Nhai 4- trồ prang bơh tiah Tây Nguyên dê duh bè ồs. Tàm ƀlàng pơlam tàp mờng chài lơh broă, git nđờ jơt nă kwang bàng, cau ling Cơldŭ Kảñ sát kơ động Kwang àng càr Dăk Lăk kung gam pơlam tàp jơh nùs ngan. Jùt gơ jal dà kơl hề, Trung úy bi Hứa Văn Hòa pà git: “Să tờm añ bal mờ jơh gùt kwang àng, cau ling drơng broă tàm mpồl Kảñ sát kơ động sùm lơh ngan pơlam tàp, bơsram, bơto bơtê bè bồ tơngoh cíñ trị. Bol hi sùm tàp võ, bơta chài tam lơh, kung bè ngui chài ngan ală bơta phan tam lơh rơcang lài tam lơh, dờp mờ lơh gơs niam tơl kơnòl broă geh jàu”.

Rơcang lài tam lơh tàm bơta pa, pha lin pa ngan rlau jơh là nhai 6 nam 2023, mpồl Kảñ sát kơ động neh sơrbac mhar bal mờ ală mpồl lơh broă mờng chài kup jơh ală bol sò tơm iơh bơsak geh phan tam lơh tàm Cư Kuiñ. Jat Thượng tá Vũ Thành (77 sơnam) – lài do là kwang atbồ Cơldŭ Kảñ sát kơ động Kwang àng càr Dăk Lăk pà git, Dăk Lăk đơs is, Tây Nguyên đơs bal là ù tiah kuơmàng bè bơta lơngăp lơngai dà lơgar, sùm gơtìp ală bol sò tơm jòi kai nàng lơh aniai. Tlau 30 nam lơh broă tàm mpồl Kảñ sát kơ động, kong mờ uă bơta sơbơng roh, jơnau kah kir sùm gơ wèt mờ ồng Vũ Thành là dơ̆ jòi kup nam 1977 kup Hoàng Huân, dùl nă cau atbồ bol Fulro tàm kơnhoàl Dăk Mil: “Hoàng Huân bơh xã Đức Minh, Đức Mạnh bal mờ rlau 20 nă bol Fulro ntoat dô tàm brê, lơh bal mờ Trung đoàn 64 Fulro bơh Y K’lơng dê. Jơnau kờñ bol do dê là jời gùng lơh gơlừ gơnoar atbồ kơnhoàl dăk Mil. Bol hi lơh 2 dơ̆ jòi kup, 5 jơ drim ngai 06/4/1977, bol hi tam pà gơs 2 mpồl, jòi kup bơh àng drim tus klo ngai den git gŏ geh tềl lời wơl. Añ klo sap rơdiô bol sò tơm pờ, mờ geh tềl tơnggŏ bol sò tơm dê den bol hi tus rềp mờ añ gŏ Huân den cuh tơn 3 nai phàu, lơh Huân gơtìp cuh dê mờ pừ den hơ̆ sồng geh kup. Lùp Hoàng Huân den neh kup jơh mpồl cau bol do dê mờ nđờ jơt nă cau tàm mpồl bol do neh pờ tê ờ jai, tơlik mat yal tìs jơh”.

Thượng tá ồng Cao Tiến Thu – Kwang atbồ Cơldŭ Kảñ sát kơ động Kwang àng càr Dăk Lăk pà git, 50 nam do, bal mờ lơh niam kơnòl broă sền gàr lơngăp lơngai ală anih lơh broă cíñ trị, lơh sa, mpồl bơtiàn kuơmàng bơh dà lơgar mờ càr dê, mpồl kảñ sát kơ động càr Dăk Lăk neh tam dră geh cồng nha mờ ală bơta cau tìs ngòt rơngơt bè kơñau phan, gơ sơt cau, ma tuý… sền gàr lơngăp lơngai tàm càr. Ală nam tơnơ̆ tơngklàs, mpồl kảñ sát kơ động neh lơh git nđờ rbô dơ̆ jòi kup bol Fulro, gơ sơt mờ kup kis git nđờ rhiang nă bol tàu dră, kup ai uă phàu crong, phan ling klàng mờ ală sră nggal kuơmàng. Mìng is dơ̆ sò tơm iơh bơsak ngai 11/6/2023 tàm Cư Kuiñ, ală kwang bàng, cau ling neh kup geh 11 nă bol sò tơm iơh bơsak, kup ai uă phan tam lơh, phan ling klàng.

Thượng tá ồng Cao Tiến Thu pà git, kwang bàng, cau ling mpồl kảñ sát kơ động pơn jat tai bơsram, pơlam tàp tơnguh nùs nhơm cíñ trị mờ mờng chài lơh broă, rơcang lài tam dră mờ tơl bơta cau tìs tàm tơl broă gơlik geh: “Bol hi pơn jat tai đòm jat bơhiàn khin cha jak chài mờ ală mờng chài kuơmàng bơh ală rơnàng kwang đơng lam bồ Kảñ sát sền gàr lài do, Kảñ sát kơ động tŭ do mờ sùm mblàng wơl bơta kờñ gơboh, bơta jơh nùs ai kwang bàng, cau ling tàm mpồl in. Bol hi bơyai lơh pơlam tàp ai kwang bàng, cau ling in ngai sơlơ git mờng chài lơh broă, hơ̆ sồng tàp lơh ală broă lơh, rơndap broă nàng bơsong ală broă gơlik geh ngan ngồn nàng gàr niam bơta lơngăp lơngai, rơndap tap sèng tàm càr”.

Ală nam do, mờ uă pha lin, cồng nha lơh geh, Cơldŭ Kảñ sát kơ động Kwang àng càr Dăk Lăk pơn iờ să ngan geh Đảng, dà lơgar jàu pà khà jờng Mpồl phàu crong làng bol khin cha jak chài, Gai lòng pha lin khà 1, Gai lòng pha lin ling klàng khà 3 mờ uă phan ƀàn kuơmàng ndai. Kwang bàng cau ling Kảñ sát kơ động Kwang àng càr Dăk Lăk tŭ do gam đòm jat bơhiàn khin cha jak chài, dipal là “Nha cang lòs” sền gàr lơngăp lơngai, rơndap tap sèng tàm ƀòn lơgar mờ ring lơngai ai làng bol ală jơi bơtiàn tàm càr Dăk Lăk in.