VOV4.K’ho- Mho ngai 20/05, tàm dơ̆ pơrjum tơngume is, Hội đồng Ñân zân càr Khánh Hoà khoă VII neh ring bal Kơrnoăt bè hơ tam pà priă jền bơcri priă dà lơgar tơngai bơh nam 2021- 2025, bơh kes priă càr dê nàng lơh rơndăp broă lơh lơh gùng rơndeh ntoăt răt Khánh Hoà- Buôn Ma Thuột, kờp dŭ mờr 350 tơmàn đong nàng lơh rơndăp broă lơh, kờñ lơh geh êt ngan là 50% priă tă tơm priă ai ù lơh gùng gơl lòt gan ù tiah càr Khánh Hoà.

Priă tam pà ngan ngồn geh lơh jăt sră nggal Jơnau yal kơlôi sơnơng bơh sơnrờp gơtùi mŭt lơh ngan ngồn mờ Jơnau yal kơlôi sơnơng gơtùi mŭt lơh ngan ngồn geh kâp gơnăp gơnoar kĭ ring bal. Rơndăp broă lơh lơh gùng rơndeh ntoăt răt Khánh Hoà- Buôn Ma Thuột là dùl tàm ală rơndăp broă lơh kwơmàng bơh dà lơgar dê geh Cíñ phủ dan mờ Quôk hội pờ tê ring bal gùng dà bơcri priă jăt broă lơh bơcri priă dà lơgar. Kờp jơh bơta jòng jơh gùt gơl gùng pơgăp 117 kơi sồ mờ bơnàng gùng ơnàng 4 bơnàng gùng rơndeh lòt mờ digơlan sơnđờm mŭt lơh tàm nam 2023, bơh sơnrờp geh lơh gơs tàm nam 2025.

Cau mblàng Lơ Mu K’Yến