VOV4.K’ho- Mang ngai 21/03, tàm Hà Nội, Đoàn ơruh pơnu kộng sản Hồ Chí Minh dà lơgar, Mpồl Tam klăc ơruh pơnu Việt Nam, Mpồl Cau lơh sơnơm kơnòm să Việt Nam pơgồp bal mờ Ƀộ Y tế geh bơyai lơh dơ̆ jờng rơ 10 nă Cau lơh sơnơm kơnòm să Việt Nam pơnrơ jak mờ tơngume “Cau lơh sơnơm kơnòm să tàm tiah rơcăng sơndră kòp Kovid-19”. Ală cau lơh sơnơm geh jờng rơ muh mat nam do là 10 nă cau lơh sơnơm ờ rlau 40 sơnam, jơh nùs ngan mờ broă lơh sơnơm, jơh nùs ngan mờ cau kòp, geh broă lơh jak, geh nùs nhơm lơh sơnơm niam mờ geh cồng nha tàm broă lơh rơcăng sơndră kòp, sền gàr mờ sơm kòp ai cau kòp in.

Kwơmàng là tàm broă lơh dong kờl is tài pràn kơldang să jan mpồl bơtiàn, bè: lơh broă niam dong kờl is, kham sơm kòp ai cau rƀah in. Do là ală cau lơh sơnơm kơnòm să pơnrơ lam lài khin kơlôi, khin lơh, ờ ngòt bòl glar kal ke, phi să nàng tus bal lơh broă, dong kờl ală hìu sơnơm, anih lơh sơnơm tàm tiah sar lơgar ngài, tiah kal ke uă ir halà tàm ală gah broă lơh krơi is gơrềng tus broă lơh rơcăng sơndră kòp Kovid-19 tơngai bơh nam 2020- 2021.

Cau mblàng Lơ Mu K’Yến