Tơnơ̆ 11 nam bơh ngai geh Tổng Ƀí thư lùp còp, pơndờm pơnđiang tơn, ồng Thào Dìn- dồ nă làng bol kòn cau Mông, ơm tàm thôn Cốc Phương, xã Bản Lầu, kơnhoàl Mường Khương, càr Lào Cai tŭ rcang mut tàm sơnam 60 mơya kung gam kah bè ờs ngan ală jơnau nting tơngkah ƀuơn ngan mờ jrô ơnàng ngan bơh cau đơng lam bồ dờng ngan rlau jơh Đảng dê.

Nam hơ̆, ồng là ala mat cau lơh sa lơh sa jak mìng dùl lơm bơh kơnhoàl Mường Khương dê kung bè càr Lào Cai geh Tổng Ƀí thư ồng Nguyễn Phú Trọng tus còp. Lài hơ̆, uă cau neh tus mờ ồng Thào Dìn mờ mat sơnđan là “Bơtau plai prìt sơngkò”, priă lơh geh pah nam bơh broă tăc plai prìt sơngkò gơguh tus 700 tơlak đong. Mơya tŭ Tổng Ƀí thư tus, ờ mìng đơs ală jơnau prơ lơm, mờ ồng gam đơs ală bơta lơh jơh ală  cau bơh kwang bàng, kwang đơng lam bồ tus làng bol pal kơlôi sơnơng. Hơ̆ là bơtàu tơnguh lơh sa pal sền gròi dong kờl pal bơtàu tơnguh lơh pas bal, ờ gŏ di lời tàm cah is cau pas mờ cau rƀah; cau neh pas rau pal dong kờl cau rƀah kal ke, Đảng viên pas dong Đảng viên gam kal ke rlau nàng “jơh ală ndrờm gơguh pas, jơh ală lik klàs rƀah bal”. Ồng Thào Dìn, đơs: “Kơno Wa đơs bè hơ̆ kung pal bơsram is, kơlôi broă lơh bè lơi nàng hìu bơnhă in bơtàu tơnguh, den pal tam klăc bal, geh broă lơi kal ke den jơh ƀòn lơgar pal dong kờl bal mờ gơ̆p den hơ̆ sồng gơtùi lơh geh”.

Gơ wèt mờ ồng Thào Dìn, ală jơnau nting tơngkah bơh Tổng Ƀí thư dê kung là bơta gơn kơnờm tus tơngai tŭ do, bulah ờ siơ̆u siar phan sa, phan prap, ông kung rơ wah rài kis ơm tàm hìu kấp 4 ƀarah ƀarài ngai lơi kung  tơryăng tơryồng lơh broă tàm sre, tàm mìr. Làng bol thôn Cốc Phương tơryăng tơryồng ngan tàm pơrlòng lơh sa, tŭ do ờ gam geh hìu bơnhă rƀah tai, geh tus rlau 70% là hìu  pas, geh dờp là thôn ƀòn lơgar lam lài.

Kung là cau geh Tổng Ƀí thư tus lùp còp, tơm bơh bơr tơn, Trung tá Nguyễn Ngọc Hà, Kwang atbồ Pôs đồng ling sền gàr tiah nhàr lơgar Bản Lầu, kơnhoàl Mường Khương kung kah ală jơnau  pơndờm pơnđiang, jơnau bơto sồr bơh Tổng Ƀí thư dê, bal mờ jơnau nting tơngkah kwang bàng, cau ling pal lơh niam broă lơh atbồ tiah nhàr lơgar, cribơyai broă mờ lơgar ndai, is ồn pal bơt bơtàu geh nùs nhơm pin dờn kơ̆ kơl jăp bơh làng bol dê. Trung tá Nguyễn Ngọc Hà, đơs: “Jat tàm nùs nhơm Tổng Ƀí thư ồng Nguyễn Phú Trọng nting tơngkah, bol añ neh dong kờl làng bol mờ ală broă lơh geh ngan bè pà phan tam, sơntìl phan tam, bơto pơlam làng bol tam gơl broă lơh kơ̆ kơl jăp rài kis, bơt bơtàu ală hìu bơsram, tơnau re dà nàng rcang pleh lài dà bŭ ai kơnòm dềt in nàng ưn ngài wơl ală nùs nhơm bơh làng bol dê neh jơm klòm, đềt mềr mờ bol añ”.

Cih kah jơnau nting tơngkah bơh Tổng Ƀí thư dê, kấp ủy, gơnoar atbồ, mpồl ling phàu crong mờ làng bol 12 jơi bơtiàn oh mi tàm xã Bản Lầu ală nam pa do sùm tam klăc bal, jơh nùs gàr kơ̆ gơnoar tờm, kơ̆ kơl jăp tiah nhàr lơgar. Xã Bản Lầu tŭ do ờ mìng ơm wơl là tiah tờm plai prìt sơngkò, prìt bơh Lào Cai dê lơm mờ gam geh tai gĭt nđờ rơhiang lồ cè, quế, geh bal ală tiah lơh kòi bơkah Séng Cù, pơnđơl pràn lơh ngan gờñ gơ gơs xã ƀòn lơgar tơnguh uă tàm rài tơnơ̆ do ờ ngài.