Tơngai do, jăt jơnau kờñ bơh Mpồl duh broă sền gàr bơta pràn kơl dang să jan kwang bàng Dà lơgar yal, Tổng Ƀí thư ồng Nguyễn Phú Trọng đơng lam broă lơh mờ sơm kòp, sền gàr bơta pràn kơl dang să jan ndang. Ƀộ Cíñ trị, Ƀan Ƀí thư, ală kwang đơng lam tờm mờ kwang Duh broă sùm Ƀan Ƀí thư neh sồr ală anih lơh broă tờm tơrgùm ală giáo sư, ƀák sĩ, cau lơh sơnơm, cau jăk geh pơnrơ ngan gah lơh sơnơm mờ ală broă lơh ƀuơn ngan nàng sơm kòp, sền gàr bơta pràn kơl dang să jan ai Tổng Ƀí thư in.

Tus tŭ do, tài jơnau kờñ pal pơn jăt tai ai lài tơngai nàng Tổng Ƀí thư in tơrgùm sơm kòp mờ nàng gàr niam broă đơng lam bal bơh Mpồl duh broă Đảng Dà lơgar, Ƀộ Cíñ trị, Ƀan Ƀí thư jăt tàm Jơnau pal jăt  lơh broă bơh Mpồl duh broă Đảng dà lơgar, Ƀộ Cíñ trị mờ Ƀan Ƀí thư khoă XIII dê, tềng đăp măt Ƀộ Cíñ trị jào ồng Tô Lâm, Kwang geh jơng tàm Ƀộ Cíñ trị, Củ tịc lơgar đơng lam broă lơh bơh Mpồl duh broă Đảng Dà lơgar, Ƀộ Cíñ trị, Ƀan Ƀí thư dê jăt kơnòl broă, gơnoar broă geh Ƀộ Cíñ trị ai. Ƀộ Cíñ trị hòi jà gùt Đảng, gùt làng bol mờ gùt ling klàng pin dờn song ngan tàm broă đơng lam bơh Đảng, atbồ bơh Dà lơgar, tơnguh broă tam klăc bal, ring bal, dùl nùs bal, pơn jăt tai đòm jăt ală cồng nha, broă lơh geh kwơ màng, tơl ală bơta mờ dà lơgar he neh lơh geh, lơh ngan sơrlèt mờ ală kal ke, bơta lòng, lơh gơs niam ală jơnau kờñ Pơrjum Dờng Đảng gùt lơgar dơ̆ XIII neh ai; gàr kơl jăp lơngăp lơngai cíñ trị, sền gàr kơl jăp bơta khăt gơboh is, gơnoar tờm ù tiah mờ bơta lơngăp lơngai dà lơgar, mpồl bơtiàn, lơh pràn broă bơtàu tơnguh lơh sa mpồl bơtiàn, sền gàr niam rài kis nùs nhơm, phan bơna ai Làng bol in.