VOV4.K’ho- Bè bol añ neh yal, jơnau “duh hồl ù” tàm càr Dăk Nông bơh lồi nam lài tus tŭ do kung gam ờ hềt gŏ gơmù sơl. Tàm bơta hơ̆, dùl ròt ală dòr bơnơm neh mờ gam gơtìp cò pơnring tìs mờ kơrnoăt boh lam nàng ai măt mù drơng jơnau kờñ kă bro, tăc blơi. Pơn jăt tal dùl ròt jơnau cih “Khồm ù dòr gơ gơs ù biàng tàm Dăk Nông: Lơh tìs uă làm bă tiah, bơsong nggùl gùng”, jơnau đơs ngai do bal mờ jơnau cih dơ̆ bàr sơnđan măt “Dăk Nông lơh bơta lơi nàng kơryan khồm ù dòr gơ gơs ù biàng?”.
Tàm tơngai duh hồl ngan ù ờ hềt tŭ lơi geh bơh lài, giă ù tàm xã Nhân Cơ, kơnhoàl Dăk R’lâp, càr Dăk Nông gam gơguh jơnhoa ngan mờ gơhoài jăt bal mờ hơ̆ là uă ngan dòr bơnơm gơtìp cò pơnring tìs mờ kơrnoăt boh lam nàng drơng broă lơh tăc bro ù tiah. Ồng Phạm Văn Quân, Phó Củ tịc Ủy ƀan Ñân zân xã Nhân Cơ pà gĭt, uă cau geh gŏ mơya xã lồi dŭt pal kong ờ jai tàm broă bơsong lơh tìs. Ồng Phạm Văn Quân, đơs: Phòng Sền gàr adat boh lam, Phòng Tài nguyên mờ Môi trường kung tus ndo sơl pơgồp bal rao. Cau lơh den ờ geh ù bơh cau dê. Bơsong den pal bơsong di cau tờm ù, mơya lùp ồng cau tờm ù den ờ gŏ tìp geh ồng hơ̆ ơm tàm Sài Gòn ờ bài rê ndo. Mờ cau lơh tam gơl sùm bè hơ̆, tŭ bơsong kal ke ngan tài bơh jăt gơlơh bè khi kung geh cau bơto pơlam, pleh adat boh lam, he kung lơh sùm sơl, kal ke ngan. Mờ sồr ơm lơh den he kung lơh sră pơ àr sồr ơm ờ lơh sơl, mờ ờ gŏ gơtùi ngai lơi kung geh oh mi ơm tàm hơđơm hơ̆ ờ.
Cò pơnring dòr bơnơm tìs mờ kơrnoăt boh lam tàm tiah rbàng Dăk Rtih, xã Nhân Cơ, kơnhoàl Dăk Rlâp
Ồng Lê Văn Hoàng, Phó Củ tịc Ủy ƀan Ñân zân kơnhoàl Dăk Mil, càr Dăk Nông pà gĭt, geh bàr pe bơta kal ke mờ ờ hềt niam tàm broă bơsong lơh tìs gơwèt mờ broă lơh cò pơnring dòr bơnơm tìs mờ kơrnoăt boh lam. Lài ngan là khà lơh glài tŭ do gam dùl êt ngan, jăt Kơrnoăt sồ 91 nam 2019 bè lơh glài mờ priă tàm gah ù tiah gơwèt mờ broă lơh aniai ù den khà lơh glài uă ngan rlau jơh tàm kâp xã là 5 tơlak đong mờ tàm kâp kơnhoàl mìng 50 tơlak đong lơm. Tàm tŭ hơ̆, bơta kwơ ală bă ù tơnơ̆ tŭ cò pơnring digơlan gơguh tus gĭt nđờ tơmàn đong, cau lơh tìs tŭ lơi kung rơcăng lơh tìs mờ tơm priă lơh glài. Broă do kờñ pal geh kơlôi sơnơng, tam gơl nàng adat boh lam ngui tàm rài kis ngan ngồn gơtùi ngui mờ geh bơta pơhìn. Ồng Lê Văn Hoàng, đơs: Dòr bơnơm tŭ do cò pơnring jơh, mờ lơh wơl bè bơta geh bơh sơnrờp gơ dê den là kal ke ngan. Tŭ do, Cíñ phủ gam cih rơndăp cih tam gơl adat ù tiah, bè đah kơnhoàl den kung dan mờ ală kâp geh gơnăp gơnoar nàng geh broă lơh tam gơl bè lơi hơ̆ nàng gơ in dipal mờ gơtùi mŭt ngui ngan ngồn tàm rài kis.
Jăt ồng Đỗ Tấn Sương, Củ tịc Ủy ƀan Ñân zân ƀòn dờng Gia Nghĩa, càr Dăk Nông yal, tŭ ù tiah tàm ƀòn dờng gam gơguh, gam gơhòi gơ jà ală cau bơcri priă den broă lơh tam pà ù, tam pà bă, cò pơnring măt ù geh pơn jăt tai gơguh. Tàm tŭ jơnau kờñ lơh hìu đam bơh làng bol dê là geh ngan mơya broă rơndăp ù tiah tŭ do ờ hềt geh di mờ bơta geh ngan tàm rài kis mờ rơndăp ù tiah nền cê mìng lơh geh 6 rbô lồ tàm 27 rbô lồ mờ tơrgùm uă tàm tiah tờm ƀòn dờng Gia Nghĩa. Ồng Đỗ Tấn Sương, đơs: Bơh tơngai kòp bơtờp den uă làng bol tàm Sài Gòn, Bình Dương, Đồng Nai kung kờñ tus ndo blơi 5, 7 sào, dùl lồ, kung kờñ geh hìu geh sươn, hìu mìr. Mơya kal ke ngan bơh he dê tŭ do là ờ hềt bơsong di tŭ jơnau kờñ hìu sươn, hìu mìr hơ̆. Tài bơh ù hơ̆, gam là ù lơh broă sa sươn sre, ƀòn dờng he ờ hềt rơndăp ù tiah jơh geh, ờ hềt jăt thàn mờ bơta geh ngan tàm rài kis. Mờ kờñ lơh geh bơta lơi den pal geh rơndăp ù tiah nền cê.
Tàm tŭ hơ̆, ồng Nguyễn Anh Tú, Củ tịc Ủy ƀan Ñân zân kơnhoàl Cư Jŭt, càr Dăk Nông đơs là, lơh gơlik geh jơnau cò pơnring dòr bơnơm, cò bồr măt ù tìs mờ kơrnoăt boh lam geh kơnòl dờng ngan bơh gơnoar ătbồ kâp hơđơm dê. Ồng Nguyễn Anh Tú, đơs: Bơdìh mờ broă bơsong gơwèt mờ cau lơh tìs den pal sền swì kơnòl tàm kâp xã, sơnah ƀòn, thị trấn, pal sền wơl broă lơh ătbồ neh niam halà ờ hềt. Dilah bè lơh tìs gơbàn uă, den pal sền kơnòl bơh ală ồng kwang bàng tàm hơ̆ dê, ngan là ồng lơh broă gah ù tiah mờ geh bal kwang đơng lam bồ xã.
Cò pơnring măt ù tìs mờ kơrnoăt boh lam tàm Dăk Nông tơngai do là pal đơs ngan
Ồng Lê Trọng Yên, Phó Củ tịc Ủy ƀan Ñân zân càr Dăk Nông đơs nền, broă lơh cò pơnring dòr bơnơm, cò bồr măt ù tìs mờ kơrnoăt boh lam tàm ù tiah càr dê tàm tơngai do là pal đơs ngan. Broă lơh kă bro ù tiah, tam pà ù, tam pà bă tàm bàr pe tiah gam ờ hềt loh làng, ờ hềt song dơ pă, dùl bơnah là tài bơh ală jơnau cih bơh kơrnoăt boh lam dê kung bè jơnau cih bơh kơnoar boh lam càr dê ờ hềt kràñ. Bơta do gơlam tus jơnau gơlời wơl là dà lơgar ờ gơtùi geh priă dia, rơndăp ù tiah gơtìp lơh aniai mờ drà ù tiah gơtìp ờ kơ̆ kơl jăp. Nàng lơh niam wơl jơnau do, Mpồl duh broă Đảng bơh Ủy ƀan Ñân zân càr dê gam sồr cih kơrnoăt bè lơh jăt broă lơh dà lơgar bơh kwang đơng lam bồ càr tus dì kâp xã, sơnah ƀòn, tổ zân phố tơn. Ồng Lê Trọng Yên, Phó Củ tịc Ủy ƀan Ñân zân càr Dăk Nông, đơs: Pa do,Cíñ phủ kung neh geh jơnau cih tàm kơrnoăt boh lam bè broă lơh ù tiah, den broă do Ủy ƀan Ñân zân càr neh jàu ai Sở Tài nguyên mờ Môi trường in đơng lam mờ Sở Xây dựng, mờ ală tiah, geh tă pơgồp jơnau đơs mờ Ủy ƀan Ñân zân càr nàng lơh niam wơl tàm broă kă bro ù tiah pal dipal mờ kơrnoăt boh lam. Dơ̆ bàr là broă lơh ătbồ ù tiah bè tam pà ù mờ lơh hìu đam. Pal geh ală jơnau cih tàm kơrnoăt boh lam nàng càr in sơlơ lòt sền, jăt sền. Broă dơ̆ pe là pal sền swì gam geh sơl bơta ờ hềt niam lơi tàm Kơrnoăt sồ 22 nam 2021 bơh Ủy ƀan Ñân zân càr dê ai ngui halà ờ nàng lơh niam jơh tàm broă lơh broă rơndăp lơh ngui ù mờ rơndăp ù tiah ngui ù, pleh lơh gơlik bơta kwơ mpồl, tam pà ù dềt ờ di rơndăp ù tiah mờ broă rơndăp lơh ngui ù neh geh kĭ.
Bơta bơcrì bơcrà, ờ gŏ rơngòt bơh uă cau lơh tìs dê pà gŏ, bal mờ bơta ờ pràn jak, ờ ătbồ kràñ bơh ală kâp gơnoar ătbồ tiah hơ̆ dê kung gam geh sơl ală bơta ờ hềt di pal bè adat boh lam, broă lơh glài lơh tìs mờ broă lơh đơng lam, ătbồ kwang bàng tàm tiah hơ̆. Uă tiah geh tềl tơngŏ ờ niam, bơta kwơ mpồl bal, kờñ ngan pal geh bơta lơh bal kràñ cê jơh nùs, pràn kơldang bơh ală kâp gơnoar ătbồ càr Dăk Nông dê.
Cau cih VOV Tây Nguyên- Cau mblàng Lơ Mu K’Yến
Làng bol mờ gơ̆p bơyô kờñ pờ mờ sền jơnau cih dơ̆ dùl bơh ròt jơnau cih do dê, dan jà pờ jăt gùng link do:
Viết bình luận