VOV4.K’ho- Tài ờ geh lơh niam sùm, bal mờ gơtìp trồ mìu dà kŏ dà cò lơh aniai den tàng uă gơl gùng tàm tiah kơh bơnơm càr Kon Tum tŭ do gơbàn ờ diơng kơn jơ̆ ngan. Bal mờ bơta digơlan gơlik geh rềs àr gùng lòt, dilah ờ geh lơh niam gờñ, jơnau pơhìn gơlik geh tơrlah ù, ƀòn làng bol ơm kis gơtìp tam cah is tàm kàl mìu dà kŏ dà cò nam do là bơta ờ gơtùi pleh.  

Bơh thôn Đăk Ga tus tiah tờm xã nhàr lơgar Đăk Nhoong, kơnhoàl Đăk Glei mìng mờr 3 kơi sồ. Lài do, gơl gùng do kung neh geh tuh bê tông mơya tài ờ geh lơh niam den tàng tŭ do mat gùng neh gơ plồ, ờ diơng jơh tơn. Neh bè hơ̆, tài ù tiah ờ niam den tàng jat kềng 2 gah gùng geh uă anih tơrlah, jơh bal đah ta luy hơđang mờ ta luy hờ đơm.

Dùl anih tơrlah ta luy hờ đơm tàm xã Đăk Nhoong lòt tiah tờm kơnhoàl Đăk Glei

Bi A Cu, atbồ thôn Đăk Ga pà git, broă lòt rê bơh 108 hìu bơnhă làng bol ƀòn Đăk Ga dê sùm pal kong mờ bơta ngòt rơngơt: “Gơl gùng lòt bơh thôn Đăk Ga tus xã Đăk Nhoong kal ke ngan tàm kàl mìu sùm gơtìp tơrlah. Ngòt rơngơt ngan, ngan là ală oh dềt lòt bơsram, tơrlah ù ngòt rơngơt ngan”. Gơl gùng kơnhoàl ĐH83 jòng mờr 12 kơi sồ bơh xã tiah nhàr dà logar Đăk Nhoong lòt tiah tờm kơnhoàl Đăk Glei kung tàm bơta bè do sơl. Lài do, gơl gùng do geh lă cài, mơya tài uă nam ờ geh lơh niam den tàng mat gùng geh uă gơl gơbàn kơrluk dờng ngan. Ngòt rơngơt rlau là uă anih tàm gơl gùng do gơtìp tơrlah đah la tuy hờ đơm. Ală anih tơrlah gam ngai sơlơ gơ rề tus hờ đah mat gùng, ai đah hờ đơm là tiah thòng jrô ngan. Ồng A Nang, Phó Ƀí thư Đảng ủy, Củ tịc Hội đồng Ñân zân xã Đăk Nhoong pà git, jơh bal gơnoar atbồ mờ làng bol ndrờm kơlôi rơcang rơngòt gơlik geh rềs àr gùng lòt mờ digơlan xã gơtìp kòl gùng, gơtìp tam cah is tŭ kàl mìu tus: “Dilah trồ mìu sơr 2, 3 dơ̆ den jơh bal gùng ta luy hờ đơm mờ ta luy hơđăng gơtìp koh gơl jơh. Uă ngan anih, ờ di mìng là 1, 2 anih. Đah ta luy hờ đơm tơrlah mờr jơh tơn. Bol hi mìng đơs lài ing mờ broă yồng ƀàng cih jơnau yal tơnggit, ală băng rôn nàng làng bol in pleh ờ gơ di lòt tàm ală tiah tơrlah hơ̆. Jŏ jòng den pal lơh niam nđờ anih do, ngan là ta luy hờ đơm”.

Tơrlah ngai sơlơ gơ rề tàm mat gùng

Kơnhoàl tiah nhàr dà lơgar Đăk Glei, càr Kon Tum tŭ do geh 70 kơi sồ gùng kơnhoàl, 51 kơi sồ gùng thôn, ƀòn, lòt tàm tiah lơh sa mờ gùng lòt tàm ƀlàng sre. Bơdìh mờ gơl gùng kơnhoàl ĐH84 pa geh bơcri priă lơh niam den jơh ală gơl gùng gam wơl ndrờm neh gơbàn ờ diơng kơn jơ̆ ngan. Jơnau là tài bơh gùng geh bơcri priă lơh neh jŏ, ờ geh lơh niam sùm, bal mờ gơtìp mìu dà kŏ dà cò lơh aniai lơh gơbàn tơrlah ù, lơh broă lòt rê, ngan là broă pơndiang phan lơh gơs bơh suơn sre làng bol dê gơtìp uă kal ke. Kàl mìu nam do uă xã bơh kơnhoàl Đăk Glei dê bè: Đăk Nhoong, Đăk Blô, Mường Hoong, Ngọc Linh.. ndrờm gam ơm tềng đap jơnau pơhìn gơlik geh kòl gùng mờ ƀòn làng bol ơm kis gơtìp koh gơl, tam cah is.

Jat cơldŭ lơh sa mờ phan bơna kơnhoàl Đăk Glei, càr Kon Tum đơs, tềng đap mat, Cơldŭ do geh sền sơ wì ring priă geh tam pà nàng lơh niam dềt, lơh niam ing ală anih ờ diơng tàm ală gơl gùng bơh kơnhoàl atbồ nàng gàr niam broă lòt rê mờ ờdo ờdă gùng lòt  lài mờ tŭ, tàm tŭ mờ tơnơ̆ kàl mìu càl rbut. Bè jŏ jòng, cơldŭ geh gờñ lơh niam wơl ală gơl gùng tờm tàm kơnhoàl.

Cau mblàng K’Duẩn