Mho ngai 20/9, Củ tịc Anih duh broă mặt trận dà lơgar Việt Nam ồng Đỗ Văn Chiến neh dờp priă tă pơgồp bơh Mpồl Ƀộ Cribơyai broă mờ lơgar ndai, ală anih lơh broă ala mat cribơyai broă mờ lơgar ndai mờ mpồl lơh sa kă bro tàm lơgar mờ lơgar ndai dê tus jàu dong kờl làng bol gơtìp gơ rềng tài càl rbut dờng sồ 3 lơh gơbàn. Bè hơ̆, kờp tus 5 jơ mho ngai 20/9, Mpồl hòi jà dong kờl Dà lơgar neh dờp kờp jơh khà priă là 1 rbô 628 tơmàn đông. Bơh khà priă tă pơgồp dờp geh, Mpồl hòi jà dong kờl Dà lơgar neh tam pà 1 rbô 35 tơmàn đông tus 26 càr, ƀòn dờng in nàng bơsong jơnau gơ lời wơl bơh trồ tiah lơh aniai.

Đơs tàm dơ̆ dờp, Củ tịc Anih duh broă mặt trận dà lơgar Việt Nam ồng Đỗ Văn Chiến ai lơh ngoh rơngac ngan tŭ dờp ală bơnah priă tă pơgồp dờng màng ngan bơh ală mpồl lơh sa kă bro, mpồl bal mờ cau dồ nă să dê tă pơgồp dong kờl làng bol gơtìp hoàc huơr tài càl rbut dờng sồ 3 lơh gơbàn. Pơyua jơnau ưn ngài uă ngan tus Kwang atbồ Anih lơh broă ala mat lơgar Lo tàm lơgar Việt Nam, Kwang atbồ Anih lơh broă ala mat lơgar Thái Lan tàm lơgar Việt Nam, ală mpồl lơh sa kă bro, Mpồl cau Việt Nam tàm lơgar Thái Lan, Mpồl cau Việt Nam tàm lơgar Ukraine mờ làng bol lơgar he tàm lơgar ndai, ồng Đỗ Văn Chiến hơ pơrgon ngui ală bơnah priă dong kờl tơn ai tiah gơtìp hoàc huơr lơh aniai tài càl rbut dờng Yagi lơh gơbàn; ngui di jơnau kờñ, geh cồng nha, loh làng, song dơpă, kong bơta jat sền bơh làng bol mờ mpồl bơtiàn dê.