Drim òr (17/04), tàm ƀòn dờng Kon Tum, UɃÑZ càr Kon Tum bơyai lơh broă lơh Kơphe Mpồl lơh sa kă bro mờ cau lơh sa kă bro nàng pơn jăt tai yal, dan bè ală kal ke, gơkòl bơh mpồl lơh sa kă bro, cau lơh sa kă bro tàm broă bơcri priă mờ lơh sa kă bro tàm càr do dê.

Tàm broă lơh, ala măt ală mpồl lơh sa kă bro, cau lơh sa kă bro neh song dơ pă cri bơyai mờ kwang đơng lam UɃÑZ mờ ală sở, gah lơh broă geh gơnoar bơh càr Kon Tum dê bè ală kal ke, gơkòl tàm broă bơcri priă kung bè lơh sa kă bro tàm càr. Iăt ală jơnau yal, jơnau dan, UɃÑZ càr Kon Tum, ală sở, gah lơh broă geh gơnoar bal mờ gơnoar atbồ 10 kơnhoàl, ƀòn dờng tàm càr neh bơsong, hơ mblàng mờ bơsong 101 bơta ai mpồl lơh sa kă bro in. Gơwèt mờ cau gam gơkòl càr Kon Tum geh ai tơnơ̆ mờ 10 ngai mpồl lơh broă geh gơnoar pal geh gùng dà broă lơh pal bơsong, pơyoa sră nggal hơ jơnau lùp bơh mpồl lơh sa kă bro mờ yal UɃÑZ càr in nàng sền gròi tơrgùm bal.