VOV4.K’ho- Sở Kông thương càr Kon Tum pà git, tàm dơ̆ càl rbut dờng sồ 9 nam 2020, Kông ty Kổ phần hìu măi pờ tơlik ồs đèng Đức Nhân- Đăk Psi mờ Kông ty Kổ phần Đức Thành Gia Lai neh lam lơh broă rơndap lơh ai ngui tơnau dơng dà ờ di mờ jơnau sồr lơh gơlik bơta dà kŏ dà cò gơ tàm rơndap rơndồl lơh gơbàn hoàc huơr bè phan bơna, phan tam bơh 62 hìu bơnhă làng bol tàm xã Đăk Long mờ Đăk Psi, kơnhoàl Đăk Hà dê.

Làng bol yal tiah ngơr bam dà tài bơh hìu măi pờ tơlik ồs đèng lời dà gơguh tih

Tus tŭ do, mờr 2 nam neh lòt gan, mơya 62 hìu bơnhă làng bol geh phan bơna, phan tam gơtìp hoàc huơr kung ờ hềt geh tơm wơl mờ dong kờl sơl. Jơnau là tài bơh Kông ty Kổ phần Đức Thành Gia Lai pơrdah tìs ai trồ tiah lơh aniai in mờ broă ai ngui bơh hìu măi pờ tơlik ồs đèng kâp hơđang dê den tàng ờ geh kơnòl tàm broă đơng lam, pơgồp bal... sền sơ wì, kờp sền, tơrgùm kờp hoàc huơr nàng lam lơh tơm wơl, dong kờl ai ală hìu bơnhă làng bol in. Sở Kông thương càr Kon Tum geh ai tơlik jơnau đơs mờ Ủy ƀan Ñân zân càr sồr Tổng Kông ty ồs đèng tiah tàm gùl lơgar ơm ing broă ai ngui hìu măi dilah cau tờm bơcri priă lơh hìu măi pờ tơlik ồs đèng ờ bài tơm wơl, dong kờl ai 62 hìu bơnhă làng bol in.

Cau mblàng K’Duẩn