VOV4.K’ho- Tơngai do, tàm càr Dăk Nông, dùl ròt ală dòr bơnơm neh gơtìp cò pơnring jơh tìs mờ kơrnoăt boh lam nàng ai măt ù drơng jơnau kờñ kă bro, tăc blơi. Uă dòr bơnơm jăt ală gùng rơndeh, ală gơl gùng tờm, ngan là ală tiah rềp ală bơtơ̆t tơnau dơng dà, dà dờng dà croh neh gơtìp cò pơnring jơh tìs mờ kơrnoăt boh lam, mơya anih lơh broă geh gơnoar bơsong ờ jơh. Đơs wơl bè jơnau geh ngan do, cau lơh ƀăo Anih Jơnau đơs Việt Nam tàm Tây Nguyên geh dùl ròt jơnau cih “Kkhồm ù dòr bơnơm gơ gơs ù biàng tàm Dăk Nông: Tìs làm bă tiah, bơsong nggùl gùng”. Tàm jơnau đơs ngai do, jà làng bol mờ gơ̆p bơyô iăt bơnah sơnrờp bơh dùl ròt jơnau cih sơnđan măt “Dăk Nông làm bă tiah cò pơnring dòr bơnơm tìs mờ kơrnoăt boh lam”.

Tàm xã Trúc Sơn, kơnhoàl Cư Jŭt, càr Dăk Nông geh uă dòr bơnơm neh mờ gam gơtìp cò pơnring tìs mờ kơrnoăt boh lam. Rềp kềng tơn hìu pơrjum thôn 6 bơh xã Trúc Sơn dê là dùl nơm gùng dă cài jòng rlau 300 thơk geh lơh tìs mờ kơrnoăt boh lam bơh Gùng rơndeh dờng 14 mŭt tàm dùl nơm dòr bơnơm neh gơtìp cò pơnring jơh mờ tam pà ù, tam pà bă. Tàm do, uă broă bơ̆t bơtàu gam geh lơh rơcăng lơh gơs dùl bă ù gơlơh bè “ơm rlô pràn să”. Ồng Trần Đình Nam, Củ tịc Ủy ƀan Ñân zân xã Trúc Sơn pà gĭt, bă ù dòr bơnơm do tŭ do là ù lơh broă sa sươn sre. Bulah Ủy ƀan Ñân zân xã mờ Ủy ƀan Ñân zân kơnhoàl neh lơh sră, lơh glài mờ priă bè broă lơh tìs aniai ù mờ cau tờm ù kung neh hơ ơm ờ lơh, bơsong jơnau gơlời wơl mơya tơnơ̆ hơ̆ ồng do kung gam bơcrì bơcrà ngan lơh tìs tai mờ jà cau blơi. Ồng Trần Đình Nam, đơs: Khi lơh broă mờ he kung ờ gŏ rơgơi kơlôi geh sơl. Tŭ khi cò pơnring ù hơđơm nggùl sàu den xã neh lơh glài, tơnơ̆ hơ̆ khi cò pơnring rlau tai kung neh dan mờ kơnhoàl, mờ kơnhoàl kung neh lơh glài mờ priă 20 tơlak đong sơl. Bè broă khi đơs dùl đah, lơh dùl đah do kung gơlơh kal ke ngan ai xã in. Khi khăt gơboh lơh mờ tàm tŭ he gam uă broă, ờ gŏ di là pah ngai sùm sền sùm tàm broă hơ̆ ờ. Tŭ do, kơnhoàl neh ơm ing lơh broă tăc blơi bă ù hơ̆.

Gùng dă mờ cài tìs mờ kơrnoăt boh lam tàm xã Trúc Sơn, kơnhoàl Cư Jŭt

Jơnau cò pơnring dòr bơnơm tàm ù tiah xã Trúc Sơn, kơnhoàl Cư Jŭt gơbàn kal ke bơh lồi nam lài tus tŭ do. Ală dòr bơnơm tàm xã mìng là lŭ rơđeh lơm, kal ke ngan nàng tam phan, mìng bàr pe jơ̆t tơlak đong lơm dùl sàu, nisơna gơguh giă tus gĭt nđờ jơ̆t dơ̆ tơn, uă cau tàm đòm jăt gơ̆p ur ar lòt blơi. Tơnơ̆ hơ̆, dòr bơnơm lŭ rơđeh do gơtìp cò pơnring jơh bal mờ jơnau đơs là lơh niam wơl ù nàng tam phan. Mơya mùl màl là nàng tam pà ù, tam pà bă mờ tăc bro.

Jăt kềng gah gùng rơndeh dờng 14 bơh kơnhoàl Cư Jŭt lòt gan kơnhoàl Dăk Mil, kơnhoàl Dăk Song tus ƀòn dờng Gia Nghĩa mờ kơnhoàl Dăk R’lấp bơh càr Dăk Nông dê, jơnau cò pơnring dòr bơnơm gơbàn làm bă tiah. Ồng Phạm Quang Nam, Phó Củ tịc Ủy ƀan Ñân zân xã Ñậm N’Jang, kơnhoàl Dăk Song pà gĭt, jơnau do gơbàn jơh bal tàm bă ù lơh broă sa sươn sre mờ ù brê. Ồng Phạm Quang Nam yal: Lơh tìs tàm broă cò pơnring ù, tuh ù tàm bă ù brê kung geh mờ ù lơh broă sa sươn sre kung geh sơl nàng lơh broă kă bro, tăc blơi ù tìs mờ kơrnoăt boh lam den kung geh sơl. Xã gam pơgồp bal mờ ală ƀan ngàñ bơh kơnhoàl dê, ală anih lơh broă geh gơnoar, tàm hơ̆ geh phòng tài nguyên mờ môi trường, phòng lơh sa phan bơna, kwang àng kơnhoàl, hạt kiểm lâm, tus lơh ală rơndăp broă lơh, gùng dà lòt sền mờ lơh glài ală broă lơh tìs.

Dùl ròt dòr bơnơm kềng gah gùng rơndeh dờng 14 bơh càr Dăk Nông dê gơtìp cò pơnring jơh tìs mờ kơrnoăt boh lam

Tàm tiah ñrùh dà Cá Sấu, gơwèt sơnah ƀòn Nghĩa Tân mờ Nghĩa Trung, ƀòn dờng Gia Nghĩa, geh bàr pe nă cau bơcrì bơcrà ngan cò pơnring dòr bơnơm, dăp lŭ bơ̆t dà croh, sơgràm ai hìong dà hòr jăt ñrùh dà nàng lơh tiah nhơl chờ. Jăt kềng gah dà croh Dăk Nông, ală cau do kung neh lơh bơtơ̆t ƀê tông, dăp biài lŭ tìs mờ kơrnoăt boh lam drơng ai tiah nhơl chờ kơñau do in. Pal sền ngăc ngan là tơnơ̆ tŭ lòt sền ngan ngồn, mpồl cau lơh ƀăo geh jơnau lùp mờ kwang đơng lam bồ tiah do den dùl nă cau klau yal is măt là Trọng hòi điện thoại pơhìn: Mê ƀư mê liăp den bol khi tus sền gơlềng gơlàng jơh. Mơya lòt sền kung ờ gŏ lơh geh chi lơi sơl añ sơl mơya roh halà lòt. Mê ƀư mê liăp den añ kong tă priă ai mê in tăc dùl đah tê mờ ờ gŏ rơngòt mhàm lơi ờ. Tơnơ̆ do mê cih niam añ in, kơrhia yơ añ tơl iăt bồ mê yơ.

Dòr bơnơm neh cò pơnring tìs mờ kơrnoăt boh lam geh tam gơl gơ gơs là ù biàng

Jơnau cò pơnring dòr bơnơm gơbàn làm uă tiah, mờ jŏ jòng, uă cau ờ gŏ rơngòt, bơcrì bơcrà ngan mờ geh duh là sền ờ sơ̆p kơrnoăt boh lam, pơhìn cau lơh ƀăo pà gŏ, broă bơsong broă lơh tìs tàm do gam geh jơnau. Tàm tŭ hơ̆, ală tiah là tiah pơneh uă bè cò pơnring dòr bơnơm tìs mờ kơrnoăt boh lam sùm là ală tiah geh giă ù jơnhoa ngan, pơgăp bàr pe rhiang tơlak đong dùl sào mờ jơnau geh ngan bè ờs là dòr bơnơm. Tŭ cò pơnring măt ù gơtùi, ù dòr bơnơm neh geh khồm gơ gơs ù biàng, giă tăc bă ù geh tơnguh tai tus uă dơ̆, digơlan gơguh tus pơgăp 1 tơmàn đong dùl sàu mờ geh tŭ là bàr pe tơmàn đong dùl sào mờ uă cau jòi sa priă kơñau uă ngan bơh broă lơh tìs mờ kơrnoăt boh lam do.

Cau cih VOV Tây Nguyên- Cau mblàng Lơ Mu K’Yến