Mpồl Duh broă Đảng Kộng sản Dà lơgar Việt Nam, Quôk hội lơgar Kộng hoà Xã hội Củ nghĩa Việt Nam, Củ tịc lơgar Kộng hoà Xã hội Củ nghĩa Việt Nam, Cíñ phủ lơgar Kộng hoà Xã hội Củ nghĩa Việt Nam, Anih duh broă Mặt trận dà lơgar Việt Nam, Mpồl Bơyai lơh dơ̆ ies tơ̆p ƀồc Dà lơgar mờ hìu bơnhă ƀồc ồng Nguyễn Phú Trọng, Tổng Ƀí thư Mpồl Duh broă Đảng Kộng sản dà lơgar Việt Nam jơh nùs ưn ngài jơh gùt làng bol, oh mi, cau ling tàm jơh gùt lơgar, làng bol he tàm lơgar ndai mờ gơ̆p bơyô ală lơgar neh lời ală nùs nhơm jrô ơnàng ngan, bơta kah sơnđàc pơlai soh ngan gĭt lơh mờ bơta ki ngàm uă ngan gơ wèt mờ ƀồc Tổng Ƀí thư ồng Nguyễn Phú Trọng; neh tus còp ies, pơyua sră, jơnau tam pà muăt jrùm, tus bal Dơ̆ pơrjum kah pơlai, jun tơngăc tơ̆p ƀồc ồng Nguyễn Phú Trọng, Tổng Ƀí thư Mpồl Duh broă Đảng Kộng sản dà lơgar Việt Nam rê mờ jơnau kah yau khin cha jak chài ngan bơh jơi bơtiàn rbô nam bơ̆t bơtàu, bơtàu tơnguh mờ khin cha jak chài.

Tàm ală ngai do, gĭt nđờ tơlak plai nùs Việt Nam mờ gơ̆p bơyô ală lơgar kah tus hờ Hà Nội, ƀòn dờng Hồ Chí Minh mờ ƀòn tờm xã Đông Hội, tiah bơyai lơh Dơ̆ Dà lơgar ies tơ̆p ƀồc ồng Nguyễn Phú Trọng, Tổng Ƀí thư Mpồl Duh broă Đảng Kộng sản dà lơgar Việt Nam; gĭt nđờ rhiang rbô nă làng bol tàm làm bă tiah tàm gùt Dà lơgar ờ ngòt gùng ngài, ờ ngòt trồ tơngai halà trồ mìu kun bồ jơh nùs ki ngàm tàm jơh gùt gơl gùng lòt tơ̆p ƀồc Tổng Ƀí thư ồng Nguyễn Phú Trọng rê tàm tiah ơm rlô dŭt ndơl. Neh geh gĭt nđờ rhiang nă kwang đơng lam bồ ală lơgar, kơnhoàl ù tiah pơyua sră, pơyua jơnau, bơta tam pà bal muăt jrùm; gĭt nđờ rhiang mpồl ală lơgar tus bal Dơ̆ ies, Dơ̆ pơrjum kah pơlai mờ tơ̆p; gĭt nđờ rbô mpồl bal mờ gĭt nđờ rhiang rbô nă làng bol tus ies ƀồc Tổng Ƀí thư; gĭt nđờ rbô mpồl ies tàm ală anih lơh broă ala măt lơgar he tàm lơgar ndai.

Dồ dơ̆ tai, Mpồl Bơyai lơh ies tơ̆p ƀồc Dà lơgar mờ hìu bơnhă ki ngàm ưn ngài nùs nhơm is ồn ngan bơh làng bol, oh mi, cau ling gùt lơgar, làng bol he tàm lơgar bơdìh mờ gơ̆p bơyô ală lơgar gơ wèt mờ ồng Nguyễn Phú Trọng, Tổng Ƀí thư Mpồl Duh broă Đảng Kộng sản dà lơgar Việt Nam mờ dà lơgar, kòn bơnus Việt Nam rbô nam bơ̆t bơtàu mờ khin cha jak chài.

MPỒL DUH BROĂ ĐẢNG KỘNG SẢN DÀ LƠGAR VIỆT NAM

QUÔK HỘI LƠGAR KỘNG HOÀ XÃ HỘI CỦ NGHĨA VIỆT NAM

CỦ TỊC LƠGAR KỘNG HOÀ XÃ HỘI CỦ NGHĨA VIỆT NAM

CÍÑ PHỦ LƠGAR KỘNG HOÀ XÃ HỘI CỦ NGHĨA VIỆT NAM

ANIH DUH BROĂ MẶT TRẬN DÀ LƠGAR VIỆT NAM