơljap broă lơh sa dờng, gàr niam kơ̆ kơljap sùm bơngă khà priă dê, gàr kơ̆ kơljap khà priă lơgar he pơndrờm mờ priă lơgar ndai kung bè gròi sền niam drà kă bro priă lơgar ndai, drà kă bro biàng”.

Bè ai priă bơcri rài lơh sa in, Ngân hàng dà lơgar pơn jat tai lam lơh ală broă lơh nàng kờñ gròi sền broă ai càn priă, gơ jat bal mờ tơnguh cồng nha broă ai càn priă. Bal mờ hơ̆, Ngân hàng kung đơng lam ngân hàng tơnguh priă ai càn ờdo ờdă, geh cồng nha, tơrgùm ai càn priă tàm ală gah lơh sa, broă lam lơh lài jat gùng dà bơh Cíñ phủ dê, gròi sền nền nòn priă ai càn tàm ală gah pơhìn gơbàn bơta ờ niam bè ù tiah hìu đam, cứng khoán, ală rơndap broă lơh BOT, BT gùng lòt, sơlơ tơnguh broă gròi sền bơta aniai gơ wèt tus mờ ai càn priă drơng jơnau kờñ tàm rài kis, càn priă nàng ngui sa, lơh gơlik bơta ƀuơn ai mpồl lơh sa kă bro mờ làng bol in geh càn priă ngân hàng. Mò Hà Thu Giang, Phó Kwang atbồ Vụ broă lơh priă jền, Ngân hàng dà lơgar pà git: “Priă càn pơn jat tai geh ai tàm 5 gah geh lam lơh lài, mờ 5 gah do ndrờm geh khà gơguh jơnhua rlau mờ ală gah bal, 5 gah geh ai lơh lài là lơh sa suơn sre ƀòn lơgar, mpồl lơh sa kă bro dềt mờ di mơ, tac phan hờ lơgar ndai, lơh sa mờ măi mok dong kờl mờ kông nghệ kao ndrờm là ală gah broă lơh chul chồl bơh rài lơh sa dê, bè hơ̆ den tàng gùng dà broă lơh ai tơlik lài tàm nam 2022 bơh ngân hàng dà lơgar dê kung tơrgùm tàm priă ai càn tàm ală gah do in”.

Pa do, mpồl kwang bàng ngân hàng bơh Cribơyai mpồl lơh sa kă bro Việt Nam (VBF) dan mờ Ngân hàng dà lơgar sền sơ wì tơnguh khà ai càn nàng ală ngân hàng in geh uă bơnah priă jơngkah ai càn, dong kờl ală mpồl lơh sa kă bro, kuơmàng là ală mpồl lơh sa kă bro di mơ mờ dềt tŭ kuơmàng. Broă ai tơlik khà ai càn ờ di là broă rơndap lơh atbồ, đơng pơlam priă jền tŭ do, jat kơ cế drà kă bro. Broă lơh ngui khà ai càn digơlan pal sang tĕ tàm tơnơ̆ do tŭ broă lơh ai càn kung bè ală ngân hàng kă bro lơh jat ală bơta pal geh bơh dùl drà kă bro bơtàu tơnguh dê. Cau jak chài Nguyễn Trí Hiếu đơs là, tàm ală nhai tus, đơs lài jơnau kờñ càn priă bơh mpồl lơh sa kă bro dê tơnơ̆ kờp dờng geh kơp kơnờm gam pơn jat tai gơguh jơnhua, nàng broă lơh sa bơtàu tơnguh wơl niam rlau tai den broă ai tơlik khà ai càn ală ngân hàng in geh dong geh kuơ ai cau càn mờ mpồl lơh sa kă bro in. Ngân hàng dà lơgar pal sang tĕ khà priă geh càn nàng tơl ngân hàng in lơh nền is broă rơndap lơh kă bro he dê. Ồng Nguyễn Thanh Tùng, Phó Kwang atbồ Ngân hàng Thương mại kổ phẩn Việt Nam Vietcombank đơs nền, ai càn priă geh ai tơlik pa geh lời ai nàng dong kờl lơh sa, kă bro, bơtàu tơnguh wơl lơh sa in: “Jơh ală khà priă geh ai càn bơh Ngân hàng dà lơgar dê ai gơnoar tơnguh tai, Vietcombank geh ai càn tàm ală gah kuơmàng bơh rài lơh sa dê, drơng lơh sa kă bro kung bè rài kis bơh làng bol dê in”.

Jơnau yal bè gah ngân hàng pa do bơh Kông ty cứng khoán Rồng Việt dê kung pin dờn đơs nam do ală broă lơh bơtàu tơnguh wơl rài lơh sa geh gơ rềng niam ngan tus gah ngân hàng. Ală bơnah dong kờl geh kuơ dờng ngan tàm broă gàr bơta pin dờn ai mpồl lơh sa kă bro in, lơh niam broă ngui priă mờ khà priă mờ kung tơrmù hoàc huơr priă càn mờ khà gơ wèt tàm broă ai càn, tơngai lam lơh mờ cồng nha bơh bơnah chul chồl mờ khà bơtàu tơnguh wơl. Tŭ broă kă bro geh tam gơl niam den geh tơrmù ƀà bơta aniai priă càn bơh rài lơh sa dê. Bơh hơ̆ tơnguh broă ai tơlik mờ jơnau kờñ bè priă càn. Bulah bè hơ̆, kwang đơng lam bồ 2, 3 ngân hàng kung đơs, kung gam pơhìn ală bơt aniai bè roh bơngă khà priă gơbàn wơl, bơta bơtàu tơnguh wơl bơh 2, 3 gah dê kung gam lơyài... mơya sền bal, bơta kơp kơnờm gơguh lơh sa nam do niam rlau mờ nam lài. Ngân hàng là dùl tàm ală gah geh kơp kơnờm gơguh niam ngan rlau jơh tàm nam do.

Cau mblàng K’Duẩn