VOV4.K’ho- Geh Đảng, dà lơgar sền gròi, ală dơ̆ ơhò pơndiang phan bơna, phan sa tềp lòt gùng tus mờ kơnhoàl bồt Trường Sa pah dơ̆ lồi nam, nàng ling klàng mờ làng bol tiah do geh dùl sa tềp wil tơl, cèng bơta bơkah, nùs nhơm ram mhŭ bơh ù gờl dê. Tàm gùng lòt tàm dà lềng hơ̆, geh git nđờ bơta lòng, bơta niam. Bơh jơnau cih “Gùng lòt tus mờ Trường Sa: Tàm ơhò pơndiang sơnam pa”, cau cih ƀău anih jơnau đơs Việt Nam geh dong bol he git loh rlau tai bè gùng lòt tàm dà lềng nàng gơtùi tus mờ ù tiah kuơmàng, tiah bồ nsừc dà lềng, cồng càl bơh dà lơgar dê. 

Tơnơ̆ sap uh kơ lềt jòng tơngac ù gờl, Trường sa 571 gơ wèt mpồl ling 411, lữ đoàn 955 lik bơh anih ơhò ling dà lềng ơm Cam Ranh jun mpồl lơh broă bol hi lòt nting bơr sa tềp ling klàng làng bol ală anih bồt Trường Sa. Ơhò cèng jơh bal sap driau, ală bơta yơr tê tơngac mờ nùs nhơm bơh ù gờl dê pơyua tus bồt gak sền bơh dà lơgar dê. Sơlơ lòt ngài ù gờl, sap nsừc dà lềng sơlơ pràn rlau, sap ñŏ, sap đơs hời rơhời ờ huan geh tai, ală dơ̆ bơñul nsừc dà lềng bè gơ tàm pơn jat gơ rề jơh dùl ơhò tơn. Lồi nam, dà lềng nsừc pràn mờ càl dờng, uă cau tàm mpồl lơh broă bol hi dê ờ gơtùi pleh bơta bơta sơ wing bồ, gơ dăn hă. Ờ huan geh cau lơi gơtùi git, bơñul nsừc dà lềng ờ git là cau pràn halà cau ờ sô; cau lơi lòt tàm dà lềng uă halà ờ huan lòt tàm dà lềng. Tus jơh bal mpồl dong broă là ală cau ling kơnòm să, pràn kơldăng mờ geh rơ wah lòt ling dùl bă nền nòn kung gơtìp bơñul sơl. Mơya ngai lơi kung bè hơ̆ lơm, pah tŭ tus jơ sàu sa 4 dơ̆, git nđờ rhiang bơnah piang geh mpồl drơng broă trŭ gơm rơcang wil tơl ngan, gàr tơl bơta pràn mờ bơkah ngan. Cau cih ƀău Đức Thu bơh ling dà lềng dê yal: “Dơ̆ lòt tàm dà lềng dơ̆ do bol hi tìp nsừc dà lềng dờng, den tàng ndrờm bè cau lơi kung bòl tài bơh bơñul nsừc dà lềng, ờ kờñ sàu sa phan lơi mơya sền gŏ bơta glar bòl bơh oh mi ling dà lềng tàm ơhò dê bol hi ndrờm bè geh tơnguh tai bơta pràn tàm gùng lòt tus mờ Trường Sa.”

Nàng gàr ală dơ̆ sàu sa bơkah, broă lơh dong broă tàm ơhò tàm bơta dà lềng nsừc ờ ƀuơn dùl êt lơi. Ală glah gơm phan tàm khoang trŭ gơm phan sa nhai do pal kơt kơ̆ wơl tàm ală nrăng dơm chi nàng gơ in ờ dùh, ntiar. Geh tŭ bè broă ià pềs, tah phan sa kung pal geh bơta chài is nàng pleh gơtìp koh tê tŭ trŭ gơm phan sa. Ai jat bi Trần Nam Giang, cau lơh broă atbồ mpồl drơng broă tàm ơhò đơs, den broă ngui phan nàng trŭ gơm kung kờñ pal geh bơta chài is: “Mờ mờng chài lơh broă drơng gàr tàm ơhò Trường Sa tàm uă nam he dê, nàng geh piang sàu bơkah mờ niam ngan rlau jơh ai mpồl in, phan sa bol hi geh lơh jat broă là trŭ gơm jơh lài phan do hơ̆ sồng trŭ gơm phan ndai, biap mhar ngan gơbàn ờ diơng, bol hi gơm lài, nàng gàr bơta bơkah, tơnơ̆ hơ̆ sồng gơm tus ală phan sa gơtùi prap gàr jŏ rlau. Bơta niam, bơta bơkah dơ̆ sàu sa dê kung geh tơnguh sơl. Tàm tŭ lơh broă, bol hi kung tam pà kơnòl jat kíp, nàng geh tŭ tơngai drơng broă mpồl in dùl bă niam ngan rlau jơh.”

Kơnòl tờm bơh ơhò 571 dê là jun mpồl lơh broă lòt nting bơr sa tềp Trường Sa. Bơdìh mờ ală bơta phan pal geh, ơhò gam pơdiang ntê bơkàu mai, tờm quất, nha klơm mbar, phe mbar, sur kis, bañ, mứt, kèu... cèng bal nùs nhơm sa tềp bơh ù gờl dê tus bồt ngài. Tàm ơhò lòt tus Trường Sa dơ̆ do gam geh uă ngan tờm chi tơlir pà ală bồt in bơsong jơnau gơ lời wơl bơh mìu càl rbut dờng sồ 9 pa do. Ală phan pà kuơmàng do geh cau tàm mpồl măi ơhò gròi sền, sền gàr nền nòn ngan. Thiếu tá Trần Hữu Hào, Phó Củ ñiệm Hậu kần lữ đoàn 146, tiah 4 ling dà lềng pà git: “Tài gơ rềng bơh nhơm mrềt, trồ tiah, càl dờng, nsừc dà lềng dờng, dà lềng nsừc pràn, mpồl lơh broă neh rơcang lài sồr ală mpồl ơn tàm kơldung, rơndap sap sèng, jơm phan bơna, ngui dà sàng tàm ơhò nàng tuh chi in, dong tờm chi tơlir ờ gơtìp ờ diơng. Tàm tŭ jun phan bơh ơhò mù tàm rơkì, bơh rơkì mut tàm bồt, mpồl neh sồr pal lơh niam broă lơh klơm, jơm, ờ lời dà lềng mut tàm phan, gàr bơta niam ală bơta phan tŭ jun tus tê ling klàng mờ làng bol tàm bồt.”

Nhai dà lềng nsừc pràn kung lơh broă jun mpồl lơh broă mờ phan bơna bơh ơhò tus ală bồt gơ gơs kal ke rlau. Ơhò Trường Sa 571 mìng gơtùi ơm rềp ală bồt, broă jun cau mờ jun phan bơna tơnơ̆ hơ̆ geh lơh mờ rơkì dềt. Nsừc dờng, tơl nă cau tàm mpồl mù tàm rơkì ndrờm pal soh àu mìu lơm, phan ngui, phan bơna geh klơm mờ kơldung nilon ờs mờng nàng pleh dà lềng mut. Sơrlèt gan ală kal ke, mpồl lơh broă bol hi dut ndơl kung neh tus mờ ală anih bồt sơn rờp tàm Trường Sa, mờ jàu tàm tê ală cau ling bồt ală phan geh gàr bơta niam dùl bă nền nòn ngan rlau jơh. Jàu tus tê ală phan pà bơh ù gờl, cíñ trị viên bồt Đá Nam bi Hoàng Kim Lân ờ gơtùi mpồn bơta ngoh rơngac: “Gơ wèt mờ kwang bàng, cau ling tàm bồt, tŭ dờp ală phan pà bơh ù gờl pơyua, să tờm bol hi gŏ gơ lơh ram nùs rlau, gơ lơh bè bol hi geh rềp mờ hìu bơnhă rlau, mờ ƀòn tờm rlau, tàm tơngai dờp kơnòl broă tàm bồt.”

Bơta ngoh rơngac bơh kwang bàng, cau ling mờ làng bol tàm ală bồt tàm Trường Sa dê tŭ geh dờp ală phan pà sơnam pa bơh ù gờl dê kung là bơta chờ hờp bơh mpồl lơh broă bol hi dê, bơh ală cau ling tàm ơhò 571 gam pơndiang sơnam pa tus ală anih bồt, là tiah bồ nsừc dà lềng, cồng càl kuơmàng, king crŭ bơh dà lơgar dê.

Cau mblàng K’Duẩn