Tàm càr Kon Tum, 2 ngai bơh ngai 24 tus ngai 25 nhai 12, gal ngan làng bol jat yàng chờ hờp tus bal tàm dơ̆ bơyai lơh dơ̆ lơh chờ Noel tàm ală hìu pơrjum chờ hờp wă rò Noel kơ̆p kờñ ai nam pa 2023 lơngai lơngò mờ chờ hờp. Nàng bơta chờ hờp mang Noel geh bơyai lơh lơngai lơngò, chờ hờp, ală hìu Yàng gơwèt Mpồl jat Yàng Bàp càr Kon Tum ndrờm pơgồp bal mờ gơnoar atbồ ală tiah tàm broă gàr niam lơngap lơngai, rơndap tap sèng.

Tàm ală hìu Yàng Bàp tàm ù tiah ƀòn dờng Kon Tum, bè: Hìu Yàng Bàp lơh mờ dơm chi, Hìu Yàng Bàp Tân Hương, Hìu Yàng Bàp Phương Nghĩa… tiah tơr gùm gal ngan kòn sau yàng mờ năc lòt nhơl, gam rcang broă lơh gàr niam bơta lơngap lơngai, rơndap tap sèng, lơngap lơngai gùng lòt rê gùt dar hìu Yàng Bàp dê. Đơs mờ kwang đơng lam bồ gơnoar atbồ, ală mpồl cau tus còp, gờm chờ Noel, Đức Giám mục Chính tòa Giáo phận Kon Tum ồng Nguyễn Hùng Vị đơs loh nùs nhơm lòt bal mờ jơi bơtiàn, bal mờ dà lơgar bơh Mpồl Yàng Bàp càr Kon Tum bal mờ làng bol cau jat Yàng Bàp dê.

Tàm Gia Lai, tàm mang ngai 24/12 mờ ngai 25/12, làng bol jat yàng Bàp mờ yàng Tin Lành tàm càr Gia Lai neh chờ hờp bơyai lơh wă rò Noel nam 2022. Tàm ƀòn dờng Pleiku, nùs nhơm wă rò Noel tàm ală ƀòn jat yàng Bàp chờ hờp ngan. Tàm ală ƀòn jat yàng Bàp Thăng Thiên, sơnah ƀòn Tây Sơn, Ƀòn jat yàng Bàp Thánh Tâm, sơnah ƀòn Phù Đổng; Ƀòn jat yàng Bàp Mẹ vô ñiễm, sơnah ƀòn Hoa Lư; Ƀòn jat yàng Bàp Đức An, sơnah ƀòn Ia Kring,… làng bol jat Bàp bơ tòm tơrgùm bal tus bal chờ hờp sa Noel.

Tơnơ̆ uă nam gơtìp gơ rềng bơh kòp bơtờp dê, nam do, bồ tơngoh gơ lơh chờ hờp wă rò ngai Kơnràñ Lik lìng bè geh tơnguh uă rlau nđờ dơ̆ tàm jơh gùt làng bol jat yàng, kung bè làng bol, ngan là cau kơnòm să. Khà ơruh pơnu mờ làng bol lòt sền, lòt nhơl mờ tus bal nhơl ñŏ kung gơguh uă rlau pơndrờm mờ ală nam lài. Mpồl lơh broă geh gơnoar ală kâp kung neh sơlơ tơnguh broă lơh gàr ring niam lòt rê tàm gùng mờ sền gàr lơngăp lơngai tàm ƀòn lơgar. Tàm dơ̆ do, kâp ủy mờ gơnoar atbồ, Mặt trận dà lơgar mờ mpồl cau ală kâp tàm càr neh lời ai bơta sền gròi, lòt còp, nting bơr gờm chờ, pơn jờng di tŭ ală Ƀòn jat yàng Bàp mờ ală hìu jum Tin lành.