VOV4.K’ho - Mờ cồng nha rơlao 10 ngai lùp khào, ai git mờ kŭp geh cau tàm dơ̆ “Tìs mờ kơrnoăt bè broă lơh, sền gàr brê mờ phan geh bơh brê”, Kwang àng kơnhoàl Sa Thầy geh pơn jờng ni sơna.

  Ồng Dương Văn Trang, Ƀí thư Tỉñ ủy Kon Tum chờ gờm cồng nha bơsong tìs bơh ală cau ling kwang àng dê

Drim òr (20/09), tàm hìu lơh broă Kwang àng kơnhoàl Sa Thầy, ồng Dương Văn Trang, Ƀí thư Tỉñ ủy, Củ tịc HĐÑZ càr Kon Tum neh pơn jờng ni sơna 20 tơlăk đong ai mpồl Kwang àng kơnhoàl Sa Thầy in. Dờp sră yă bơh mpồl sền gàr brê kơnhoàl dê, tàm rơlao 10 ngai pa do, Kwang àng kơnhoàl Sa Thầy neh lùp khào, ai gŏ mờ kŭp geh ờ uă cau tàm dơ̆ “Lơh tìs mờ kơrnoăt bè lơh, sền gàr brê mờ phan bơh brê” gơtìp tàm bă brê 6, tiah brê 692, ù tiah xã Mô Rai, kơnhoàl Sa Thầy, gơwèt bơnah brê geh Kông ty TNHH MTV Lâm nghiệp Sa Thầy atbồ. Tŭ do, Kwang àng kơnhoàl Sa Thầy gam pơn jăt tai lam sồr ală cau ndai tơlik măt nàng lơh gơs sră nggal, lơh gơs dơ̆ yă tìs. Ƀí thư Tỉñ ủy Kon Tum kung sồr Mpồl đơng lam Đảng UɃÑZ càr, Đảng ủy kwang àng càr, Ƀan Thường vụ Huyện ủy Sa Thầy pơn jăt tai tơnguh nùs nhơm geh kơnòl, tơnguh broă atbồ, sền gàr brê tàm kơnhoàl; tơnguh gơnoar, kơnòl bơh cau tờm brê; sùm lòt sền, jòi, di tŭ gŏ, lơh glài nền nòn di jăt mờ kơrnoăt tàm adăt boh lam gơwèt mờ ală broă lơh tìs mờ adăt lơh sa brê bơnơm dê...

Cau mblàng Ndong Brawl