VOV4.K’ho- Ngai 15/09, tàm ƀòn dờng Pleiku, Hìu sơnơm dờng càr Bình Định mờ Hìu sơnơm dờng càr Gia Lai bơyai lơh dơ̆ kĭ sră cih kah mờ sră hơ dong kờl kham- sơm kòp, bơto ngui măy mok bè broă lơh ờs mờng tàm gah broă lơh sơnơm. Hìu sơnơm dờng càr Gia Lai pa geh bơcri blơi măy mok DSA pa ngan.

Sră hơ dong kờl kham sơm kòp đah bàr hìu sơnơm dê

Ală măy mok DSA ngui tia X cùp ală gùng mhàm tàm să jan mờ ngui ală măy mok mŭt sền êt ngan rlau jơh nàng sơm kòp bơh tàm dơlam gùng mhàm mờ ờ duh càng pal reh pờ nàng mŭt sền. Tŭ do, ală măy mok DSA pa ngan neh geh crăp ơn tàm Khoa Plai nùs, Hìu sơnơm dờng càr Gia Lai. Ồng Phạm Bá Mỹ, Kwang ătbồ Hìu sơnơm dờng càr Gia Lai pà gĭt, broă lơh broă bal dong kờl kham- sơm kòp, bơto bơta chài ngui măy mok đah bàr hìu sơnơm geh dong càr Gia Lai geh tai tŭ nàng lơh ală bơta măy mok jak chài ngan, tơnguh uă cồng nha kham- sơm kòp dùl anih tơn ai làng bol tàm ù tiah càr dê in đơs is mờ làng bol ală càr rềp bal in đơs bal, tơrmù ƀà jơnau jun tus hìu sơnơm dờng ndai.

Cau mblàng Lơ Mu K’Yến