Cih jơnau tơngit, video tàm pang fanpage pin dờn, tam gơl dà avatar lài gơs dà jù kò ha là tam gơl avatar mờ ală pang rùp bơh Tổng Ƀí thư dê mờ cih ală jơnau geh uă nùs nhơm ngoh rơngăc ngan – hơ̆ là broă uă cau ngoh rơngăc kah pơrlai ngan gơwèt mờ jơnau sang rài bơh dùl bơta ngăc ngar dờng kăc màng lơgar Việt Nam dê tàm internet. Bol añ dan sền mờ yal ờ uă jơnau cih hơ̆.

- Gơboh mờ sơnđàc Wa uă ngan, Wa neh lơh broă tus nhơm tă dŭt ndơl tài làng bol tài dà lơgar.

- Moăt jrùng ngan cau kòn jăk Đảng Kộng sản lơgar Việt Nam dê.

- Pin dờn mờ Đảng bơh nùs nhơm niam bơnĕ wa dê.

- Ờ pơnhừ să tàm jơnau đơs mờ niam bơnĕ bơh Wa dê neh lơh gơs dùl bơta kis jăk chài ngan tàm nùs nhơm làng bol dê.

- Dan kun bồ tềng đăp huềng soàn Tổng Ƀí thư, lời wơl nùs nhơm pin dờn niam mờ rài tơnơ̆ do niam bơnĕ ngan ai Dà lơgar tơnơ̆ do in!

- Di gơlan mờ uă cau, khi ờ mùl màl wă củ nghĩa kộng sản là bè lơi Mơya sền bơh Tổng Ƀí thư, khi wă dùl nă cau kộng sản, dùl nă cau lơh broă kộng sản jơh nùs là bè lơi.

Mờ gam uă ngan ală jơnau nrĭ geh cih mờ nùs nhơm ngoh rơngăc ngan. Uă cau kung neh cih ală dơ̆ kah wơl tŭ geh dơ̆ tìp mờ Tổng Ƀí thư ồng Nguyễn Phú Trọng. Tàm pang internet să tờm, Kwang ala măt ồng Vũ Quang Minh, Kwang atbồ anih ala măt lơgar Việt Nam tàm lơgar Đức, Kwang ala măt lơgar Việt Nam tàm lơgar Campuchia mờ tàm lơgar Anh lơh kơnòl broă Ireland lài do yal wơl dùl jơnau kah wơl tŭ ồng geh gròng Tổng Ƀí thư ồng Nguyễn Phú Trọng tàm dơ̆ tus còp Mùl màl bơh Tổng Ƀí thư dê tus lơgar Campuchia nhai 07 nam 2017 lài do.

-Tàm Sihanoukville, tŭ rơcang anih nàng bơyai lơh dơ̆ tìp măt bơh Tổng Ƀí thư mờ oh mi lơh broă tàm Anih ala măt bal mờ làng bol, Tổng Ƀí thư tus gờñ tŭ oh mi gam pơs wàs anih. Ni sơna, Tổng Ƀí thư mŭt tàm anih mờ tùng kơƀàng, kơgĕ bal mờ bol añ tàm nùs nhơm sền gơlơh krơi is ngan bơh jơh ală cau dê.

- Bol añ kung gam đơs bal tŭ kah tus broă lơh ờ gơtùi huĭ ngan do, là kơ̆p kờñ gam geh uă dơ̆ bal mờ Ồng rơndăp kơ ƀàng kơgĕ ai ală dơ̆ boh bơr niam bơnĕ mờ đềt mềr bè cau tàm dùl hìu nhă bal”.

Gam mờ cau lơh ƀăo, cau chài klài dà ce Hoàng Anh Sướng, bàr dơ̆ geh tìp Tổng Ƀí thư ồng Nguyễn Phú Trọng sùm là ală dơ̆ kah wơl ờ tŭ lơi huĭ, tàm hơ̆ geh dơ̆ hùc dà ce wă Tổng Ƀí thư, Củ tịc lơgar Lo ồng Tập Cận Bình. Cau lơh ƀăo, cau chài klài dà ce Hoàng Anh Sướng geh jơnau cih: “Tŭ ồng Tập Cận Bình tus còp lơgar Việt Nam, wa Nguyễn Phú Trọng neh jà añ bơyai lơh dơ̆ hùc dà ce tàm àng drim ngai 13 nhai 11 nam 2017 tàm hìu hờ đang Wa Hồ dê. Do kung là dơ̆ bàr añ geh tìp tơn mờ wa.

Kung gam să bồ hơ̆ sơl, ờ pơnhừ să, đềt mềt, niam bơnĕ lơh nùs nhơm añ sền wa Nguyễn Phú Trọng gơlơh bè dùl nă cau pơgru rơlao mờ dùl nă cau lơh broă cíñ trị. Mờ bơh bơta pràn hơ̆ bơh wa dê neh lơh nùs nhơm dơ̆ tìp măt đah bàr nă cau lam bồ bàr lơgar – Tổng Ƀí thư ồng Nguyễn Phú Trọng mờ Tổng Ƀí thư ồng Tập Cận Bình đềt mềr ngan, niam bơnĕ ngan, ram mhŭ, lơngăp lơngai ngan.

Den tàng, tơnơ̆ do, sền ală dơ̆ “chu ồs” bơh wa dê, añ gơlơh ngoh rơngăc mờ krơi is ngan. Pơndơ̆p tàm dơlam să bồ ờ pơnhừ să, lơbơn niam, dềt rơhền rơlĕ rơlùn bè dùl nă cau pơgru ƀòn hơ̆ là jơh dùl bơta kră kơldang song dơ pă, pràn kơldang, kràñ cê jơh nùs kơrian broă sa kuề sa koà, kơrian bơta ờ niam, bơta iơh bơsăk. Làng bol kờñ gơboh, ki ngàm sền kwơ wa hơ̆ ngan là tàm ală nùs nhơm niam bơnĕ hơ̆”.

Ờ gơtùi yal jơh ală jơnau kờñ yal, jơnau kah wơl mờ nùs nhơm làng bol ai Tổng Ƀí thư ồng Nguyễn Phú Trọng-kwang đơng lam geh làng bol kờñ gơboh, bơyô tàm ală lơgar sền kwơ; dùl broă lơh dờng, sền “Bơngă là bơta dờng màng, kwơ màng ngan rlau jơh”, gàr kơl jăp jơnau pal jăt, kis jơh dùl rài kis tài dà lơgar, tài làng bol. Dùl nai plai nùs ờ tàp, git nđờ tơlăk ntờc dà măt gơhòr.