VOV4.K’ho - Mang òr (06/09), tàm Anih tờm Pờ tơlik jơnau đơs Dà lơgar sồ hìu 58, gùng Quán Sứ, ƀòn dờng Hà Nội neh bơyai lơh jào khà pơn jờng Jơnau đơs Việt Nam nam 2022. Do là broă lơh Tơnkah 77 nam ngai crơng gơs Anih jơnau đơs Việt Nam (7/9/1945 – 7/9/2022).

     Kwang atbồ dờng Anih pờ tơlik jơnau đơs Việt Nam jào khà A tàm dơ̆ pơrlòng Jơnau đơs Việt Nam

Sơn đờm dơ̆ jào khà pơn jờng Jơnau đơs Việt Nam, Kwang atbồ dờng Anih jơnau đơs Việt Nam ồng Đỗ Tiến Sỹ đơs tờm bơh tơl tơngai tơnguh bơtàu dà lơgar dê, Jơnau đơs Việt Nam sùm tềng gah làng bol, ram mhŭ mờ pin dờn. Sơlơ tàm bơta kal ke, ngòt rơngơ̆t, sơlơ tơlik nùs nhơm kơ̆ dơn, geh kơnòl bơh cau lơh ƀăo Anih jơnau đơs Việt Nam dê. Kwang atbồ dờng Anih jơnau đơs Việt Nam đơs tờm: Tàm tơngai tam gơl sồ, Anih jơnau đơs Việt Nam sơlơ pal tam gơl pa, tơnguh bơta pràn bơh să tờm, pal geh ală broă bơceh tàm broă lơh geh pơnrơ là gah yal tơngit mhar, di tŭ, ờ geh nhàr. Tơnơ̆ mờ 1 nam lam sồr mờ ai khà, Mpồl bơyai lơh neh rơwah jào khà pơn jờng Jơnau đơs Việt Nam nam 2022 geh 5 khà A, 9 khà B mờ 11 khà C ai 4 gah broă ai khà. Tàm hơ̆ ròt ală jơnau cih “Khat gơboh mus kơl brê dà lơgar nàng lơh gùng Trường Sơn Đông” bơh anih lơh broă sùm tiah Tây Nguyên kung geh khà A ai jơnau cih sră ƀăo pờ tơlik jơnau đơs in.

Cau mblàng Ndong Brawl