VOV4.K’ho - Drim òr (07/03), tàm ƀòn dờng Đà Nẵng, geh bơyai lơh pơrjum tơn jơh broă lơh Hội đồng Ñân zân ală càr, ƀòn dờng tiah tàm gùl lơgar mờ Tây Nguyên nam 2021 mờ lơh jăt rơndăp broă lơh nam 2022.

Nam 2021, ală tiah tàm do neh lơh ngan sơrlèt mờ kal ke, bơyai lơh geh cồng nha dơ̆ tĕ khà kwang bàng ala măt Quốk hội khoă 15 mờ kwang bàng ala măt Hội đồng Ñân zân ală kấp tơngai bơh nam 2021 tus 2026. Phó Củ tịc Thường trực Quốk hội ồng Trần Thanh Mẫn đơs là, HĐÑZ ală càr, ƀòn dờng neh lơh jăt broă sền gròi, tam gơl pa, tơnguh uă bơta niam broă lùp mờ hơ jơnau lùp, bơyai lơh uă broă sền gròi jăt tơngu me. Mơya, ồng Trần Thanh Mẫn ờ sŭk bè broă blơi phan dà lơgar, uă càr, ƀòn dờng lơh niam, mơya geh càr, ƀòn dờng ờ lơh ha là lơh ờ di mờ kơrnoăt lơh gơtìp tìs. Hội đồng Ñân zân là anih sền gròi mơya ờ gŏ ală bơta tìs do. Bè gùng dà, kơnòl bal ală broă lơh nam 2022, Phó Củ tịc Quốk hội ồng Trần Thanh Mẫn sồr Hội đồng Ñân zân ală càr, ƀòn dờng pơn jăt tai sền wơl, bơ̆t bơtàu gơs mờ bơyai lơh jăt rơndăp broă pơn jăt tai tam gơl, tơnguh uă bơta niam dơ̆ pơrjum, bơta niam lơh broă, broă tìp mờ cau tĕ khà, broă sền gròi lùp, hơ jơnau lùp.

Cau mblàng Ndong Brawl