Broă lơh gùng pleh tiah đah jum ƀòn dờng Bảo Lộc, càr Lâm Đồng là bơnah broă bơ tơl tàm rơndap broă lơh wơl, lơh niam gùng dờng 20 lòt gan ù tiah 2 càr Đồng Nai mờ Lâm Đồng jat broă lơh BT (hơ̆ là lơh mờ tàm jàu). Broă lơh jòng 15 kơi sồ mờ priă tă lơh geh tam gơl là rlau 720 tơmàn đông, sơn đờm lơh bơh nhai 2 nam 2017. Tơnơ̆ tŭ lơh gơs geh 70% khà broă, broă lơh neh pal ơm ing ờ lơh tai tàm lồi nam 2020 tài ờ tơl priă bơcri, kờp dŭ kờñ geh rlau 183 tơmàn đông tai hơ̆ sồng gơtùi lơh gơs.

Bulah càr neh ring bal ai priă bơcri bơh kes priă càr dê nàng bơ tơl ai broă lơh in mơya tài kòl yal bè broă lơh den tàng tus tŭ do Ƀộ Giao thông Vận tải kung gam ờ hềt geh rơndap broă tă bơsong sơl. Broă ơm ing ờ lơh tai gơl gùng pleh tiah đah jum ƀòn dờng Bảo Lộc lơh gơbàn uă jơnau ờ niam gơ lời wơl, lơh gơbàn ờ diơng gùng mờ lơh gơbàn pơhì pơhà priă jền.