VOV4.K’ho- Tơngai pa do, broă atbồ ù tiah tàm càr Kon Tum neh tơngŏ uă bơta ờ niam, ờ pràn, geh tŭ kơl dang nùs “lơh ờ loh làng”. Jơnau gơ lời wơl là bal mờ bơta pơhì pơhà bè ù tiah, hoàc huơr phan bơna Dà lơgar dê, lơh ờ dùl ết nă làng bol gơmù bơta pin dờn là mpồl kwang bàng drơng broă lơh broă lơh atbồ ù tiah tàm càr do dê.

Pơgap mờ do 4 nhai, tàm tŭ lòt lơh sră dờp gơnoar ngui ù ai bơnah ù hìu bơnhă dê gam ơm, bi Nguyễn Thị Thanh Thúy ơm tàm xã Chư Hreng, ƀòn dờng Kon Tum sền gŏ hìu bơnhă he dê neh geh anih lơh broă geh gơnoar ai di tòm bal mờ sồ bơnah ù, sồ bă ù ai dùl nă cau ndai in.  Ƀi Nguyễn Thị Thanh Thúy đơs: Tŭ mờ añ sền gŏ den añ kung lơh sră yă mờ pơyoa ai Ủy ƀan Ñân zân xã, Ủy ƀan Ñân zân xã hơ là ờ geh gơnap gơnoar nàng bơsong. Sồr añ lơh sră yă tus Ủy ƀan Ñân zân ƀòn dờng in. Dùl nhai neh jơh kung ờ hềt gŏ Ủy ƀan Ñân zân ƀòn dờng hơ wơl sơl. Pa do tìp mat mờ cau tĕ khà añ kung geh jơnau đơs mơkung geh jơnau hơ là broă do kung ờ geh bơta lơi là kwơ màng sơl ờ. Yal tĕ tus mờ kấp hơđang in là geh gùng dà bơsong mờ ờ geh bơta lơi là kal ke ờ. Bè hơ̆ sùm, añ gam lơh sa nàng ròng oh kòn tai sơl.

Bơnah ù bơh bi Nguyễn Thị Thanh Thúy gơtìp anih lơh broă geh gơnoar kấp di tòm bal mờ sồ bơnah ù, sồ bă ù ai bi Nguyễn Tăng Trung in

Pa do tàm pơrjum dơ̆ 3, Hội đồng Ñân zân càr Kon Tum khoá 12, Ƀí thư Tỉñ ủy, Củ tịc Hội đồng Ñân zân càr Kon Tum ồng Dương Văn Trang lùp wơl broă Ủy ƀan Ñân zân thị trấn Đăk Hà, kơnhoàl Đăk Hà, ai cau dùl nă să is ồng Đỗ Trọng Lâm, ơm tàm gùng Hùng Vương jồm ù bơh nam 2017. Tŭ do tàm bă ù do ồng Lâm neh tuh bê tông jơh mat dà croh dê, lơh anih ràng tăc phan tàm ù tiah do nàng kă bro. Ồng Ka Ba Thành, Ƀí thư Huyện ủy Đăk Hà đơs song: broă lơh neh gơ rềng uă ngan tus bơta pin dờn bơh gơnoar atbồ tiah do dê.

Ồng Ka Ba Thành đơs: Làng bol tàm do sền gŏ là dilah gơnoar atbồ tiah do ờ ai den ờ geh broă lơh lơi mờ cau dùl să is lơh is broă lơh bè do ờ. Mờ tơnơ̆ tŭ lòt sền wơl den di ngan là thị trấn neh atbồ ờ pràn. Tŭ mờ sền gŏ broă do den neh ờ than nàng bơsong mờ kung gam lời ồng do in lơh tai gơlam tus là làng bol pin pơrah là gơnoar atbồ tiah do ai gơnoar mờ dong kờl.

Bă ù Ủy ƀan Ñân zân thị trấn Đăk Hà ai jồmgeh ồng Đỗ Trọng Lâm lơh anih ràng tăc phan Con Cưng nàng kă bro

Gơ rềng tus broă atbồ ù tiah tàm càr Kon Tum, tàm jơnau đơs pơndŭt lùp sền sồ 222 ngai 18/2/2022 bơh lùp sền Cíñ phủ dê neh sơñio loh dùl ròt bơta ờ pràn, lơh tìs, bè: Tơngai bơh nam 2016-2019 Ủy ƀan Ñân zân càr Kon Tum lơyài kĭ ring bal broă rơndap lơh ai ngui ù bơh 10 kơnhoàl, ƀòn dờng in; 85 nă cau jàu ù ờ bơh pơrlòng cŏk priă tàm kơnhoàl Đăk Hà; rơndap broă lơh Mpồl broă kă bro, nhơl ñŏ lơh rài bồ tơngoh mờ hìu drà bơh Kông ty Kổ phần Tập đoàn FLC dê lơh cau tờm bơcri lơh ờ hềt lơh sir mơya Cơl dŭ lơh broă dan ngui ù tiah càr Kon Tum neh ai sră dờp gơnoar ngui ù, gơnoar geh ngui hìu ơm, phan bơna jơ tai ndai gơ jat bal mờ ù tiah mờ neh tơrlah bă ù rlau 17 rơbô 600 thơk vương; Broă jàu ù ai 43 nă cau ơm tàm tiah drà đah Jum rbàng Đăk Bla, ƀòn dờng Kon Tum gơ wèt cau mut ơm kis pa….. Bal mờ hơ̆, ală bơta ờ pràn, ờ di mờ adat boh lam tàm broă rơndap ù tiah, atbồ rơndap ù tiah, ai wơl ù kung bè broă lơyài broă lơh niam wơl, bơsong lơh tìs lơh ờ dùl ết nă làng bol Kon Tum gơmù bơta pin dờn tàm mpồl kwang bàng drơng broă lơh broă atbồ ù tiah tàm tiah do dê.

Bi Phạm Thị Vân Kiều, hìu ơm tàm ƀòn dờng Kon Tum geh ù gơkòl tàm rơndap ù tiah, đơs: Tiah lơi kung lời nàng rơndap ù tiah lơm. Làng bol geh jơnau kơ̆p kờñ geh ơm kis tàm ù tiah  bơh khi dê mơya tŭ do rơndap ù tiah ờ lơh bơta lơi den ờ gĭt ơn bơta pin dờn tiah lơi tai tài bơh tiah lơi kung rơndap ù tiah lơm, tiah lơi kung ai wơl ù lơm.

Ồng Phạm Văn Trúc, Kwang bàng neh jơh sơnam lơh broă, ơm tàm hìu sồ 217 gùng Hùng Vương, thị trấn Đăk Hà, kơnhoàl Đăk Hà geh jơnau đơs: Dà lơgar den lơh broă kràñ cê jơh nùs, làng bol bol añ pin dờn uă ngan. Mơya gơ wèt mờ dùl nă làng bol, mờ dùl nă đảng viên tàm ù tiah càr Kon Tum dê den añ sền gŏ là broă lơh do gơwèt mờ càr gam ờ hềt geh sền gròi ngan sơl. Gĭt nđờ broă neh gơlik geh tơnơ̆ dơ̆ lùp sền, tơnơ̆ dơ̆ lòt sền neh geh mơya broă lơh jat jơnau pơndŭt bơh dơ̆ lùp sền hơ̆ den gơ lơh bè ờ geh lơh. Geh ală tiah den đơs ală jơnau là kal ke ir bơsong hời rơ hời. Kơ̆p kờñ là broă do geh pal lơh tus gùng tus dà.

Pa do tàm ală dơ̆ pơrjum, bè: Pơrjum dơ̆ 3, Hội đồng Ñân zân càr Kon Tum khoă 12; Pơrjum tìp mat tơm bơh bơr bơh Ủy ƀan Ñân zân càr Kon Tum mờ mpồl lơh sa kă bro; Pơrjum bơh Tỉñ ủy Kon Tum sền sơwì cồng nha tam gơl sră nggal, lơh niam tiah bơcri priă…. Kwang đơng lam bồ Tỉñ ủy, Hội đồng Ñân zân, Ủy ƀan Ñân zân càr Kon Tum neh tơngŏ bơta jơh nùs lơh ngan tàm broă bơsong broă lơh tìs, bơsong wơl bơta ờ niam, lơh glài ală cau lơh pơrneh iơh ờ niam lơh gơƀàn gơkòl, lơh ờ suk ơm tàm làng bol, mpồl lơh sa kă bro lòt lơh ală sră nggal geh gơrềng tus ù tiah. Mơya, nàng ai wơl bơta pin dờn bơh làng bol dê tàm gah broă atbồ ù tiah den mìng jơh nùs lơh ngan lơm là ờ hềt tơl, ală sở, ngàñ lơh broă geh gơnoar, ală kấp geh gơnoar càr Kon Tum kờñ pal lơh niam ờ gŏ lời bơta lơh ngan jơh nùs, jơnau đơng lam bơh kấp hơ đang dê gơ ơm tàm bơta “Bơh hơđang den sồr lơh ngan ai tàm kơnă hơđơm den ờ gŏ lơh jat” halà “Lơh broă ờ tus gùng tus dà”.

Cau cih Khoa Điềm- Cau mblàng K’Hạnh