VOV4.K’ho- Bal mờ kơnòl broă tam dră, rcang sơndră mờ cau lơh tìs, ală cau ling Phòng Kảñ sát kơ động, Kwang àng càr Dăk Lăk sùm bơyai lơh ală broă lơh wèt rê mờ tàm ƀòn lơgar, dong làng bol  tàm broă lơh broă sa, tơnhào phan lơh sa suơn sre. Ală broă lơh do neh pơgồp bơnah lơh niam rlau tai nùs nhơm tam klăc ling klàng làng bol, lơh niam rlau tai rùp hin cau ling kwang àng làng bol gơwèt mờ làng bol tàm ală ƀòn lơgar.

Tàm ƀòn Ktơng Drun, xã Cư Né, kơnhoàl Krông Buk, càr Dăk Lăk, 30 nă cau ling kwang àng gam mhar ngan toah wàs brong dà nàng ai dà in hòr mờ koh wàs jơh rŭ rơm, lơh niam wơl tiah mbòr dà.

Gĭt nđờ jơ̆t nă cau ling kảñ sát kơ động toah wàs rbòng dà

 Thượng úy Nguyễn Thị Khánh Vân, Phó Ƀí thư Đoàn cơ sở Phòng kảñ sát kơ động Kwang àng càr Dăk Lăk pà gĭt, ală dơ̆ ai ling lơh broă bơdìh tài mpồl bơtiàn sùm geh mpồl lơh broă lam lơh nàng dong kờl làng bol tàm ală ƀòn lơgar. Thượng úy Nguyễn Thị Khánh Vân đơs: Do là dùl tàm broă lơh mờ bol añ cèng bal pràn cau kơnòm să dê, jơh nùs mờ ai jơh bơta pràn bơh cau kơnòm să he dê nàng tus bal mờ mpồl bơtiàn, ai ală broă lơh bơh mpồl ling kảñ sát làng bol dê, mpồl ling kwang àng làng bol tus mờ ală tiah sar lơgar ngài, ală tiah kal ke nàng dong kờl làng bol.Tàm dơ̆ do, ală cau ling wàs 300 thơk rơƀòng dà, koh wàs jơh rŭ rơm, pơs wàs hìu pơrjum mpồl bơtiàn tàm 2 ƀòn Drao mờ Ktơng Drun, xã Cư Né dê; pơgồp bal mờ broă mblàng yal adat boh lam mờ hòi jà mpồl cau tă pơgồp bal priă jền mờ pà 50 bơnah phan ai ală hìu bơnhă kal ke in. Jat ồng Y Bliu Mlô, Phó Củ tịc Ủy ƀan Mặt trận Dà lơgar xã Cư Nĕ pà gĭt, do là 2 ƀòn kal ke ngan rlau jơh tàm xã dê mờ mờr 500 hìu bơnhă bal mờ 2 rơbô nă cau, uă ngan là kòn cau Rơđê ơm kis. Bơta dong kờl, tam pà bal di tŭ bơh ală kwang bàng, cau ling dê neh dong làng bol bơnah lơi bơsong bơta kak le, lơh ngan brồ guh. Ồng Y Bliu Mlô đơs: "Rài kis làng bol tŭ do đơs bal là lơh sre, lơh mìr lơm, kal ke ngan. Bơh dơ̆ pà phan do kơ̆p kờñ làng bol he geh lơh ngan nàng lơh sre, lơh mìr tai. Ala mat làng bol tàm 2 ƀòn do añ chờ hờp mờ ưn ngài mờ kơ̆p kờñ là geh lơh pơn jat tai nàng dong kờl làng bol, ngan là tàm bơta bè tŭ do".

Kảñ sát kơ động pà phan ai làng bol geh rài kis kal ke in

Gơwèt mờ tơl nă cau ling kảñ sát kơ động, tơl dơ̆ lòt ling bơdìh là dùl tŭ tơngai niam nàng khi in geh rê mờ ƀòn lơgar, rềp mềr mờ làng bol, bơsram tai ală bơta chài hòi jà làng bol. Trung sĩ Y Sen Mdrang đơs: "Bơh ală dơ̆ lòt lơh broă den bol añ lơh geh ală bơta gĭt gơ̆p đềt mềr ngan mờ làng bol, tam klăc bal mờ gơ̆p, tam pà bal ală bơta tàm rài kis bơh làng bol dê. Ơm rềp mờ làng bol gơ lơh kờñ gơboh làng bol rlau tai, kờñ dong kờl làng bol jơh mờ nùs nhơm, jơh ală bơta bơh cau ling kơnòm să dê".

Thiếu tá Hoàng Thị Kim Phượng, kwang atbồ Đội Cíñ trị hậu cần, Phòng Kảñ sát kơ động pà gĭt, lơh jat srơh “Kwang àng Dăk Lăk wèt rê tàm ƀòn lơgar, bơt bơtàu bơta gĭt gơ̆p niam bơnĕ mờ làng bol”, pah nam mpồl lam lơh uă broă lơh wèt rê tàm ƀòn lơgar, lơh broă niam dong kờl is tài mpồl bơtiàn. Pah dơ̆ lòt digơlan jŏ jòng jơh 1 poh, ală cau ling geh rê tàm ƀòn lơgar lơh pôs đồng, lơh broă dong làng bol. Bè tàm nam 2021, bulah bơta kòp Kovid-19 gơlik geh kal ke, mpồl lơh broă kung lam lơh geh 7 dơ̆ ai ling lòt lơh broă đah bơdìh, hòi jà geh rlau 320 tơlak đong nàng dong kờl pà phan ai làng bol in. Mìng is bơh bồ nam tus tŭ do, mpồl lơh broă neh lam lơh 5 broă lơh wèt rê tàm ală ƀòn lơgar tiah sar lơgar ngài. Thiếu tá Hoàng Thị Kim Phượng đơs: "Sền gĭt bơta kwơ màng nàng lơh bơta gĭt gơ̆p tam klăc bal đah ling klàng mờ làng bol tàm ù tiah càr dê den pah nam Phòng Kảñ sát kơ động neh sồr ală kwang bàng, cau ling lam lơh ală broă lơh dong kờl is, tus bal dong kờl is rê tàm ƀòn lơgar lơh broă, dong làng bol, ngan là tiah làng bol kòn cau dùl ết nă cau, tiah sar lơgar ngài. Bơh ală broă lơh hơ̆ den gơ lời wơl tàm tơl nă kwang bàng, cau ling bol añ in, gŏ geh ală bơta kal ke, bòl glar bơh làng bol dê mờ dùl bơnah lơi hơ̆ dong lơh niam wơl rài kis, lơh sa ai làng bol in".

Lài hơ̆, 50 nă kwang bàng, cau ling Phòng Kảñ sát kơ động, càr Dăk Lăk kung neh lơh “Broă lơh dong kờl is” tàm xã Yang Tao, kơnhoàl Lăk. Bal mờ lam lơh lòt sền, gròi sền lơngap lơngai, rơndap tap sèng, ờdo ờdă gùng lòt tàm ù tiah xã dê, mpồl ling kản sát kơ động neh lam lơh mblàng yal hòi jà làng bol lơh jat niam gùng dà broă lơh bơh Đảng, Adat boh lam bơh dà lơgar dê mờ tơl jơnau sồr bơh gơnoar atbồ tiah do dê. Tàm do, ală cau ling Kảñ sát Kơ động neh pơs wàs kloh niam tiah ơm kis tàm ală gơl gùng lòt ƀòn lơgar; mù tàm sre dong làng bol toès kòi.

Tàm tơngai lơyah ngan dong kờl is rê mờ làng bol, ƀòn lơgar ală kwang bàng, cau ling kảnh sát kơ động sùm kơlôi là geh ờ ngòt kal ke, bòl glar lơi nàng rê gơ rờm bal mờ tam pà bal bơta kơn jơ̆ mờ dong kờl ală broă lơh tàm tiah ƀòn lơgar, uă ngan là làng bol kòn cau dùl ết nă cau gam kal ke bè uă gah.

Ală dơ̆ ai ling lòt lơh broă đah bơdìh rê tàm ƀòn lơgar bơh ală cau ling kảñ sát kơ động tàm Dăk Lăk neh pơgồp bơnah sền gàr lơngap lơngai, rơndap tap sèng, rềp mềr rlau tai nùs nhơm bơh ling klàng mờ làng bol, bơt bơtàu rùp hin, gơ lời wơl bơta niam ngan bè cau ling kwang àng làng bol “Tài dà lơgar hŭi să tờm, tài làng bol drơng broă”.

Cau cih H’Xíu-Cau mblàng K’Hạnh