Gam tàm tơngai kàl mìu uă, Thiếu tá Nguyễn Phúc Thuận, Pôs đồng ling sền gàr tiah nhàr lơgar Dăk Lao, jơh nùs bơto pơlam làng bol thôn Dăk Thọ, xã Dăk Lao, kơnhoàl Dăk Mil, càr Dăk Nông bơta chài sơng ka sền gàr tờm kơphê. Bơh tŭ geh jàu kơnòl tus bal pơrjum bal mờ Ci ƀộ thôn Dăk Thọ, bi sùm lòt bal mờ làng bol tàm broă lơh sa, lơh bè lơi nàng sơlơ bơtàu tơnguh rài kis ai làng bol tàm ù tiah nhàr lơgar in. Thiếu tá Nguyễn Phúc Thuận, đơs:“Nàng gàr niam ai phan tam, phan ròng in di pal, den añ neh lùp, pơgồp bal mờ mpồl cau lơh broă sa xã, kơnhoàl dê kơlôi sơnơng ală sơntìl phan tam di pal nàng lam ai làng bol in tam. Ai cau bơsram dờng tus bơyai bal mờ làng bol ală broă lơh di pal nàng làng bol in gơtùi mut ngui. Añ kung khin cha sồr ală kwang bàng lòt tàm ală tiah, lòt tus tàm thôn nàng tus bal dong kờl ală hìu bơnhă kal ke”.

Ồng Nguyễn Khắc Chinh, Ƀí thư Ci Ƀộ thôn Dăk Thọ, xã tiah nhàr lơgar Dăk Lao, kơnhoàl Dăk Nông pà gĭt, bơh ngai Thiếu tá Nguyễn Phúc Thuận geh jàu kơnòl broă tus bal pơrjum, ală dơ̆ pơrjum Ci ƀộ thôn duh hồl uă rlau. Uă Jơnau lơh nền tàm pơrjum ngan ngồn geh mut lơh tàm rài kis, lơh broă sa geh Ci ƀộ đơs mờ lam lơh geh cồng nha. Ală đảng viên kung gĭt wă rlau tai bè gơnoar broă, kơnòl broă lơh krơh niam bơh he dê, lơh ngan tàm broă bơtàu tơnguh lơh sa, khin cha tam gơl li la phan tam, phan ròng. Thiếu tá Thuận bal mờ Ci ƀộ thôn neh hòi jà, tă pơgồp bal lơh 4 nơm hìu bơta nđàc. Ồng Nguyễn Khắc Chinh, đơs:“Thiếu tá Thuận là dùl nă kwang bàng kơnòm să, jơh nùs ngan, ngăc ngar ngan tàm tơl gah broă, broă lơh dê. Tơngkah Ci ƀộ kung bè làng bol tàm thôn tàm broă tam phan, lơh jat niam sền gàr tiah nhàr lơgar. Kwơ màng ngan mờ kờñ ngan”.

Jơh nùs “3 jat, 4 lơh”, nàng “mìu ñhàc sù jŏ”, ală đảng viên ling sền gàr tiah nhàr lơgar geh sồr tus bal pơrjum mờ ală Ci ƀộ thôn, ƀòn tàm tiah nhàr lơgar càr Dăk Nông neh dong làng bol hời rơ hời tam gơl bơta kơlôi sơnơng broă lơh, bơtàu tơnguh rài kis. Mò H’Xuân, Phó Ƀí thư Huyện ủy kơnhoàl Dăk Mil, càr Dăk Nông, pà gĭt:“Gơwèt mờ mpồl ling sền gàr tiah nhàr lơgar jơh gùt kơnhoàl den kung neh lơh geh uă broă lơh, broă lơh geh tam pà bal làm uă tiah. Ală broă lơh hơ̆ geh lơh gơrề uă mờ làng bol tàm ù tiah jơh gùt kơnhoàl dê jờng rơ uă ngan. Pơgồp bơnah tàm broă lơh bơt bơtàu ƀòn lơgar Dăk Mil, is ồn là lơh jat ală Jơnau lơh nền tàm pơrjum bơh Đảng dê bè bơtàu tơnguh lơh sa- mpồl bơtiàn mờ bơt bơtàu lơngăp lơngai, sền gàr dà lơgar tàm ù tiah kơnhoàl dê” .

 Mờ bơta dong kờl bơh ală cau ling geh griăt tơlir, lơh sa, rài kis làng bol tàm gơl gùng tiah nhàr lơgar bơh càr Dăk Nông dê hời rơ hời geh bơtàu tơnguh. Kung bơh hơ̆, làng bol kung tơnguh uă bơta gĭt wă sền gàr gơnoar tờm ù tiah, lơngăp lơngai tiah nhàr lơgar bơh dà lơgar dê. Bi Y Quyết, kòn cau M’nông, ơm tàm ƀòn Sapa, xã Thuận An, kơnhoàl Dăk Mil, lơh mìr kơphê tàm tiah nhàr lơgar Thuận Hạnh, đơs: “Hìu bơnhă añ geh mìr kơphê tàm do, mờ geh jrong tiah nhàr lơgar tàm mìr tơn. Pah tŭ lòt lơh broă den añ kung pès wàs jơh rŭ rơm gùt dar jrong dê. Mờ dilah gŏ cau krơi mut tàm tiah nhàr lơgar den bol añ rơ̆p yal mờ mpồl ling sền gàr tiah nhàr lơgar in gĭt. Mpồl ling sền gàr tiah nhàr lơgar lòt sền sùm den bol añ kung iang nùs lơh mìr lơh suơn tàm do sơl”.

Jat Trung tá Lương Đình Hùng, Cíñ trị viên Pôs đồng ling sền gàr tiah nhàr lơgar Dăk Song, càr Dăk Nông đơs, sền gĭt broă sền gàr kơ̆ kơl jăp tiah nhàr lơgar ờ mìng là kơnòl broă bơh mpồl ling sền gàr tiah nhàr lơgar dê lơm ờ mờ gam là kơnòl broă bơh jơh gùt làng bol dê tai, pal kơldìng tàm bơta pràn bơh làng bol dê. Mpồl ling sùm sền gròi broă lơh gàr niam rài kis mpồl bơtiàn “sa bal, ơm bal mờ lơh bal” dùl nùs nhơm bal mờ làng bol tàm tiah nhàr lơgar dê. Trung tá Lương Đình Hùng, đơs: “Mpồl ling pal kơldìng tàm mpồl làng bol, làng bol là cau tờm tàm broă atbồ sền gàr tiah nhàr lơgar, mpồl ling sền gàr tiah nhàr lơgar là mpồl ling tờm ờs lơh kơnòl broă. Pah nam den mpồl ling pơgồp bal mờ gơnoar atbồ xã bơyai lơh uă broă lơh niam chài đơs crih tam ya tàp pràn să jan, mờ sền wơl 1 nam lơh jat srơh jơh gùt làng bol sền gàr lơngăp lơngai, gơnoar tờm ù tiah nhàr lơgar, nàng bal mờ làng bol lơh jat niam kơnòl broă sền gàr gơnoar tờm ù tiah lơngăp lơngăp tiah nhàr lơgar tàm ù tiah do dê”.

Ală nam pa do, Mpồl ling sền gàr tiah nhàr lơgar càr Dăk Nông neh yal tơngĭt 57 nă đảng viên tus bal pơrjum tàm 55 Ci ƀộ thôn, ƀòn; jàu kơnòl broă ai 146 nă đảng viên in drơng tơl mpồl hìu bơnhă tàm tiah nhàr lơgar. Mờ ală broă lơh geh ngan mờ geh cồng nha neh pơgồp bơnah bơtàu tơnguh rài kis bơh làng bol ală jơi bơtiàn dê, bơt bơtàu nùs nhơm tam klăc ling klàng làng bol tàm tiah nhàr lơgar. Hơ̆ là bơnàng jă nàng mpồl ling sền gàr tiah nhàr lơgar càr Dăk Nông in bơt bơtàu nùs nhơm rcang lài sền gàr tiah nhàr tàm jơh gùt làng bol, gàr tiah nhàr lơgar lơngăp lơngai mờ ngai sơlơ bơtàu tơnguh.