VOV4.K’ho- 43 nă kơnòm bơsram, cau bơsram dờng rƀah bơsram jak “Tàm broă lơh dong kờl oh tus hờ hìu bơsram mờ kòn ròng pôs đồng ling sền gàr tiah nhàr lơgar” tàm Dăk Lăk geh jờng rơ tàm drim ngai 12/08, tàm xã tiah nhàr lơgar Krông Na, kơnhoàl Buôn Đôn, càr Dăk Lăk. Bal mờ broă jờng rơ, ală kơnòm bơsram gam geh dờp phan pà bè: priă mat, rơndeh coh, sră cih, sră măy, ào mpha pa mờ phan ngui bơsram sră.

Kwang đơng lam bồ Mpồl ling sền gàr tiah nhàr lơgar Dăk Lăk mờ cau geh nùs nhơm niam jàu pà rơndeh coh ai ală kơnòm bơsram rƀah tàm tiah nhàr lơgar in

Càr Dăk Lăk geh mờr 73 kơi sồ gùng tiah nhàr lơgar rềp nhàr bal mờ càr Muldunkiri, lơgar Campuchia dê. Tàm do geh 4 xã tiah nhàr lơgar là Ea Bung, Ya Lốp, Ia R’vê gơwèt kơnhoàl Ea Súp mờ Krông Na kơnhoàl Ƀuôn Đôn, ndrờm là ală xã geh khà hìu bơnhă rƀah uă. Tam pà bal bơta kal ke bơh làng bol tiah nhàr lơgar dê, mpồl ling sền gàr tiah nhàr lơgar càr Dăk Lăk sùm sền gròi broă lơh sền gàr rài kis mpồl bơtiàn, mờ ală broă lơh geh ngan. “Broă lơh dong kờl oh tus hờ hìu bơsram mờ kòn ròng pôs đồng ling sền gàr tiah nhàr lơgar” tàm Dăk Lăk neh lơh geh tŭ niam ai gĭt nđờ rơhiang nă kơnòm bơsram rƀah in geh tus hờ hìu bơsram, pơn jat tai bơsram guh hơđang.

Cau mblàng K’Hạnh