VOV4.K’ho- Nàng rơcăng sơndră wơl mờ kòp bơtờp, tàm dơ̆ sa tềp bơhiàn dà lơgar nam Ñâm Zần, ƀòn dờng Hà Nội sồr ală tiah tơrgùm, rơcăng lài jơh ală bơta digơlan gơlik geh, ngan là tàm tơngai tàm ƀòn dờng neh geh jơi tam gơl să Omicron. Ală ngai do, kờp bal pah ngai ƀòn dờng gŏ pơgăp 2 rbô 900 nă cau bơtờp kòp.

Khà cau bơtờp kòp sền bal gam geh gròi sền niam, mơya yal lài poh pơn jăt tai digơlan gŏ khà gơmù “ờ ngan” tài bơh làng bol rê hờ ƀòn tờm sa tềp mờ geh gơguh wơl tơnơ̆ tơngai sa tềp. Tŭ do, ƀòn dờng Hà Nội gam ơm tàm khà 2 tàm broă rơcăng sơndră kòp. Ƀòn dờng Hà Nội neh gŏ 14 nă cau bơtờp jơi tam gơl să Omicron.

Jơi tam gơl să pa neh geh mat tàm Hà Nội, pơhìn lơh bơtờp tus mpồl bơtiàn là gơtùi geh lơm. Den tàng bè hơ̆, kờñ pal jăt sền mờ ngui ală broă lơh gròi sền lơh bơtờp kràñ cê gơwèt mờ ală tiah lơh bơtờp jơi tam gơl să do. Sở Y tế ƀòn dờng Hà Nội sồr ală hìu sơnơm pal lam lơh niam broă lơh dong kờl sơm kòp mhar, kham, sơm kòp ai làng bol in, gàr niam cau kòp kơn jơ̆ geh kham mờ sơm kòp di tŭ, ờ gŏ di ờ bài dong kờl halà bơsong lơyài.

Cau mblàng Lơ Mu K’Yến