Ơ làng bol, oh mi mờ cau ling tàm gùt lơgar,

            Dùl sơnam pa Qúy Mão gam rê tus tai tàm dà lơgar Việt Nam bềng bơta kờñ gơboh bơh bol he dê! Tàm tŭ jiơ tàm jàu sơnam dờng màng mờ bềng nùs nhơm ngoh rơngăc, ala măt kwang đơng lam bồ Đảng mờ Dà lơgar, añ dan pơyua tus jơh ală làng bol, oh mi mờ cau ling tàm gùt lơgar mpồl bơtiàn cau Việt Nam he tàm lơgar ndai ală nùs nhơm đềt mềr, jơnau còp să jơh nùs ngan mờ jơnau nting bơr gờm chờ sơnam pa niam bơnĕ ngan rlau jơh. Añ kung dan pơyua tus gơ̆p bơyô làm gùt ù tiah tàm dunia, làng bol ală lơgar tàm dunia jơnau nting bơr kơ̆p kờñ ring lơngai, lơh bơyô bal, lơh broă bal mờ sơlơ bơtàu tơnguh!

            Nam Ñâm Zần 2022 pa lòt gan bal mờ bềng lơm ală broă pal kah ngan- dùl nam geh uă kal ke, bơta lòng dờng, nisơna gơlik tus, gơrềng ờ niam, uă bơta mờ gơrềng kơn kơ̆ kơn jŭt ngan ờ mìng gơwèt mờ lơgar he mờ gam gơwèt mờ jơh gùt dunia in tai. Tàm jơnau ờ niam ngan hơ̆, jơh gùt Đảng, gùt làng bol, gùt ling klàng he neh đòm jăt nùs nhơm kờñ gơboh dà lơgar jơh nùs, bồ tơngoh kơ̆p kờñ jơh nùs lơh ngan, bơta kơ̆ nùs, tam klăc bal, ngăc ngar, bơceh pa, lơh ngan pơđơl pràn lơh geh uă cồng nha kwơmàng ngan, tơl làm ngan, mờ uă tềl kah pơnrơ ngan: Tơrgùm rơcăng, sơndră, gròi sền kòp bơtờp mơkung chồl tơnguh bơtàu tơnguh wơl mờ bơtàu tơnguh lơh sa- mpồl bơtiàn, bơ̆t bơtàu rài lơh sa krơi is, rơcăng is gơ jăt bal mờ rơcăng lài, jơh nùs mŭt gơrờm bal mờ dunia tơl làm, jrô ơnàng mờ geh cồng nha; cíñ trị mpồl bơtiàn kơ̆ kơl jăp; sền gàr dà lơgar, lơngăp lơngai geh gàr niam; sền gàr tiah ơm kis ring lơngai, kơ̆ kơl jăp nàng bơtàu tơnguh dà lơgar; lơh kơ̆ kơl jăp wơl mờ tơnguh uă bơta pin dờn bơh làng bol dê gơwèt mờ Đảng, Dà lơgar mờ rài xã hội củ nghĩa, lời wơl ală jơnau kah niam bơnĕ ngan, geh làng bol mờ gơ̆p bơyô dunia cih dờp, jờng rơ ngan, ai tai bol he in uă jơnau bơsram kwơ. Ala măt kwang bàng đơng lam bồ Đảng mờ Dà lơgar, añ jơh nùs jờng rơ, gờm chờ, pơn jờng mờ ki ngàm nùs nhơm làng bol, oh mi mờ cau ling tàm gùt lơgar dê bè ală cồng nha, broă lơh geh mờ tă pơgồp dờng ngan tàm nam do òr.

            Mŭt tàm sơnam pa Qúy Mão 2023, là nam dơ̆ pe, nam nggùl tơngai lơh broă, geh gơtha kwơmàng ngan tàm broă lơh jăt Kơrnoăt Pơrjum dờng gùt lơgar dơ̆ XIII bơh Đảng dê mờ broă rơndăp lơh bơtàu tơnguh lơh sa- mpồl bơtiàn 5 nam bơh nam 2021- 2025. Mờ bơta kơ̆p kờñ ngan mờ bơta jơh nùs lơh ngan brồ guh bơtàu tơnguh dà lơgar ngai sơlơ pas sơm pràn kơldang, tiơng pơnrơ, chờ hờp, jơh gùt Đảng, gùt làng bol, gùt ling klàng he pal pơn jăt tai đòm jăt nùs nhơm kờñ gơboh dà lơgar, bơhiàn tam klăc bal ring bal, sơrlèt gan jơh ală kal ke, bơta lòng, lơh pràn tơl ală bơta mờ dùl ròt bal rlau tai broă lơh tam gơl pa; bơ̆t bơtàu mờ sền gàr kơ̆ kơl jăp Dà lơgar; gàr kơ̆ tiah ơm kis ring lơngai, kơ̆ kơl jăp, lơh jăt geh cồng nha ală jơnau kờñ, kơnòl broă neh ai tơlik, lơh geh bơnàng jă mờ bơta gơn kơnờm chồl tơnguh dà lơgar bơtàu tơnguh mhar mờ kơ̆ kơl jăp tàm ală nam pơn jăt tai, pơgồp bơnah bơ̆t bơtàu dà lơgar kờñ gơboh bơh bol he dê ngai sơlơ bơtàu tơnguh, dờng pràn pas sơm, ngai sơlơ niam bơnĕ rlau, dờng niam rlau.

            Tàm nùs nhơm chờ hờp wă rò sơnam pa Qúy Mão, dùl dơ̆ tai, añ dan nting bơr kơ̆p kờñ jơh tơl nă làng bol, oh mi, tơl hìu bơnhă, tơl nă làng bol Việt Nam mŭt tàm sơnam pa geh uă bơta pràn kơldang, bơta chờ hờp, lơngai lơngò mờ geh cồng nha.

            Gờm chờ sơnam pa, jơh nùs lơh ngan pa, nùs nhơm pa, gơguh jak pa, uă cồng nha pa. Jơh ală hìu chờ hờp, jơh tơl nă cau chờ hờp chờ hờñ!

            Dan ơm ngăc!