Ồng Nguyễn Thiện kis tàm mpồl ƀòn 7 sơnah ƀòn Yên Thịnh, ƀòn dờng Yên Bái nam do neh 90 sơnam, mơya kung gam kah sùm ală nhai ngai pa lòt ling lơh broă tàm gah yal tơngit jơnau, nhai 3 nam 1950, tŭ ồng rơ̆p 16 sơnam. Ồng Thiện pà git, jơnau kah sùm uă ngan tàm broă tus bal tam lơh Điện Biên Phủ là bal mờ ală cau ling tàm mpồl pơnyờ să geh iăt bi Văn (Đại tướng Võ Nguyên Giáp) boh bơr, nting bơto bè broă gàr niam jơnau yal tơngit drơng tàm broă tam lơh, do là dùl kơnòl broă kwơ màng ngan. Ồng Nguyễn Thiện pà git: “Jơh ală cau tàm mpồl geh jà lik tus tàm dùl ƀlàng nàng iăt bi Văn boh bơr. Bi Văn đơs bè bơta bàr dơ̆ tam lơh pa do, mờ tŭ do gam rơcang tus dơ̆ tam lơh dơ̆ pe tai. Bơh bơr bè bơta bàl bè hơ̆, bi sồr mìng is jơnau yal tơngit pal geh sùm, ờ gơtìp koh gơl”.

Tàm bồ tơngoh bơh ồng Thiện dê, mho ngai 07 nhai 5 là dùl tŭ kwơ màng ngan, geh jơnau yal ling lơgar Tây pờ tê, ală cau ling cau lơi kung chờ hờp ngan. Ồng Thiện pà git tai: “Bơh tàm Mpồl đơng lam hòi tus ală mpồl ling in; bi đơng lam tờm bol añ, bi hơ̆ yal tus ală anih in, pal đơs là chờ hờp ngan”.

Ồng Phan Như Lục, deh nam 1931 kung kis tàm sơnah ƀòn Yên Thịnh, ƀòn dờng Yên Bái neh geh tŭ là cau ling kao xạ pháo yal: ală ngai tam lơh glar bòl tàm Điện Biên Phủ hoài phào kơnong mŭt hơ̆ sồng hoài phào kơnong lik, tờ bơtô nàng bic… mơya bồ tơngoh bal mờ nùs nhơm tam lơh bơh ală cau ling uă ngan, tam lơh nàng ling sò tơm ờ geh gùng lòt dong kờl tai lơh gơtìp ờ jai. Ồng Phan Như Lục pà git: “Kơnờm mờ broă geh mblàng yal, bơto bơtê mờ git jơnau bơh ală oh mi cau ling dê, den tŭ hơ̆ mpồl đơng lam sồr pal iăt mờ dờn mơ; pin dờn ngan tàm jơnau đơng lam bơh Đại tướng dê; jơnau sồr lơi kung geh lơh ƀuơn. Ling sò tơm ờ thàn ni sơna mờ gơtìp kơrian gùng dong kờl phan mờ phào dờng, ờ geh cồng nha tàm broă dong kờl mờ gùng rơndeh par den tàng gơtìp ờ tơl ală bơta”.

Jơnau kah wơl bè tam lơh pha lin Điện Biên Phủ gam geh prăp gàr sùm tàm ală phan mờ neh geh gah lơh broă geh gơnoar càr Yên Bái jòi geh, ràng tơlik tềng ƀlàng Bảo tàng, neh lơh geh wơl bơta pràn jăk bơh làng bol ală kòn cau càr Yên Bái dê pơgồp bal mờ gùt lơgar lơh geh dùl tam lơh pha lin Điện Biên Phủ. Ồng Lý Kim Khoa, Phó Kwang atbồ Bảo tàng càr Yên Bái pà git, ală bơta phan geh jòi gŏ uă bơta ngan, bơh phào dờng, phào dềt, ală ào ram, ƀào ơn phe tus mờ ală ƀồng bi pơrlòng bơh ling klàng mờ làng bol càr Yên Bái dê tàm tơngai bơh nam 1952 tus 1954… Tàm hơ̆ geh ală phan kwơ bè bồng bi dềt geh sring jăt che nam 1953 bơh Mpồl đơng lam ling lơh gùng sồ 13 jào pà ai mpồl ơruh pơnu lơh broă lam lài drơng broă lơh tềng gùng koèl kơh Lũng Lô in. Ồng Lý Kim Khoa pà git: “Bồng bi dềt tŭ hơ̆ mìng geh ngui nàng lam sồr ală mpồl rơndeh pơn diang phào crong, gar phào guh koèl kơh Lũng Lô in, tus Cò Nòi mờ guh tus Điện Biên Phủ. Ală phan tàm do geh kwơ màng ngan tài geh bal mờ ală cau ling”.

Rê wơl hờ rài lài do, 70 nam lài, tềng đăp mờ nùs nhơm sơgràm phà bal mờ broă lơh ờ niam bơh ling lơgar Tây sò tơm, Ƀộ Cíñ trị, Mpồl đơng lam Đảng Dà lơgar neh pơrlòng cri bơyai mờ ai geh Nghị quyết ring bal broă rơndăp tam lơh Đông – Xuân 1953 – 1954. Càr Yên Bái tŭ hơ̆ geh Đảng mờ Cíñ phủ jào lơh gùng 13 bơh anih ơhò ơm Phà Hiên, càr Tuyên Quang lòt tus Ba Khe hơ̆ sồng guh tus koèl kơh Lũng Lô. Mờ nùs nhơm lam lài lik tam lơh, lơh ngan drơng broă tam lơh, Đảng ƀộ càr Yên Bái neh tus bal cri bơyai nàng rơcang ai broă tam lơh Đông Xuân in.

Phan gam wơl tŭ do hơ̆ là jơnau sồr sồ 15 bơh Mpồl đơng lam càr Yên Bái dê bè broă lơh gơs broă tơmù tă dia kàl lơh sa nam 1953; Nghị quyết bơh Mpồl đơng lam càr Yên Bái ngai 02 nhai 5 nam 1953 bè lơh gơs Mpồl kwang bàng đơng lam broă lơh kơl jăp wơl gùng sồ 13… Mò Hoàng Thị Thanh Thủy, Kwang atbồ Anih prăp gàr phan kwơ kah yau càr Yên Bái pà git: “Pang sră den geh uă pang sră kwơ đơs tus cồng nha bơh ling klàng mờ làng bol càr Yên Bái dê pơgồp bal tàm broă lơh gơs tam lơh pha lin Điện Biên Phủ. Tàm hơ̆ geh ală Nghị quyết bơh Tỉñ ủy mờ ală sră nggal, jơnau sồr bơh Ủy ƀan tam lơh càr Yên Bái yal Cíñ phủ tă pơgồp priă blơi phan sa, phan ngui drơng broă tam lơh in”.

Jơh ală phan lời kir geh Bảo tàng càr Yên Bái pơgồp bal mờ Anih prăp gàr phan kwơ kah yau càr Yên Bái bơyai lơh ràng tơlik tềng ƀlàng hìu Bảo tàng càr Yên Bái di tơnkah 70 nam tam lơh pha lin Điện Biên Phủ nàng làng bol tàm càr bal mờ cau năc in wă rơlao tai bè ală broă bè ală broă pơgồp bal bơh ling klàng mờ làng bol càr Yên Bái tàm tam lơh pha lin Điện Biên Phủ.