Là dùl tàm 5 gùng dà broă lơh tam lơh tàm broă tơngklàs Sài Gòn, Quân đoàn 3 mờ kơnòl broă sơgràm Ƀlàng rơndeh par Tân Sơn Nhất mờ Ƀộ Tổng tham mưu- tiah tờm ngan đơng lam bơh bol sò tơm dê. Neh sơgràm geh ală jơnau kờñ kwơ màng do di tàm ngai 30/04 kah yau, Quân đoàn neh geh ală broă lơh tam lơh ling klàng bềng bơta bơceh lơh, sơr băc mhar mờ kràñ cê jơh nùs.

Trung tướng ồng Nguyễn Quốc Thước, tŭ hơ̆ at gơnoar broă kwang atbồ pơlam broă ling klàng Quân đoàn 3, cau tus bal tơn lam bồ dùl mpồl tam lơh mut tàm Sài Gòn neh đơs bè ală kir sơnrai ờ gơtùi hŭi ngan tàm ngai tơngklàs dê.

Trung tướng ồng Nguyễn Quốc Thước, đơs:“Ƀlàng rơndeh par Tân Sơn Nhất mờ Ƀộ Tổng Tham mưu neh geh tơngklàs jơh tàm tŭ 11 jiơ nggùl klo ngai. Bè hơ̆, bơh tŭ 11 jiơ tus 11 jiơ nguùl klo ngai jơh 5 mpồl tam lơh mut tàm Sài Gon ndrờm geh tơngklàs dùl dơ̆ bal. Bơta ngoh rơngăc dờng ngan rlau jơh, tơnơ̆ tŭ ai geh Gơlăng Độc Lập, tơngklàs jơh den tŭ hơ̆ rê wơl tàm nùs nhơm bol añ dê pơn yờ să ngan, mơya geh dùl bơta, hơ̆ là ờ geh Wa Hồ. Tŭ bol añ jơh nùs lơh ngan tam lơh ai geh pha lin mờ bol sò tơm lơgar Mỹ, Wa Hồ neh kòp kơn jơ̆ ngan, Wa đơs là: ală wa pơnđơl pràn lơh ngan tơngklàs mhar ngan Sài Gòn nàng Wa in geh lòt còp làng bòl tiah đah Jum Dà lơgar pròc mhàm bal... Drim ngai tơnơ̆ tàm Anih jơnau đơs Việt Nam pờ jơnau đơs geh cih bơh ồng Phạm Tuyên dê cih “Bè geh Wa Hồ tàm ngai chờ tam lơh pha lin dờng”, tŭ hơ̆ bol añ hơ̆ sồng ngan ngồn hừh nùs ngan, Wa Hồ mut tàm do rau, làng bol tiah đah Tô Dà lơgar bơh cau cih jơnau neh wă Wa Hồ mut bal mờ bol añ rau, den tàng tŭ hơ̆ gơ lơh tàm nùs nhơm bol hi dê lơngăp lơngai ngan”.

Mờr 50 nam neh rơlao bơh ngai tơngklàs tiah đah jum dà lơgar tơrgùm bal, mơya jơnau kah sùm ngai mpồl ling tơngklàs mŭt tơngklàs Sài Gòn kung gam pa ngan tàm nùs nhơm bơh ală cau geh sền gŏ tơn dê. Pơn iờ să tàm mpồl cau lơh ƀăo lơgar Việt Nam dê sơnrờp ngan gŏ măt tàm Gơlang Độc Lập di tàm ngai 30 nhai 4 nam 1975, cau lơh ƀăo tàm tiah tam lơh Trần Mai Hưởng, Kwang atbồ dờng lài do Thông tấn xã Việt Nam dê neh kŭp wơl pang rùp pha lin mờ tơngume: “Rơndeh sơtang ling tơngklàs mŭt tàm Gơlang Độc Lập ngai 30 nhai 4 nam 1975” mờ uă jơnau cih bè ngai tơnklàs rài lài do.

Cau lơh ƀăo Trần Mai Hưởng pà git, tŭ rơndeh com măng ca pơn diang mpồl cau lơh ƀăo mŭt rềp ƀòn dờng, tŭ do ală gar phào rah bơh ling sò tơm dê kung gam geh sùm, rơndeh pơn diang mpồl cau lơh ƀăo pal sùm lòt jăt rềp mờ rơndeh sơtang nàng pleh di gar phào. Mơya tŭ neh mŭt tus tàm ƀòn dờng là dùl bơta sền gŏ krơi is, làng bol chờ hờp lik tàm gùng chờ gờm mpồl ling tơngklàs. Cau lơh ƀăo Trần Mai Hưởng yal wơl:“Làng bol chờ hờp ngan, pà phan mờ cèng dà hùc ai ală oh mi in. dùl nă kòn klao dềt pơgăp tàm bơh 13 tus 14 sơnam hào đì tàm rơndeh bơh cau lơh ƀăo dê, kòn klao dềt do ntào rềp tềng gah rơndeh mờ đơs dờng ngan là: neh tơngklàs bloh, neh tơnklàs bloh. Gam làng bol ntào jăt gah bàr đah gùng koar cau ling, at tê ñŏ mờ đơs crih. Đơs crih ală jơnau bè jơnau đơs crih Rê tus Hà Nội bơh cau chài bơceh Văn Cao dê den geh jơnau: “Ur ur cau ling lòt bè dà, rà rà cau ling tus”. Jơnau đơs crih do di ngan mờ tŭ hơ̆. Ală cau đơs jơnau đơs crih do mờ nùs nhơm chờ hờp ngan, ală cau gam sơnđio gùng bol añ in lòt tus tai”.