VOV4.K’ho - Tàm ƀòn dờng Buôn Ma Thuột, càr Dăk Lăk, Mpồl bơyai lơh dơ̆ pơrlòng kơphe bơkah Việt Nam nam 2022 neh bơyai lơh jào khà kơphe bơkah Việt Nam ai ală mpồl lơh broă geh phan pơrlòng rơlao 80 điểm jăt khà điểm kơphe bơkah dunia dê.

                                              Jào khà kơphe bơkah Việt Nam nam 2022

Gơwèt mờ kơphe Rubusta, mpồl 1 gơwèt Hợp ták xã Ea Tân, càr Dăk Lăk, mpồl 2 gơwèt kông ty TNHH MTV Minudo Farm-care càr Dăk Lăk, mpồl 3 là suơn kơphe dum Ea Tân càr Dăk Lăk. Gơwèt mnờ kơphe Arabiaca, mpồl 1 gơwèt Kông ty TNHH MTV Minudo Farm – Care càr Dăk Lăk, mpồl 2 là kông ty kổ phần kă bro bơcri priă Dathaco ƀòn dờng Hồ Chí Minh, mpồl 3 là kông ty TNHH Pun Coffee càr Quảng Trị. Do là dơ̆ 4 dơ̆ pơrlòng kơphe bơkah Việt Nam geh bơyai lơh. Dơ̆ pơrlòng nàng pơn jờng ală cau tam kơphe, phan geh lơh bơh kơphe bơkah mờ mpồl lơh kơphe geh khà bơkah; yal phan kơphe gar bơkah Việt Nam tus mờ cau ngui sa, hìu coh, bŏ tàm lơgar mờ lơgar bơdìh.

Cau mblàng Ndong Brawl