Tàm 02 ngai (16 mờ 17/05), tàm càr Xiengkhoang, đah tô lơgar Lào geh lơh Dơ̆ jàu, dờp, răc dan ai hwềng suàn cau chơ̆t in mờ jun rê hờ ƀòn lơgar tờm 96 ƀồc ntìng cau ling chơ̆t màng là ling lòt lơh broă dong kờl is mờ cau jak chài lơgar Việt Nam dê chơ̆t phi să tàm pe càr Vientiane, Xaysomboun mờ Xiengkhuang rê mờ ù tiah mè lơgar Việt Nam. Kàl prang nam 2022- 2023, Mpồl lòt jòi tơrgùm, Gah đơng lam Mpồl ling càr Nghệ An neh lam lòt jòi, rồ, tơrgùm geh 96 ƀồc ntìng cau ling chơ̆t màng chơ̆t phi să tàm 3 càr, geh 120% broă rơndăp lơh dê sồr lơh. Dơ̆ pơrjum răc yàng ai hwềng suàn bơh ală cau ling chơ̆t màng là ling lòt lơh broă dong kờl is mờ cau jak lơgar Việt Nam dê in geh lơh dùl bă ki ngàm ngan jăt bơhiàn ờs mờng bơh yau bơh dà lơgar Lào oh mi dê. Jăt broă rơndăp lơh, dơ̆ bơyai lơh tơ̆p ƀồc ntìng 96 nă cau ling chơ̆t màng geh jòi bàn mờ jun rê hờ ƀòn lơgar tờm dơ̆ do rơ̆p geh lơh tàm ngai hìng 19/05 tàm Ƀlàng tơ̆p ƀồc cau ling chơ̆t màng kơnhoàl Nghi Xuân, càr Nghệ An.