VOV4.K’ho- Drim ngai 07/4, tàm ƀòn dờng Kon Tum, Mpồl đơng lam hòi jà ai is mhàm càr Kon Tum bơyai lơh dơ̆ lam lơh Ngai jơh gùt làng bol ai is mhàm nam 2022. Broă lơh nàng kờñ tơnguh jơnau git wă tàm ală rơnàng làng bol bè jơnau kờñ, bơta kuơ niam bơnĕ bơh broă lơh ai is mhàm dong kờl cau dê.

Đơs tàm dơ̆ bơyai lơh, Phó Củ tịc Ủy ƀan Ñân zân càr Kon Tum mò Y Ngọc pà git, ală nam do, srơh ai is mhàm tàm càr Kon Tum neh gơ gơs broă lơh niam ngan, geh gal làng bol tus bal lơh jat. Mìng is tàm nam 2021 pa do, gah lơh sơnơm càr Kon Tum neh dờp geh rlau 5 rbô 200 kơldung mhàm bơh cau ai is dê. Tơnơ̆ dơ̆ lam lơh, geh rlau 300 kơldung mhàm geh làng bol càr Kon Tum ai is tă pơgồp tàm anih prap ơn mhàm làm bă tiah drơng broă lơh kâp kứu mờ sơm cau kòp in.

Cau mblàng K’Duẩn