Tàm pơrjum, ồng Lý Minh Thái – Kwang atbồ Sở Y tế càr Gia Lai geh 64 tàm 67 nă kwang bàng pồ lơh kwang bàng tàm Ủy ƀan Ñân zân càr Gia Lai. Lài hơ̆, nggùl nhai 3 nam 2024, ồng Thái geh Ủy ƀan Ñân zân càr Gia Lai tơn pồ lơh Kwang atbồ Sở Y tế. Ồng Lý Minh Thái deh nam 1974, geh sră bơsram ƀák sĩ cuyên khoa 2; kao kấp lý luận cíñ trị, lơh broă tàm gah lơh sơnơm bơh nam 1998 tàm Hìu sơnơm kơnhoàl Chư Păh.

Kung tàm pơrjum dơ̆ do, 100% kwang bàng Hội đồng Ñân zân càr Gia Lai pờ tê ring bal tơn lời at gơnoar broă Kwang atbồ Ƀan Jơi bơtiàn (gơ wèt Hội đồng Ñân zân càr) mờ tơn lời gơnoar broă kwang bàng Hội đồng Ñân zân càr gơ wèt mờ mò Đinh Thị Giang tài lơh tìs jơnau cih bè ală bơta đảng viên ờ geh lơh; lơh tìs ală jơnau cih bè atbồ, ngui kes priă rơcang lài kơryan kòp Kovid-19 tàm Ủy ƀan Mặt trận dà lơgar Việt Nam.