Mpồl Duh broă Đảng Kộng sản Dà lơgar Việt Nam, Quôk hội lơgar Kộng hoà Xã hội Củ nghĩa Việt Nam, Củ tịc lơgar Kộng hoà Xã hội Củ nghĩa Việt Nam, Cíñ phủ lơgar Kộng hoà Xã hội Củ nghĩa Việt Nam, Anih duh broă Mặt trận dà lơgar Việt Nam mờ hìu bơnhă kah kờñ ngan gĭt lơh dan yal:

Ồng Nguyễn Phú Trọng, Tổng Ƀí thư Mpồl Duh broă Đảng Dà lơgar, Ƀí thư Quân ủy Dà lơgar, deh ngai 14 nhai 04 nam 1944; ƀòn tờm: xã Đông Hội, kơnhoàl Đông Anh, ƀòn dờng Hà Nội. Ơm kis sùm tàm hìu sồ 5, gùng Thiền Quang, sơnah ƀòn Nguyễn Du, quận Hai Bà Trưng, ƀòn dờng Hà Nội.

Tus bal lơh broă bơh nam 1967; mŭt Đảng Kộng sản Việt Nam ngai 19 nhai 12 nam 1967. Kwang bàng Mpồl Duh broă Đảng Dà lơgar ală khoă: VII, VIII, IX, X, XI, XII, XIII; Kwang bàng Ƀộ Cíñ trị ală khoă: VIII, IX, X, XI, XII, XIII; lơh broă Duh broă sùm Ƀộ Cíñ trị khoă VIII; Củ tịc Quôk hội lơgar Kộng hoà Xã hội Củ nghĩa Việt Nam khoă XI, XII; Tổng Ƀí thư Mpồl Duh broă Đảng Kộng sản dà lơgar Việt Nam ală khoă: XI, XII, mờ XIII; Củ tịc lơgar Kộng hoà Xã hội Củ nghĩa Việt Nam tơngai lơh broă bơh nam 2016- 2021, Củ tịc Mpồl Duh broă Ling klàng mờ Kwang àng; Ƀí thư Quân ủy Dà lơgar; Kwang bàng Mpồl Lơh broă sùm Đảng ủy Kwang àng Dà lơgar; Kwang ătbồ Mpồl sồr lơh Dà lơgar bè rơcăng lài tam dră sa kwề sa kwà, bơta ờ niam. Cau ala măt Quôk hội ală khoă: XI, XII, XIII, XIV, mờ XV.

Tơnơ̆ dồ tŭ tơngai gơbàn kòp kơn jơ̆, bulah neh geh Đảng, Dà lơgar, jơh ală mpồl cau giáo sư, cau ƀak sĩ jak chài gah lơh sơnơm dê jơh nùs dong kờl sơm kòp, hìu bơnhă jơh nùs sền gàr trăng gàr, mơya tài bơh sơnam dờng, kòp jroă, Ồng neh sang rài tàm tŭ 1 jiơ 38 phuk ngai 19 nhai 07 nam 2024 (hơ̆ là ngai 14 nhai 06 nam Giáp Thìn), tàm Hìu sơnơm Dà lơgar Ling klàng 108, ƀòn dờng Hà Nội, kis jŏ 80 sơnam.

Mờr 60 nam lơh broă, Ồng neh geh uă dà kơlhề dờng ngan, is ồng jak chài ngan gơ wèt mờ broă lơh kăc màng gơklŏ gơcrà ngan bơh Đảng mờ jơi bơtiàn dê. Ồng geh Đảng, Dà lơgar pà jờng Gai lòng Sơmañ rơmĭt, Gai lòng Đảng 55 sơnam Đảng mờ uă Gai lòng, Griăt dờng màng kwơmàng ndai bơh Việt Nam mờ ală lơgar dê.

Ồng roh tĕ là dồ bơta hoàc hươr dờng ngan gơ wèt mờ Đảng, Dà lơgar, Làng bol he mờ hìu bơnhă ồng. Nàng tơnggŏ nùs nhơm kah kờñ pơlai soh ngan mờ kah kơlôi Tổng Ƀí thư ồng Nguyễn Phú Trọng, Mpồl Duh broă Đảng Kộng sản Dà lơgar Việt Nam, Quôk hội lơgar Kộng hoà Xã hội Củ nghĩa Việt Nam, Củ tịc lơgar Kộng hoà Xã hội Củ nghĩa Việt Nam, Cíñ phủ lơgar Kộng hoà Xã hội Củ nghĩa Việt Nam, Anih duh broă Mặt trận Dà lơgar Việt Nam lơh nền lam lơh dơ̆ ies tơ̆p ƀồc Tổng Ƀí thư ồng Nguyễn Phú Trọng jăt broă lơh Dà lơgar ies tơ̆p ƀồc.

Mpồl Duh broă Đảng Kộng sản Dà lơgar Việt Nam

Quôk hội lơgar Kộng hoà Xã hội Củ nghĩa Việt Nam

Củ tịc lơgar Kộng hoà Xã hội Củ nghĩa Việt Nam

Anih duh broă Mặt trận Dà lơgar Việt Nam