Tàm ròt ală broă lơh di tơngkah kir sơnrai 78 nam ngai crơng gơs, drim ngai 07/9, Anih jơnau đơs Việt Nam bơyai lơh jàu khà jờng Jơnau đơs Việt Nam- Sơmañ nhai 9; jờng rơ ală mpồl, cau dùl nă să geh tă pơgồp uă ngan tàm jơnau đơs “Pràn pas bơh dà lềng ƀòn lơgar” mờ lam lơh tàm pơrlòng wèt tus tơngkah 80 nam ngai crơng gơs. Geh bơyai lơh pah nam, Khà jờng Jơnau đơs Việt Nam jờng rơ ală cau neh geh tă pơgồp ai dipal ai mat sơnđan “Jơnau đơs Việt Nam” in. Khà jờng geh jàu ai ală cau cih ƀău, mpồl cau cih ƀău geh jơnau sră ƀău, broă lơh, jơnau đơs jak ngan bè sră ƀău, cih sră niam chài đơs crih tamya, bơta chài, măi mok, kơlôi sơnơng jak chài; ală cau chài tàm gah bơceh, bơyai lơh; ală cau đơs niam ngan, cau lam jơnau đơs niam ngan. Khà jờng nàng kờñ jờng rơ, pơn jờng bơta bơceh lơh, tam gơl pa tàm tơl broă lơh bơh Anih jơnau đơs Việt Nam dê.

Nam do, Anih jơnau đơs Việt Nam jàu 6 khà jờng Biàng, 9 khà jờng Trà mờ 9 khà jờng lơngô ai ală cau cih ƀău, mpồl cau cih ƀău gơ wèt ală mpồl in. Di dơ̆ do, Kwang atbồ dờng Anih jơnau đơs Việt Nam jàu Ƀằng khen ai 8 mpồl mờ ală cau dùl nă să geh tă pơgồp uă ngan tàm broă lơh “Pràn pas bơh dà lềng ƀòn lơgar”. Anih lơh broă sùm tàm tiah Tây Nguyên ai geh khà jờng biàng mờ jơnau cih “Gơguh uă bă ù tam sầu riêng tàm Tây Nguyên- đal git bơta aniai mờ tŭ niam, dilah gơtìp aniai den kong, dilah bơtuah den geh sa” bơh cau cih ƀău Dương Đình Tuấn dê.