VOV4.K’ho- Tơngai lài, uă cau kơnòm să tàm càr Gia Lai neh gơtìp bol tìs kông nghệ kao bơh tàm internet pơrlồm, pơn jồ lòt tus lơgar Campuchia lơh broă tàm mpồl cau pơrlồm, hơ̆ sồng sồr hìu bơnhă pal pơyua git nđờ rhiang tơlak đông nàng tơ wài să tờm. Kwang àng càr Gia Lai sồr làng bol pal rơcang ngac mờ ală kai bơh bol pơrlồm dê.

Tàm hìu sèt tàm mpồl 4, thị trấn Kon Dơng, kơnhoàl Mang Yang, càr Gia Lai, bi N.T.L hòr dà mat tŭ đơs tus bè kòn cau Đ.V.T, 15 sơnam tŭ do ờ git kis jŏ bè lơi. Tồn lah kờñ jòi priă dong hìu bơnhă, lồi nhai 3 nam do, jat jơnau yal tàm mạng xã hội, T đì rơndeh nac mut tàm ƀòn dờng Hồ Chí minh, hơ̆ sồng geh 1 mpồl cau lam tus lơgar Campuchia lơh broă. Pơgap nggùl nhai 4, T hòi điện thoại, ñắn tin tàm zalo đơs là, ală cau tàm do rồn bơklơn T ngui mạng xã hội pơn jồ cau Việt Nam lòt tus lơgar Campuchia lơh broă. Dilah gơtùi den mờ 1 nă cau, T geh pà priă 30 tơlak đông.

Mè bèp T dê rơngòt ngan ai bơta ờdo ờdă kòn klau he dê tàm lơgar ndai

10 ngai tơnơ̆, T ñắn tin hòi dan dong kờl, sồr hìu bơnhă pơyua 150 tơlak đông tàm sồ tài khoản geh mat là Quách Thanh Tùng nàng oh geh tơngklàs rê. Rƀah kal ke ir, tus tŭ do, ùr bơklau bi L kung ờ hềt jòi tơl priă dờng ngan do nàng tơ wài kòn: “Hìu bơnhă kal ke, ờ geh priă pơyua, kòn añ dê ñắn tin tàm zalo là đah neh gơtìp cau pù pờng, tơn ơt jơgloh 2 ngai. Tŭ do dan kwang àng Việt Nam, Campuchia, lãñ sự quán dong klàs kòn añ rê wơl Việt Nam ờdo ờdă”.

Trung tá Đinh Văn Sơn, Phó kwang atbồ Cơldŭ lơh broă sền gàr lơngăp lơngai tàm internet mờ rơcang sơndră cau tìs ngui kông nghệ kao (kwang àng càr Gia Lai) pà git, ờ hềt ttus 6 nhai bồ nam 2022, mpồl neh dờp 43 jơnau yal gơtìp pơr lồm tàm internet, mờ kờp jơh priă hoàc huơr gơguh tus rlau 26 tơmàn đông. Bơdìh mờ ală kai pơrlồm lài do bè rơ wah cau lơh broă bal tac phan, jà bơcri priă ờ ngan, pơr lồm mat kwang àng yal kơrnuat lơh glài... den tŭ do geh tai kai pa là pơrlồm lòt lơh broă tàm lơgar Campuchia mờ priă nhai bơh 800 tus 1 rbô dolar Mỹ.

Hìu bơnhă rƀah bơh T dê

Jat jơnau yal bơh 2, 3 nă cau gơtìp pơr lồm dê, tŭ tus lơgar Campuchia, khi geh lam mut ơm kis tàm ală hìu ơm bal bơh cau lơgar Lo atbồ. Broă lơh pah ngai là bơh mạng xã hội hòi điện thoại rê hờ Việt Nam pơr lồm cau tàm lơgar mờ ală broă lơh rơ wah cau lơh broă bal tac phan, hòi jà bơcri priă, pơn jồ lòt lơh broă tàm lơgar Campuchia. Dilah ờ lơh geh tơl khà geh jàu, khi gơtìp lơh glài êt ngan rlau jơh 1 rbô dolar Mỹ, gơtìp pù pờng, tơn ơt jơgloh hơ̆ sồng tơnơ̆ hơ̆ sồr pal hòi điện thoại cau tờm in sồr tong priă tơ wài. Khi mìng geh tơngklàs tŭ hìu bơnhă neh tong git nđờ rhiang tơlak đông khi in nàng tơ wài să.

Trung tá Đinh Văn Sơn sồr làng bol pal rơcang ngac tềng đap ală jơnau jà lòt lơh broă nggờc geh priă nhai uă tàm internet nàng kờñ pleh ală kai pơrlồm bơh bol tìs dê: “Làng bol geh jơnau kờñ jòi broă lơh, pal jòi git nền nòn, loh làng, kờñ jòi broă lơh tàm lơgar ndai den lùp ală anih lơh broă bơh Sở Lao động, Thương ƀiñ mờ Xã hội dê nàng geh jơnau pơlam ngan ngồn. Ală hìu bơnhă geh oh kòn tàm sơnam lơh broă den pal geh bơta tam pà, pơgồp bal, dong kờl nàng jòi broă lơh dipal, pleh gơtìp ală bol ờ niam pơn jồ, pơrlồm”.

Cau mblàng K’Duẩn