VOV4.K’ho- Drim ngai 20/5, Hội đồng Ñân zân ƀòn dờng Hà Nội khóa 16 bơyai lơh pơrjum tơngume nàng kờñ sền sơ wì, cribơyai, lơh nền broă ai, tam pà ring priă bơcri ai rơndap broă lơh bơcri priă lơh gùng pleh 4- tiah càr lơgar nàng bơ tơl tàm sră nggal yal Quôk hội in sền sơ wì. Do là rơndap broă lơh kuơmàng dà lơgar bơh Quôk hội lơh nền gùng dà bơcri priă.

Gùt anih pơrjum

Mờ 100% khà kwang bàng geh mat ring bal, Hội đồng Ñân zân ƀòn dờng Hà Nội neh ring bal rơndap broă kờp dŭ priă bơcri lam lơh rơndap broă lơh bơcri priă lơh gùng pleh 4 – tiah càr lơgar geh ai bơh kes priă ƀòn dờng dê là pơgap rlau 23 rbô 520 tơmàn đông. Rơndap broă lơh jòng rlau 112 kơi sồ, lòt gan ù tiah 3 càr, ƀòn dờng là Hà Nội, Hưng Yên mờ Bắc Ninh. Anih sơn rờp tàm gùng rơndeh ntoat rat Nội Bài- Lào Cai gơwèt kơnhoàl Sóc Sơn, ƀòn dờng Hà Nội; anih dut ndơl tàm gùng rơndeh ntoat rat Nội Bài- Hạ Long gơ wèt ù tiah kơnhoàl Quế Võ, càr Bắc Ninh. Kờp dŭ priă bơcri rlau 85 rbô 800 tơmàn đông, tơngai lam lơh rơndap broă bơh nam 2022 tus nam 2027.

Cau mblàng K’Duẩn