Ală ngai kwơ màng, Tiah tềl kah yau rài lài do Dà lơgar Hìu duh khoai cau geh dà kơl hề mờ Dà lơgar Lạc Giao, tàm ƀòn dờng Buôn Ma Thuột, càr Dăk Lăk geh gal ngan cau lik mờ mŭt sền. Cau lơi kung ndrờm chu nàng tềng jơnang duh khoai, ồng Đỗ Văn Vệ, Atbồ tàm Anih tềl kah yau rài lài do cau geh dà kơl hề mờ Dà lơgar Lạc Giao yal, bal mờ broă duh khoai ală Bơtau Hùng, tàm hìu duh khoai do gam duh khoai cau sơn đờm bơ̆t bơtàu Dà lơgar Đào Duy Từ mờ ồng Phan Hộ, do là cau lam lơh ƀòn Lạc Giao.

Jơnau yal bơh làng bol kis tàm do: “Hìu duh khoai do bơh ồng Phan Hộ tus lơh ƀòn tàm do. Hơ̆ sồng lơh ală làng bol tus tàm do kờñ răc dan geh bơta lơngăp lơngai, pràn kơl dang, gơboh gơbài, lơh geh cồng nha ală broă. Pah nam tàm hìu duh khaoi geh bơyai lơh 4 dơ̆ lơh yàng, tàm hơ̆ geh lơh yàng hùc dà kah tô dà, lơh yàng ưn ngài ală yàng, lơh yàng duh khoai mò ồng rài lài do mờ kah kơlôi ală cau neh rề ơnàng ù tiah hờ đah jum dà lơgar Việt Nam lài do. Añ neh kis mờ ƀòn do bơh dềt tus tŭ do. Bi tờm añ kung neh geh tŭ là cau atbồ tàm do sơl, añ pơn jăt tai gơs cau atbồ ƀòn dê tus tŭ do kung neh mờr 20 nam”.

Jăt ală pang sră rài lài do geh cih, tàm ală nam 1920, ồng Phan Hộ mờ ală oh mi tờm bơh ƀòn Đại Cát, xã Ninh Phụng, kơnhoàl Ninh Hoà, càr Khánh Hoà neh tus tàm ù tiah Ban Mê Thuột – hơ̆ là ƀòn dờng Buôn Ma Thuột tŭ do, lơh sa kă bro, lơh ƀòn mờ lơh gơs cau geh dà kơl hề mờ Dà lơgar Lạc Giao. Lài ngan hìu duh khoai do mìng geh cang mờ gle, tìm mờ ja, tus nam 1932 den lơh kơ̆ kơl jăp mờ găc, tìm mờ kiă pơrhê mờ geh bơtau Bảo Đại pồ lơh gơs anih sơn đờm bơ̆t bơtàu Dà lơgar Đào Duy Từ gơs yàng duh khoai. Tàm rài kăc màng Nhai phàm nam 1945, cau geh dà kơl hề mờ Dà lơgar Lạc giao là anih pơrjum mờ tơlik măt ing Ủy ƀan kăc màng thị xã Buôn Ma Thuột. Kwơ màng ngan tàm ngai 18 nhai 3 nam 1975, tàm anih do neh bơyai lơh tơlik măt Ủy ƀan Ling atbồ Thị xã Buôn Ma Thuột geh Đại tá Y Blôk Êban lơh Củ tịc. Nam 1990, Hìu duh khoai cau geh dà kơl hề mờ Dà lơgar Lạc Giao geh rơndăp tiah tềl kal yau rài lài do kấp dà lơgar mờ geh lơh kơl jăp wơl, lơh niam wơl di jăt mờ hìu neh geh lơh lài.

Ồng Nguyễn Văn Bảy, Phó mpồl atbồ ală broă lơh niam chài Tiah tềl kah yau rài lài do Hìu duh khoai cau geh dà kơl hề mờ Dà lơgar Lạc Giao, do là cau neh kis 1 bơnah 4 rài mờ hìu duh khoai do pà git, bŭ lah neh geh tŭ gơtìp rài tam lơh, lơh tơrlah, mơya hìu duh khoai do kung gam geh làng bol sền gàr, lơh niam wơl mờ lơh kơl jăp, gơs dùl anih ai tơngŏ niam bè bơta geh bơh ală cau bơh tiah ring guh tàm Tây Nguyên lơh broă mờ ơm kis. Ồng Nguyễn Văn Bảy pà git: “Bơdìh mờ broă tus tàm do nàng chu nàng den gam geh kơnòl yal nàng ală cau in git bè Hìu duh khoai do. Tài 5 càr Tây Nguyên tàm hơ̆ mìng geh Buôn Ma Thuột geh dùl hìu duh khoai geh làng bol kis bơh tàm tiah ring tus tàm do nàng lơh gơs. Do là dùl bơta kwơ màng mờ he ờ gơtùi sơbì. Bơdìh mờ broă atbồ hìu duh khoai den gam yal rài lài do bơh hìu duh khoai ƀòn dê nàng ală oh mi tus tàm do sền nàng git wă rơlao mờ gơtùi yal bơta do nàng ală oh kòn, kòn cau ală oh mi in git bal”.

Tiah tềl kah yau rài lài do Hìu duh khoai cau geh dà kơl hề mờ Dà lơgar Lạc Giao geh lơh tềng sơnĕ 4 gùng Phan Bội Châu mờ gùng Điện Biên Phủ, ƀòn dờng Buôn Ma Thuột, càr Dăk Lăk. Jăt ồng Lại Đức Đại, Phó Kwang atbồ Sở Văn hoá, Thể thao mờ Zu lịc càr Dăk Lăk pà git, Hìu duh khoai do tŭ do geh Bảo tàng càr Dăk Lăk atbồ, là anih pơrjum niam chài pin dờn mờ là anih tus sền geh kwơ bơto bơtê rài lài do càr Dăk Lăk dê. Ồng Lại Đức Đại pà git: “Bơh tàm bơta geh kwơ bè rài lài do dờng màng ngan mờ geh kwơ bè bơta niam chài bè hơ̆ den Hìu duh khoai cau geh dà kơl hề mờ Dà lơgar Lạc Giao gam là anih sĕ còp mờ bơto bơtê bơhiàn ờs mờng bơh ală rơnàng kơnòm să, kung là dùl tàm ală anih tus mờ cau năc lòt nhơl pah dơ̆ tus còp ƀòn dờng Buôn Ma Thuột den sùm sĕ còp Hìu duh khoai cau geh dà kơl hề mờ Dà lơgar Lạc Giao bè là dùl anih lòt nhơl sền bè bơhiàn ờs mờng, rài lài do bal mờ bơta niam chài bơh cau Yoah kis tàm tiah kơh bơnơm càr Dăk Lăk dê”.

Neh mờr 100 nam geh lơh tàm ù tiah Tây Nguyên, Hìu duh khoai cau geh dà kơl hề mờ Dà lơgar Lạc Giao neh tềl tơngŏ uă tơngai rài lài do tàm broă bơtàu tơnguh càr Dăk Lăk dê, là anih niam tàm broă lơh lòt nhơl niam chài mờ bơto bơtê bơhiàn ờs mờng ai làng bol kis tàm do in, tàm hơ̆ uă ngan là rơnàng kơnòm să.