Kàl prang bồ sơnam pa neh rê tus mờ jơh tơl nă cau, jơh ală hìu! Tàm tŭ jiơ tàm jàu sơnam niam bơnĕ mờ dờng màng ngan king crŭ ngan bơh trồ tiah ù tiah dê, bol he dồ nùs bal jơh nùs kun bồ kah rơngal wơl dà kơlhề mò pàng, ală rơnàng bèp bi neh gĭt nđờ rài do crơng gơs bơ̆t bơtàu gơs să bồ ù tiah dà ia, ai bồ sơnam pa lơngăp lơngai is, ai làng bol in geh kis tàm rài kis khăt gơboh, hờm ram, chờ hờp chờ hờñ, ai broă lơh, bơta pràn, bơngă mờ bơta pin dờn dà lơgar ngai do in.

Tàm nùs nhơm ram mhŭ, dờng màng king crŭ ngan wă rò sa tềp bơhiàn yau jơi bơtiàn dê, ala măt Kwang bàng đơng lam bồ Đảng, Dà lơgar, añ dan jơh nùs pơyua tus làng bol, oh mi mờ cau ling tàm jơh gùt lơgar in, làng bol he tàm lơgar ndai ală nùs nhơm đềt mềr, jơnau còp să jơh nùs mờ jơnau nting bơr gờm chờ sơnam pa niam bơnĕ ngan rlau jơh. Dan pơyua tus gơ̆p bơyô làm gùt plai ù, làng bol ală lơgar tàm dunia in jơnau nting bơr kơ̆p kờñ ring lơngai, lơh broă bal, lơh bơyô bal mờ bơtàu tơnguh kơ̆ kơl jăp!

Nam lài, bal mờ bơta tam klăc bal, pơnđơl pràn bơh jơh gùt Đảng, gùt làng bol, gùt ling klàng dê, dà lơgar he neh đơs nền bơngă pin dờn pa, gơnoar broă pa bơh dồ lơgar Việt Nam khin cha kơ̆ nùs tàm tŭ bòl glar kal ke, sùm kơ̆ nùs ting jăt ală bơta kwơ niam bơnĕ, tài bơh bơta kwơ bơh Làng bol dê, lơh geh ală cồng nha lơh geh kwơmàng, tơl làm tàm jơh ală gah broă bal mờ ală tềl lời wơl pơnrơ ngan; sùm là bơyô song dơ pă jơh nùs, cau lơh broă bal pin dờn bơh ală lơgar dê, geh mpồl bơtiàn dunia sền dờng màng mờ jờng rơ ngan.

Mang tàm jàu sơnam là tŭ jiơ ngoh rơngăc ngan nàng bol he in kơlôi wơl kah wơl bè ală bơta neh lòt gan, kơlôi bè rài tơnơ̆ do àng sơrdah bơh tơl nă cau, tơl hìu bơnhă mờ bơh jơi bơtiàn dê mờ ală bơta kwơ niam bơnĕ bơh niam chài, kòn bơnus Việt Nam dê, yờ tơnguh nùs nhơm niam, bồ tơngoh jak mờ pờ tơlik bơta pràn bơceh lơh tàm tơl nă cau dê, ngui jơh ală jơnau tơl pràn, ai tơl ală bơta pràn, rơ̆p lơh gơlik geh bơta pràn kis bơh tàm dơlam is dờng ngan, nàng jơi bơtiàn he in kơ̆ kơl jăp cơnđoà guh lơh geh uă cồng nha dờng rlau tai.        

Kàl prang bồ sơnam pa pờ tơlik gĭt nđờ bơta kơ̆p kờñ, kơ̆p kơnờm mờ ală bơta sơnđờm niam bơnĕ ngan rlau jơh, ram mhŭ ngan rlau jơh, bềng pràn kis ngan rlau jơh. Tàm nùs nhơm kàl prang bồ sơnam pa bơh ù tiah trồ tiah dê mờ sơnam pa bơh tàm nùs nhơm kòn bơnus dê bơtòm tơrgùm bal, tam klăc bal, bol he bal mờ gơ̆p dờp rò tĕ ală bơta pràn pa, lời ai gơ̆p in ală bơta kơ̆p kờñ jơh nùs, niam bơnĕ, kơ̆p kờñ bal ai jơi bơtiàn in gam sùm, ai dà lơgar in ngai sơlơ pas sơm niam bơnĕ, jak chài, ai rài kis làng bol in ngai sơlơ hờm ram, chờ hờp chờ hờñ!

Nting bơr gờm chờ làng bol, oh mi, tơl hìu bơnhă, tơl nă làng bol Việt Nam să jan pràn kơldang, lơngăp lơngai, lơh broă geh cồng nha mờ chờ hờp chờ hờñ!

Nam pa, nùs nhơm pa, lơh ngan jơh nùs pa, cồng nha pa!

Dan ơm ngăc!