VOV4.K’ho- Mho ngai 22/6, Hội đồng Ñân zân càr Dăk Lăk bơyai lơh pơrjum tơngume dơ̆ 3, Hội đồng Ñân zân càr khóa 10, tơngai lơh broă bơh nam 2021 tus nam 2026 ring bal uă nghị quyết kuơmàng gơ rềng tus ală rơndap broă gơ wèt broă lơh bơtàu tơnguh wơl mờ bơtàu tơnguh lơh sa - mpồl bơtiàn.

Hội đồng Ñân zân càr Dăk Lăk lơh nền 8 rơndap broă gơ wèt broă lơh bơtàu tơnguh wơl mờ bơtàu tơnguh lơh sa - mpồl bơtiàn

Tàm pơrjum, ală kwang bàng neh cribơyai, ring bal Nghị quyết bè lơh nền gùng dà bơcri priă 8 rơndap broă lơh ngui priă bơcri bơh kes priă dà lơgar gơ wèt broă lơh bơtàu tơnguh wơl mờ bơtàu tơnguh lơh sa- mpồl bơtiàn mờ ală nghị quyết: Tam gơl gùng dà bơcri priă rơndap broă lơh Bơtàu tơnguh ală ƀòn dờng khà 2 tàm Quảng Nam, Hà Tĩnh mờ Dăk Lăk- Rơndap broă lơh dềt Buôn Ma Thuột; ai jơnau đơs bè tam gơl gùng dà bơcri priă rơndap broă lơh niam wơl mờ tơnguh bơta ờdo ờdă tơnau dơng dà. Đơs tơn jơh pơrjum, ồng Y Vinh Tơr, Ủy viên rơcang lài Đảng dà lơgar, Củ tịc Hội đồng Ñân zân càr, kwang atbồ mpồl kwang bàng Quôk hội càr Dăk Lăk sồr, gơ wèt mờ 8 rơndap broă gơ wèt broă lơh bơtàu tơnguh wơl mờ bơtàu tơnguh lơh sa- mpồl bơtiàn, Ủy ƀan Ñân zân càr mhar đơng lam ală sở, gah broă lơh, ală tiah, ală cau tờm bơcri priă pal rơcang lài ală rơndap sap sèng, sră nggal geh gơ rềng.

Cau mblàng K’Duẩn