Ồng Nguyễn Kim May- Củ tịc Ủy ƀan Ñân zân xã Ea Ktur, kơnhoàl Cư Kuiñ, càr Dăk Lăk yal, tàm ù tiah kơnhoàl dê gơlik geh dơ̆ chơ̆t bŭ dà lơh 3 nă kơnòm bơsram chơ̆t. Tàm ală cau gơtìp rềs àr, geh 2 nă là kơnòm bơsram ơdŭ 4 mờ dùl nă kơnòm bơsram ơdŭ 3, gơwèt Hìu bơsram kấp 1 Nguyễn Đức Cảnh, xã Ea Ktur, kơnhoàl Cư Kuiñ, càr Dăk Lăk.

Tàm pơgap 11 jiơ nguùl klo ngai, ngai 22/04, mpồl kơnòm bơsram tơnơ̆ tŭ jơh bơsram neh tus tơnau dà Việt Đức 4, xã Ea Ktur, kơnhoàl Cư Kuiñ, càr Dăk Lăk (ngài mờ hìu bơsram pơgap 1 kơi sồ) nàng um. Tàm tŭ um, ală kơnòm ờ toah gơdùh tàm tiah dà jrô ngòt rơngơ̆t, den hơ̆ sồng chơ̆t bŭ dà. Dùl mpồl kơnòm bơsram ndai sền gŏ broă do neh đơs lơs hòi tơl nă cau tus bal dong kờl. Mơya, tŭ jun ală sau tus tềng hơđang, dong kờl jơh nùs mơya ală sau neh chơ̆t. Jơh 3 nă kơnòm bơsram gơtìp rềs àr ndrờm là làng bol jơi bơtiàn kòn cau, geh rài kis kal ke. Tơnơ̆ tŭ rềs àr gơlik geh, ala mat kwang đơng lam bồ Ủy ƀan Ñân zân xã, ală ƀan ngàñ mpồl cau neh tus lùp còp, pơndờm pơnđiang, tam pà bal muăt jrùm mờ jàu dùl bơnah priă jền drơng broă tơ̆p ƀồc ai ală sau in.