Tàm dơ̆ bơyai lơh, ală kwang bàng neh kah wơl gùng lòt 93 nam pơn rơ ngan bơh Đoàn Ơruh pơnu Kộng sản Hồ Chí Minh mờ rơnàng kơnòm să Việt Nam, dan jơh nùs dòn song ngan mờ Dà lơgar, mờ Đảng, pin dờn tàm bơta đơng lam bơh Đảng dê. Tơnguh uă nùs nhơm kờñ gơboh Dà lơgar, kơ̆p kờñ kơnờm is pơnđơl pràn is, pơn yờ să jơi bơtiàn, nùs nhơm dong kờl is tài rài kis mpồl bơtiàn, rcang lơh jat lài, rcang dờp ală broă pa, broă kal ke.

Di dơ̆ do, Đoàn Dà lơgar neh jàu Khà jờng Lý Tự Trọng nam 2024 ai 100 nă kwang bàng đoàn jak ngan gùt lơgar in. Lài hơ̆, mpồl kwang bàng, mpồl pơn rơ jak tus broă lơh “Tơngkah kir sơnrai 93 nam Ngai tơlik Đoàn Ơruh pơnu Kộng sản Hồ Chí Minh mờ jàu khà jờng Lý Tự Trọng nam 2024” neh tus chu ñàng, pơdơng bơkào tàm tiah tềl lời wơl lài do bơh Tổng Ƀí thư ồng Trần Phú dê, Tiah kah kơlôi cau ling khin cha jak chài Cau ling chơ̆t màng Lý Tự Trọng, Tiah tềl lời wơl Ngã Ba Đồng Lộc.