Tơnơ̆ mờ tŭ git jơnau yal geh ală “rơndeh lòt 0 đong” tàm càr Dăk Lăk gam dờp phan ngui phan sa pơyoa làng bol gam gơtìp gơrềng tơnơ̆ mìu càl rơbŭt dờng sồ 03 lơh aniai, Ùr hàng Hoàn vũ Việt Nam nam 2017 H’ Hen Niê mờ hìu nhă neh dong kờl jơh khà kòi phe pa tơwès nàng pơyoa tus làng bol tàm tiah mìu càl rơbŭt dờng dà tih dà cò lơh aniai in.

Rơlao 07 tạ phe neh măi, dăp tơl bào dềt 05 kĭ mờ pơyoa rơndeh lòt ală càr đah Tô tàm mang ngai 10 nhai 09. Ùr hàng H’ Hen Niê pà git tài gam geh dơ̆ lòt lơh broă tàm càr Ninh Thuận den tàng ờ tus mờ broă lơh tàm càr tờm Dăk Lăk dê. Lŏ ngoh rơngăc ngan tŭ gŏ ală cau tàm hìu nhă bal mờ cau tàm ƀòn neh tus bal dong kờl dăp, pơn diang phe bơh hìu (tàm kơnhoàl Cư̆ Mgar) tus ƀòn dờng Buôn Ma Thuột di tŭ. Lài mờ hơ̆, ùr hàng H’ Hen Niê kung neh dong kờl 100 tơlăk đong priă tàm tài khoản bơh Mpồl dong kờl Mặt trận Dà lơgar Việt Nam dê nàng dong kờl làng bol tàm tiah gơtìp mìu càl rơbŭt dờng mờ dà tih dà cò lơh aniai in.