VOV4.K’ho- Broă dong kờl bơto mờ bơtàu tơnguh uă mpồl cau lơh broă ai lơgar gơp bơyô Lào in neh lơh niam rlau tai bơta tam klăc, jrô ơnàng jŏ jòng mờ gĭt gơ̆p lơh bơyô bal dờng màng đah Việt Nam mờ Lào. Gĭt nđờ jơ̆t nam do, càr Kon Tum là tiah tus bơh uă cau bơsram dờng lơgar gơp bơyô dê. Gơwèt mờ cau bơsram dờng lơgar Lào, ală cau cèng bơta lơh ngan jơh nùs lòt tus lơgar Việt Nam bơsram sră, wă wờng jơnau bơto nàng rê wơl hờ lơgar tờm tă pơgồp bơta pràn bơ̆t bơtàu mờ bơtàu tơnguh dà lơgar, den Kon Tum, kơnhoàl ù tiah gam uă bòl glar kal ke tàm tiah Tây Nguyên gơlơh bè bơta bè ờs neh gơ gơs là ƀòn lơgar tờm dơ̆ 2 bơh khi dê.

Ală nam rềp ndo, Hìu bơsram Đại họk Đà Nẵng tàm càr Kon Tum là bơta sac rwah bơh uă cau bơsram dờng lơgar Lào dê. Tŭ do, broă lòt rê bơh 4 càr tiah đah jum lơgar gơ̆p bơyô Lào dê, hơ̆ là: Attapeu, Sekong, Champasak mờ Saravane tus càr Kon Tum ƀươn ƀoài ngan. Bal mờ hơ̆, Hìu bơsram Đại họk Đà Nẵng tàm càr Kon Tum gam bơto uă gah broă lơh, bè: adat boh lam, lơh broă priă jền, ătbồ kă bro, lơh broă kờp dŭ priă jền...lơh geh jơnau kờñ bơtàu tơnguh mpồl cau lơh broă bơh lơgar gơ̆p bơyô Lào dê. Tŭ do, Hìu bơsram gam geh 160 nă cau bơsram dờng lơgar Lào bơsram, tàm hơ̆, cau bơsram dờng geh dờp priă dong kờl bơsram bơh càr Kon Tum, Gia Lai dê mờ bơta dong kờl bơh 2 càr do dê là 100% mờ bơh Hìu bơsram dê là 50% priă tă bơsram. Ală oh ờ geh priă dong kờl bơsram lòt bơsram bè jơnau lòt bơsram rơcăng is. Ùr pơrgu Võ Thị Thanh Thảo, Kwang ătbồ Cơldŭ Lơh broă Kơnòm bơsram, Cau bơsram dờng- Hìu bơsram Đại họk Đà Nẵng tàm càr Kon Tum dê pà gĭt, hìu bơsram sùm lời bơta sền gròi, ai lài ai ală cau bơsram dờng lơgar Lào in bơh ngai sơnrờp ală oh cơnđoà jơng lòt tus càr Kon Tum tơn. Ùr pơrgu Võ Thị Thanh Thảo, đơs: Nàng dong ală bơyô in geh anih tìp măt lơh kwèng lùp bơsram den hìu bơsram ai rơndăp ai ală bơyô in ơm tàm hìu ơm bal bơh cau bơsram dờng Việt Nam dê, lơh ai ală bơyô in geh dùl anih niam ngan rlau jơh. Bơdìh mờ tŭ jiơ tàm ơdŭ, den ală bơyô gơtùi tus bal lơh ală broă lơh bơh cau bơsram dờng Việt Nam dê mờ jơh ală cơldŭ, ƀan ndrờm gơtùi dong kờl ală bơyô in uă ngan rlau jơh.

Pơgru bal mờ ală cau bơsram dờng lơgar Lào lơh dơ̆ lơh yàng kơ̆t che brài tềng tê tàm dơ̆ sa tềp bơhiàn Bunpimay

Gơwèt mờ ală cau bơsram dờng lơgar Lào gam bơsram tàm Hìu bơsram Đại họk Đà Nẵng tàm càr Kon Tum, pơgăp tŭ tơngai rlau 2 nam bơtờp kòp Kovid-19 lơh bơtờp pràn ngan sùm sùm là jơnau kir sơnrai ờ tŭ lơi rơgơi hŭi gơwèt mờ ală oh. Kòp bơtờp lơh cau bơsram dờng lơgar Lào dê ờ gơtùi rê còp hìu kung bè bơta ờ huan ai lơh ală broă nàng kờñ lơh niam broă lơh rơcăng lài kơryan kòp. Ală pơgru tàm tơngai do neh gơ gơs là cau bèp, cau mè pơndờm pơnđiang bè đah nùs nhơm mơkung dong kờl ală oh bơsram wă wờng jơnau bơto.

Ùr bơsram dờng Vongkhamlar Thipphada, ƀòn ơm tàm càr Saravane gam bơsram nam dơ̆ 4, gah Adat Lơh sa kah wơl, oh gơlơh nrơ̆t ndơl ngan tŭ geh wă rò sa tềp bơhiàn yau Bunpimay, geh tus bal dơ̆ lơh yàng duh khuai mang tàm jàu sơnam, kơ̆t che brài tềng tê mờ tam ya bal lăm vong tàm lơgar Việt Nam tơn. Tài bơh gŏ ală cau bơsram dờng lơgar Lào ờ gơtùi rê hờ lơgar tờm wă rò sa tềp, ală pơgru neh jơh nùs lơh ngan dong ală oh geh kis tàm nùs nhơm kờñ gơboh rềp mềl bơh ƀòn lơgar tờm dê nàng tơrmù ƀà bơta kah ir hìu. Ùr bơsram dờng Vongkhamlar Thipphada ngoh rơngac kah wơl: Pơgru, hìu bơsram bơyai lơh sa tềp bơhiàn yau lơgar Lào dê ai bol oh in tàm Việt Nam niam ngan, mờ gơlơh rềp mềl ngan. Geh pà phan ai bol oh in tai. Kah hìu mơya geh pơgru tàm do dong kờl den ờ huan đau kah ir. Pơgru dong bol oh uă ngan. Bol oh geh bơta lơi kal ke den đơs mờ pơgru den là geh pơgru dong kờl bol oh in jơh ală bơta.

Cau bơsram dờng lơgar Lào tàp klơm mbar kơnâm lơmpòng tàm dơ̆ sa tềp bơhiàn Việt Nam dê

Mờ bơta dong kờl uă ngan bơh ală pơgru tàm Hìu bơsram Đại họk Đà Nẵng tàm càr Kon Tum dê, jơh ală cau bơsram dờng lơgar Lào ndrờm tơryăng tơryồng ngan bơsram sră mờ wă wờng mhar ngan jơnau bơto. Thongkhamsouk Koungthong là cau bơsram dờng nam dơ̆ 4, bơsram gah Măy mok yal tơngĭt jơnau, pà gĭt: ƀòn oh dê tàm càr Champasak, mè bèp lơh broă sa sươn sre den tàng rài kis hìu bơnhă kal ke ngan. Bơh bơta lơh ngan pơđơl pràn bơh să tờm dê, oh tơl bơta lòt tus Việt Nam bơsram, lơh jăt bơta kơ̆p kờñ bơh he dê. Geh bơsram, lòt sền nàng gĭt tàm tiah ơm kis rềp mềl, bềng bơta kờñ gơboh tàm dong tàm ròng bal bơh pơgru mờ gơ̆p bơyô dê, Thongkhamsouk Koungthong jơh nùs lơh ngan bơsram mờ gŏ gơlơh pin dờn tàm să tờm. Thongkhamsouk Koungthong yal bơta kơlôi sơnơng mờ geh bal ală jơnau rơcăng lơh tơ̆ do bơh he dê, bè do: Ală bơyô Việt Nam mờ bol oh den niam ngan, geh bơta lơi kung là dong kờl bè broă bơsram. Gah bơsram do oh gŏ là pơndrờm mờ gah bơsram ndai kung là kal ke sơl mơya oh pal lơh ngan bơsram tus gơtùi. Gơwèt mờ oh là bơsram tàm Việt Nam kung là niam rlau tàm đah lơgar Lào. Oh gŏ gah bơsram măy mok yal tơngĭt jơnau tŭ do gam bơtàu tơnguh mờ geh uă kông ty gam kờñ cau bơsram gah măy mok yal tơngĭt jơnau. Oh kơlôi là tơnơ̆ do lik klờng oh geh dan broă tàm lơgar Lào. Oh geh yal ală oh pa lik klờng tàm lơgar Lào in geh yal là bơsram tàm Việt Nam niam rlau.

Cau pơgru Hìu bơsram Đại họk Đà Nẵng tàm Kon Tum sùm cribơyai broă bơsram sră mờ cau bơsram dờng lơgar Lào

Bơta geh ngan pà gŏ, broă dong kờl bơto bơtê, bơtàu tơnguh mpồl cau lơh broă ai lơgar gơ̆p bơyô Lào in là dùl krơh niam bè bơta tam klăc, đềt mềr jŏ jòng, gĭt gơ̆p lơh bơyô bal, ờ tŭ lơi tam gơl dờng màng ngan đah Việt Nam mờ Lào. Ală hìu bơsram Kao đẳng, Trung kâp Broă lơh bơh càr Kon Tum dê mờ tŭ do geh tai Hìu bơsram Đại họk Đà Nẵng sùm tàm jơh gĭt nđờ jơ̆t nam do neh là anih tus bơh uă cau bơsram dờng lơgar Lào dê. Gơwèt mờ ală cau kơnòm să bơh dà lơgar tơlak nơm rwas cèng bơta jơh nùs lơh ngan lòt tus Việt Nam bơsram sră, wă wờng jơnau bơsram nàng rê wơl hờ ƀòn lơgar tờm tă pơgồp bơta pràn bơ̆t bơtàu, bơtàu tơnguh dà lơgar Lào den Kon Tum, kơnhoàl ù tiah gam uă bơta bòl glar kal ke tàm tiah Tây Nguyên bè dùl bơta bè ờs neh gơ gơs là ƀòn lơgar tờm dơ̆ 2 bơh khi dê.

Cau cih Khoa Điềm- Cau mblàng Lơ Mu K’Yến