VOV4.K’ho- Tềng đap broă gơlik geh kal ke bơh kòp Kovid-19 dê, khà F0 gơguh mhar ngan tàm mpồl bơtiàn, bơh ngai 01/3, jơh ală kơnòm bơsram ơdŭ 9 mờ ơdŭ 12 tàm ƀòn dờng Buôn Ma Thuột, càr Dăk Lăk ơm ờ lòt bơsram tàm hìu bơsram tai mờ rê wơl broă bơsram pờ tơlik tàm internet. Ală ngai rềp ndo, khà cau bơtờp kòp Kovid-19 tàm ƀòn dờng Buôn Ma Thuột sùm gơguh uă, khà F0 sơm tàm hìu geh rlau 99% khà cau bơtờp, Phòng Giáo zụk mờ Đào tạo ƀòn dờng neh ai tơlik jơnau đơs mờ Ủy ƀan Ñân zân ƀòn dờng tam gơl bơh bơsram tơn gơs bơsram pờ tơlik tàm internet gơ wèt mờ jơh ală kấp bơsram, kờp bal mờ kơnòm bơsram ơdŭ 9 mờ ơdŭ 12 bơh ngai 01/3 tus tŭ geh jơnau yal pa.

Kơnòm bơsram ƀòn dờng Buôn Ma Thuột bơsram wơl tàm internet bơh ngai 01/3

Nàng gròi sền geh cồng nha broă gơlik geh bơh kòp bơtờp mờ gàr niam cồng nha bơto bơsram, Ủy ƀan Ñân zân ƀòn dờng Buôn Ma Thuột sồr Phòng Giáo zụk mờ Đào tạo ƀòn dờng tơrgùm jơh jơnau yal bè khà kwang bàng, cau pơgru mờ kơnòm bơsram bơtờp kòp Kovid-19 lài mờ 5 jơ mho pah ngai. Mờ kung đơng lam, pơgồp bal mờ ală anih lơh broă geh gơ rềng, ai tơlik jơnau đơs tam gơl rơndap broă rơcang sơndră kòp tàm ală hìu bơsram di mờ tŭ tơngai pa.

Cau mblàng K’Duẩn