Tềng đăp mờ bơta do, gah bơto bơtê mờ bơsram càr Kon Tum gam lơh jăt uă broă lơh nàng gàr niam broă bơto tàm ală hìu bơsram.

        Pơgru Cao Thanh Diễm Quỳnh dờp bơto dà Mỹ tàm 2 hìu bơsram kấp 1 tàm ƀòn dờng Kon Tum

Jơnau yal bơh Sở Giáo dụk mờ Đào tạo càr Kon Tum pà gŏ, gơwèt mờ kấp Mầm non tŭ do càr gam ờ tơl 705 nă cau pơgru, Kấp 1 ờ tơl 477 nă cau pơgru, Kấp 2 ờ tơl 497 nă cau pơgru mờ kấp 3 ờ tơl 43 nă cau pơgru.

Nàng bơsong bơta ờ tơl cau pơgru, gah bơto bơtê mờ bơsram càr Kon Tum lơh jăt broă rơndăp lơh, tơrgùm wơl ală hìu bơsram mầm non, phổ thông dà lơgar lơh dềt; Tam pà, ai, ndrờm bal mpồl cau pơgru atbồ, cau pơgru bơto, cau lơh broă tàm tơl kơnhoàl, bơsong bơta jơkah, ờ tơl tàm ală tiah; Tam pà, ai cau pơgru bơto kấp 3 bơto ờ uă dơ̆ tàm kấp 2, cau pơgru bơto kấp 2 bơto ờ uă dơ̆ tàm kấp 1. Sở Giáo dục mờ Đào tạo càr Kon Tum kung neh dan mờ Ƀộ Giáo dục mờ Đào tạo bơtơl cau pơgru bơto tàm ală môn gam ờ tơl.