VOV4.K’ho- Tềng đăp jơnau geh ngan tơrluh ù, lơh rơnggô gơlik geh sùm tàm ù tiah kơnhoàl Kon Plông, càr Kon Tum dê, Phó Thủ tướng Cíñ phủ ồng Lê Văn Thành neh jàu Ƀộ Khoa họk mờ Kông nghệ in đơng lam bơyai lơh dơ̆ lòt sền, sền swì jơnau bơh tài lơh gơlik jơnau tơrluh ù, bơta kơn jơ̆ mờ jơnau pơhìn lơh gơrềng tus mờ yal nàng gơnoar ătbồ bal mờ làng bol gĭt nàng rơcăng lài sơndră wơl dipal, pleh lơh gơlik nùs nhơm kơlôi rơcăng rơngòt rơngơ̆t tàm làng bol. Tàm poh, Mpồl đơng lam Dà lơgar bè rơcăng sơndră trồ tiah lơh aniai neh lam Mpồl lơh broă tus càr Kon Tum lòt sền ngan ngồn mơkung lam lơh broă lơh pơgồp bal tàm broă lơh sơndră wơl mờ jơnau tơrluh ù.

Mpồl lơh broă bơh Mpồl đơng lam Dà lơgar bè rơcăng sơndră trồ tiah lơh aniai neh lòt sền ngan ngồn tàm Hìu măy mờ tiah dơlam tơnau dơng dà hìu măy pờ tơlik ồs đèng Thượng Kon Tum tàm ù tiah 2 xã Ngọc Tem mờ Đăk Tăng bơh kơnhoàl Kon Plông dê. Mờ pràn rơndăp lơh 220 mê ga oát, dà ơn pơdơng tàm tơnau là rlau 145 tơlak khối dà, hìu măy pờ tơlik ồs đèng Thượng Kon Tum geh sền là dùl tàm ală jơnau digơlan lơh gơrềng tus broă tơnguh tai ală dơ̆ tơrluh ù mờ lơh rơnggô ù tàm tơngai rềp ndo tàm ù tiah do dê.

Mpồl lơh broă lòt sền anih crăp ơn măy jăt sền tàm dơlam ù tiah tơrluh ù tàm kơnhoàl Kon Plông

Yal mờ Mpồl lơh broă, ồng Trần Công Đàm, Kwang ătbồ Kông ty Hìu măy pờ tơlik ồs đèng Thượng Kon Tum, gơwèt Kông ty Kổ phần Hìu măy pờ tơlik ồs đèng Vĩnh Sơn- Sông Hinh yal, hìu măy pờ tơlik ồs đèng geh rơndăp lơh sơndră wơl rơnggô mờ tơrluh ù kâp 7. Ngai 26/02/2020, hìu măy pờ tơlik ồs đèng sơnđờm lơh broă lơh dơng dà. Tus ngai 20/11 dùl nam bal neh dơng dà bềng tơn tàm tơnau dà hìu măy pờ tơlik ồs đèng dê.

Tơnơ̆ mờr dùl nam, tus ngai 08/02/2021, hìu măy sơnđờm gŏ geh bơta gơ rơnggô ù. Tàm pơgăp tŭ tơngai bơh nhai 02 tus nhai 05/2021, uă ngan dơ̆ gơ rơnggô ù gơlik geh tơnơ̆ hơ̆ rơhời ờ huan geh tai tàm nhai 06 nam lài, ờ geh tàm nhai 07, nhai 08, tus gùl nhai 09 nam 2021 geh wơl dơ̆ rơnggô ù mờ bơta gơ rơnggô ù gơbàn sùm tàm nhai 03 mờ nhai 04 nam 2022.         

Mìng is tàm ngai 18/04 pa do, geh dơ̆ tơrluh ù dờng ngan rlau jơh bơh lài tus tŭ do mờ bơta pràn tus 4,5 độ Richter. Tàm tơngai geh dơ̆ tơrluh ù, tơnau dơng dà gam geh  106 tơlak khôi dà, tiah klŏ bơh dơ̆ tơrluh ù gơ ơm tàm ù tiah xã Hiếu mờ Pờ Ê, kơnhoàl Kon Plông ơm ngài mờ hìu măy rlau 14 kơi sồ mờ ơm ngài mờ tơnau dơng dà hìu măy pờ tơlik ồs đèng do rlau 25 kơi sồ. Ồng Trần Công  Đàm geh jơnau đơs bè do: Ală tŭ lòt sền mờ sền swì ngan ngồn den ală dơ̆ rơnggô ù do ờ gơrềng tàm bơta dà ơn pơdơng. Kông ty pơgồp bal sơl mờ Viện Vật lí Địa cầu crăp 3 nơm măy was gùt dar broă lơh hìu măy pờ tơlik ồs đèng Thượng Kon Tum nàng to was sền gròi. Tơnơ̆ pah dơ̆ geh rơnggô ù den kông ty ndrờm lam lòt sền broă lơh, broă lơh ndrờm bè ờs jơh lơm.

Jơnau đơs bơh ala măt Ƀộ Kông thương, Ƀộ Xây dựng, Tập đoàn Ồs đèng Việt Nam, Kông ty Kổ phần Hìu măy pờ tơlik ồs đèng Vĩnh Sơn- Sông Hinh mờ ală cau jak chài lòt bal tàm Mpồl lơh broă dê ndrờm geh bal jơnau đơs, hơ̆ là broă gĭt nền jơnau bơh tài lơh gơlik jơnau tơrluh ù, lơh rơnggô ù kờñ pal mhar lơh tơn, mơya pal kơrhia jăt tàm bơta kơlôi sơnơng jak chài. Tềng đăp măt, Kông ty Hìu măy pờ tơlik ồs đèng Thượng Kon Tum pơgồp bal mờ Viện Vật lí Địa cầu kờp dŭ, kơlôi sơnơng crăp ơn tai bàr pe măy sền gròi tàm dơlam ù tiah. Gơwèt mờ măy neh crăp lơh sir tơn jơnau tơl pràn tàm tơrbŏ tơn mờ Viện nàng geh jơnau yal di tŭ, di pal. Gơnoar ătbồ kơnhoàl Kon Plông mờ càr Kon Tum pal geh gùng dà sơndră wơl mờ jơnau jal mhar digơlan gơlik geh. Broă dơng dà tàm tơnau dà hìu măy pờ tơlik ồs đèng Thượng Kon Tum tàm tơngai tus pal geh kờp dŭ nền nòn...Ồng Nguyễn Đức Quang, Kwang ătbồ Kụk sơndră wơl mờ bơsong jơnau gơlời wơl bơh trồ tiah lơh aniai, Phó Kwang ătbồ Cơldŭ lơh broă sùm Mpồl đơng lam Dà lơgar bè rơcăng sơndră trồ tiah lơh aniai mơkung là Kwang ătbồ Mpồl lơh broă do geh jơnau đơs: Ờ hềt cau lơi geh jơnau đơs lồi dŭ broă tơrluh ù tàm do là tài bơh tơnau dơng dà hìu măy pờ tơlik ồs đèng halà tơnau dơng dà bơtơ̆t rbòng dà ờ mơya pal gŏ là bơh ală khà tơrgùm kờp, den broă gơguh tai jơh bal bè khà dơ̆ mờ mờ bơta pràn rềp ndo den geh bơta ndrờm bal bè tŭ tơngai dơng dà bơh hìu măy dơng dà hìu măy pờ tơlik ồs đèng Thượng Kon Tum. Do là dùl broă mờ bol he pal sền swì mờ pal kơlôi sơnơng. Tàm hơ̆, geh bal ală broă lơh tềng đăp măt mờ geh bal ală broă lơh jŏ jòng. Kung sền gŏ là, bol he gam dùl bơta siơ̆u tàm gùng dà rơcăng sơndră trồ tiah lơh aniai, sơndră wơl bơh bol he dê là bơnah bè tơrluh ù. Bulah jăt jơnau cih bơh kơrnoăt boh lam dê kung neh geh sơl, bơto pơlam neh geh. Gĭt nền là bol he pal rơcăng lài, bañ ờ rơcăng ngăc. 

Mpồl lơh broă neh lơh broă mờ Kông ty Hìu măy pờ tơlik ồs đèng Thượng Kon Tum

Tàm ngai sơnrờp lơh broă tàm tiah klŏ tơrluh ù, rơnggô ù tàm kơnhoàl Kon Plông, càr Kon Tum, Mpồl lơh broă bơh Mpồl đơng lam Dà lơgar bè rơcăng sơndră trồ tiah lơh aniai kung neh lòt sền, sền swì ngan ngồn broă gơlik geh tàm tiah dơlam tơnau dơng dà hìu măy pờ tơlik ồs đèng Thượng Kon Tum gơwèt xã Đăk Tăng mờ ù tiah xã Đăk Ring. Drim ngai 21/04 pa do, Mpồl lơh broă neh geh dơ̆ lơh broă mờ Mpồl đơng lam rơcăng sơndră trồ tiah lơh aniai mờ lòt jòi dong kờl rềs àr càr Kon Tum.

Kung tàm poh lài sơl, Cơldŭ lơh broă Cíñ phủ neh geh sră yal wơl jơnau đơs sồr lơh bơh Phó Thủ tướng Cíñ phủ ồng Lê Văn Thành dê bè bơsong tơrluh ù tàm ù tiah kơnhoàl Kon Plông, càr Kon Tum. Jăt mờ hơ̆, Phó Thủ tướng ồng Lê Văn Thành jàu Viện Hàn lâm Khoa họk mờ Kông nghệ Việt Nam in sồr Viện Vật lí Địa cầu pơn jăt tal lơh broă lơh gròi sền tàm dơlam ù tiah, jăt sền tơrluh ù tàm ù tiah pa yal, yal tơngĭt di tŭ ai ală anih lơh broă mờ làng bol in gĭt nàng rơcăng lài sơndră wơl dipal.

Ală Ƀộ: Kông thương, Nông nghiệp mờ Phát triển Nông thôn, Giao thông mờ Vận tải sồr jăt sền, sền swì, rơcăng lài lam lơh ală broă lơh sền gàr niam ờdo ờdă tơnau dơng dà bơtơ̆t dơng dà hìu măy pờ tơlik ồs đèng, bơtơ̆t rbòng dà mờ broă lơh rơndăp phan bơna gùng lòt tàm tiah do digơlan kong gơrềng bơh tơrluh ù, ờ lời gơlik geh gơ aniai nisơna, roh bơta kơ̆ kơl jăp broă lơh dê.

            Cau cih Khoa Điềm- Cau mblàng Lơ Mu K’Yến